MAOIST SURRENDER | మావోయిస్టు అగ్రనేత నరహరి లొంగుబాటు

* భార్యతో సహా లొంగిపోయిన మావోయిస్టు అగ్రనేత

ఆకేరు న్యూస్, హన్మకొండ: భారత కమ్యూనిస్ట్ పార్టీ (మావోయిస్టు)లో అత్యంత కీలకమైన కేంద్ర కమిటీ (Central Committee) సభ్యుడు పసునూరి నరహరి అలియాస్ సంతోష్ అలియాస్ టెక్ విశ్వనాథ్ పోలీసుల ఎదుట లొంగిపోయారు. దాదాపు నాలుగున్నర దశాబ్దాల పాటు అజ్ఞాతంలో గడిపిన ఆయన, తన భార్యతో కలిసి తెలంగాణ పోలీసులకు లొంగిపోయినట్లు సమాచారం అందుతోంది. గత కొంతకాలంగా అనారోగ్య సమస్యలతో బాధపడుతున్న ఆయన, జనజీవన స్రవంతిలో చేరాలని నిర్ణయించుకున్నట్లు తెలుస్తోంది.

* విద్యార్థి దశ నుంచే ఉద్యమం వైపు..

హనుమకొండ జిల్లా కాజీపేట మండలం సోమిడి గ్రామానికి చెందిన పసునూరి సోమనారాయణ-నర్సమ్మ దంపతుల ద్వితీయ కుమారుడు నరహరి. 1980వ దశకంలో హనుమకొండలోని ఎల్‌బీ కాలేజీలో డిగ్రీ చదువుతున్న సమయంలోనే ఆయన నక్సల్ సిద్ధాంతాలకు ఆకర్షితుడయ్యారు. అప్పటి రాడికల్ విద్యార్థి సంఘం నాయకులతో పరిచయాలు, ముఖ్యంగా అప్పటి రాష్ట్ర కార్యదర్శి పులి అంజయ్య, క్రాంతి రణదేవ్ వంటి వారితో ఏర్పడిన స్నేహం నరహరిని సాయుధ పోరాటం వైపు నడిపించింది.

* టెక్నికల్ వింగ్‌లో కీలకం
ఉద్యమ తొలినాళ్లలో భూస్వాములకు వ్యతిరేకంగా, కూలీల రేట్ల పెంపు కోసం పోరాడిన నరహరి, 1996 నుంచి పూర్తిస్థాయిలో అజ్ఞాతంలోకి వెళ్లారు. పార్టీలో తన మేధస్సుతో అంచెలంచెలుగా ఎదిగిన ఆయన, ప్రస్తుతం మావోయిస్టు పార్టీ జార్ఖండ్ ఈస్ట్ రీజినల్ బ్యూరో (ERB)లో టెక్నికల్ విభాగం ఇన్‌ఛార్జ్‌గా బాధ్యతలు నిర్వహిస్తున్నారు. పార్టీకి అవసరమైన ఆయుధాల తయారీ, కమ్యూనికేషన్ వ్యవస్థల బలోపేతంలో ఆయనది కీలక పాత్ర. ఆయనపై ప్రభుత్వం భారీ రివార్డును కూడా ప్రకటించింది.

* లొంగుబాటుకు కారణాలు

కేంద్ర ప్రభుత్వం మావోయిస్టుల ఏరివేతే లక్ష్యంగా చేపట్టిన ‘ఆపరేషన్ కగార్’ మరియు జార్ఖండ్-ఛత్తీస్‌గఢ్ సరిహద్దుల్లోని సరాండా అడవుల్లో పెరిగిన పోలీసు నిర్బంధం నరహరి లొంగుబాటుకు దారితీసినట్లు విశ్లేషకులు భావిస్తున్నారు. మరోవైపు, వయసు పెరగడం మరియు అనారోగ్య కారణాల రీత్యా అడవిలో కొనసాగడం కష్టతరం కావడంతో, ప్రభుత్వం కల్పిస్తున్న పునరావాస ప్యాకేజీ పట్ల ఆకర్షితులై ఆయన బయటకు వచ్చినట్లు తెలుస్తోంది.

ఇప్పటికే మావోయిస్టు పార్టీకి చెందిన పలువురు అగ్రనేతలు తిప్పరి తిరుపతి (దేవ్ జీ), మల్లా రాజిరెడ్డి (సంగ్రామ్) వంటి వారు లొంగిపోగా, తాజాగా నరహరి సరెండర్ అవ్వడం ఆ పార్టీకి కోలుకోలేని దెబ్బగా పరిగణించవచ్చు. ఆయన లొంగుబాటుపై పోలీస్ ఉన్నతాధికారులు అధికారికంగా ప్రకటన చేసే అవకాశం ఉంది.