FUEL PRICES | పెట్రోల్, డీజిల్, LPG పెంపు సంకేతాలు

*వాహనదారులకు చేదువార్త

*త్వరలో పెట్రోల్, డీజిల్ ధరల పెంపు..

*సామాన్యుడి జేబుకు చిల్లు

ఆకేరు న్యూస్, డెస్క్: దేశంలోని సామాన్య మధ్యతరగతి ప్రజలపై మరోసారి ధరల భారం పడబోతోంది. గత కొంతకాలంగా స్థిరంగా ఉన్న పెట్రోల్, డీజిల్ మరియు గృహ వినియోగ గ్యాస్ (LPG) ధరలు త్వరలోనే పెరిగే అవకాశాలు కనిపిస్తున్నాయి. అంతర్జాతీయ మార్కెట్‌లో ముడి చమురు ధరలు ఆకాశాన్నంటుతుండటమే దీనికి ప్రధాన కారణమని నిపుణులు విశ్లేషిస్తున్నారు.

* పశ్చిమాసియా ఉద్రిక్తతల ప్రభావం
ప్రస్తుతం పశ్చిమాసియాలో (West Asia) నెలకొన్న యుద్ధ మేఘాలు ప్రపంచ చమురు మార్కెట్‌ను అతలాకుతలం చేస్తున్నాయి. ముఖ్యంగా అంతర్జాతీయ సరఫరా మార్గాల్లో అడ్డంకులు ఏర్పడటంతో బ్రెంట్ క్రూడ్ ఆయిల్ ధర పెరిగింది. దీనివల్ల చమురు మార్కెటింగ్ కంపెనీలపై (OMCs) తీవ్ర ఆర్థిక ఒత్తిడి పడుతోంది. ఇప్పటికే కమర్షియల్ గ్యాస్ సిలిండర్ ధర భారీగా పెరగగా, ఇప్పుడు ఆ ప్రభావం సామాన్యుడి వంటింట్లోకి కూడా చేరనుంది.

*అంచనా వేస్తున్న ధరల వివరాలు
ప్రభుత్వ వర్గాల నుంచి అందుతున్న సమాచారం ప్రకారం, ఈ పెంపు ఇలా ఉండవచ్చు.
పెట్రోల్ & డీజిల్: లీటరుకు సుమారు ₹4 నుండి ₹5 వరకు పెరిగే అవకాశం ఉంది.
డొమెస్టిక్ LPG (14.2 కేజీలు): గృహ వినియోగ సిలిండర్‌పై ₹50 వరకు భారం పడే ఛాన్స్ ఉంది.

*నష్టాల్లో ఆయిల్ కంపెనీలు
గడిచిన కొన్నేళ్లుగా ఇంధన ధరలను ప్రభుత్వం పెద్దగా పెంచలేదు. అయితే, ప్రస్తుతం అంతర్జాతీయ మార్కెట్‌లో బ్యారెల్ ముడి చమురు ధర భారీగా పెరగడంతో, ఆయిల్ కంపెనీలు తీవ్ర నష్టాల్లో ఉన్నాయని, ఈ నష్టాల భర్తీ కోసమే ధరల పెంపు అనివార్యమని తెలుస్తోంది. మరో 5 నుంచి 7 రోజుల్లో దీనిపై అధికారిక ప్రకటన వెలువడే అవకాశం ఉంది.

*సామాన్యుడిపై ప్రభావం
ఒకవేళ పెట్రోల్, డీజిల్ ధరలు పెరిగితే ఆ ప్రభావం రవాణా రంగంపై పడుతుంది. రవాణా ఖర్చులు పెరగడం వల్ల నిత్యావసర వస్తువులు, పండ్లు, కూరగాయల ధరలు కూడా ఆకాశాన్నంటే ప్రమాదం ఉంది. ఇప్పటికే పెరుగుతున్న ద్రవ్యోల్బణంతో సతమతమవుతున్న సామాన్యుడికి ఇది “పిడుగు మీద పడ్డట్టు” కానుంది.