CP SUNPREET SINGH | ప్రైవేట్ రిపేర్ సెంటర్లకు ఇక బై-బై

* పోలీస్ ఎంటీ విభాగంలో సరికొత్త హైడ్రాలిక్ యంత్రాలు

ఆకేరు న్యూస్, వరంగల్: వరంగల్ పోలీస్ కమిషనరేట్ కార్యాలయంలోని మోటార్ ట్రాన్స్‌పోర్ట్ (MT) విభాగం సరికొత్త సాంకేతికతతో ఆధునీకరణకు శ్రీకారం చుట్టింది. పోలీస్ వాహనాల త్వరితగతిన మరమ్మత్తుల కోసం నూతనంగా ఏర్పాటు చేసిన భారీ హైడ్రాలిక్ యంత్రాన్ని, అలాగే వాహనాల టైర్లను సులువుగా తొలగించి, అమర్చే (Tyre Changer) అధునాతన యంత్రాన్ని వరంగల్ పోలీస్ కమిషనర్ (సీపీ) సన్‌ప్రీత్ సింగ్, ఐపీఎస్ సోమవారం ఘనంగా ప్రారంభించారు.

* స్వయంగా పరిశీలించారు…

రిబ్బన్ కట్ చేసి ఈ నూతన యంత్రాలను ప్రారంభించిన అనంతరం, సీపీ సన్‌ప్రీత్ సింగ్ ఇతర పోలీస్ ఉన్నతాధికారులతో కలిసి క్షేత్రస్థాయిలో వాటి పనితీరును స్వయంగా పరిశీలించారు. ఈ సందర్భంగా యంత్రాల వినియోగం, వాటి ద్వారా చేకూరే ప్రయోజనాలను ఎంటీ విభాగం సిబ్బందిని అడిగి తెలుసుకున్నారు.

* సమయం, ధనం ఆదా….

ఈ సందర్భంగా పోలీస్ కమిషనర్ సన్‌ప్రీత్ సింగ్ మాట్లాడుతూ.. శాంతిభద్రతల పరిరక్షణలో పోలీస్ వాహనాల పాత్ర అత్యంత కీలకమైందని పేర్కొన్నారు.
“గతంలో పోలీస్ వాహనాల భారీ రిపేర్ల కోసం ప్రైవేట్ రిపేర్ సెంటర్లపై ఆధారపడాల్సి వచ్చేది. దీనివల్ల సమయం వృధా అవ్వడంతో పాటు అదనపు వ్యయం భరించాల్సి వచ్చేది. ఇప్పుడు కమిషనరేట్ పరిధిలోనే అధునాతన భారీ హైడ్రాలిక్, టైర్ చేంజర్ యంత్రాలను అందుబాటులోకి తేవడం ద్వారా సొంతంగానే, అత్యంత వేగంగా మరమ్మత్తులు పూర్తి చేసుకోవచ్చు. ఇది సమయాన్ని, ప్రభుత్వ ధనాన్ని ఎంతగానో ఆదా చేస్తుంది.” అని సీపీ వివరించారు.

* నిర్వహణపై ప్రత్యేక దృష్టి పెట్టాలి..

పోలీస్ వాహనాలను వినియోగించే అధికారులు, డ్రైవర్లు మరియు సిబ్బంది వాటి రోజువారీ నిర్వహణ (Maintenance) పట్ల ప్రత్యేక శ్రద్ధ వహించాలని సీపీ సూచించారు. సకాలంలో సర్వీసింగ్, జాగ్రత్తలు పాటించడం ద్వారా వాహనాలు పదే పదే మరమ్మత్తులకు గురికాకుండా చూసుకోవచ్చని, దీనివల్ల వాహనాల కాలపరిమితి కూడా పెరుగుతుందని ఆయన స్పష్టం చేశారు.

* భారీగా తరలివచ్చిన పోలీస్ ఉన్నతాధికారులు

ఈ ప్రతిష్టాత్మక ఆధునీకరణ కార్యక్రమంలో వరంగల్ పోలీస్ శాఖకు చెందిన పలువురు ఉన్నతాధికారులు పాల్గొన్నారు. పాల్గొన్న వారిలో డీసీపీలు- అంకిత్ కుమార్ (ఐపీఎస్), దార కవిత,
అదనపు డీసీపీలు- సురేష్ కుమార్, రవి, ప్రభాకర్ రావు, శ్రీనివాస్, ఏసీపీలు- నాగయ్య, అంతయ్య, సురేంద్ర, జితేందర్ రెడ్డి, సత్యనారాయణ, జాన్ నర్సింహులు, ఆర్.ఐలు-శ్రీధర్, స్పర్జన్ రాజ్, సతీష్, చంద్రశేఖర్, శ్రీనివాస్ వీరితో పాటు మోటార్ ట్రాన్స్‌పోర్ట్ విభాగానికి చెందిన సాంకేతిక సిబ్బంది, ఇతర పోలీస్ అధికారులు ఈ ప్రారంభోత్సవంలో పెద్ద సంఖ్యలో పాల్గొన్నారు.