Phule Movie
* థియేటర్లలోకి ఫూలే దంపతుల పోరాట గాథ!
ఆకేరు న్యూస్, సినిమా: భారతదేశ సామాజిక సంస్కరణల చరిత్రలో చిరస్థాయిగా నిలిచిపోయిన మహనీయులు జ్యోతిరావ్ ఫూలే, సావిత్రిబాయి ఫూలే జీవిత కథ వెండితెరపై ప్రేక్షకులను అలరించేందుకు సిద్ధమైంది. వారి జీవిత ప్రయాణం, సామాజిక మార్పు కోసం చేసిన పోరాటం ఆధారంగా తెరకెక్కిన ‘ఫూలే’ (Phule) చిత్రం నవంబర్ 27న తెలుగు ప్రేక్షకుల ముందుకు రానుంది. ఇప్పటికే తెలుగు డబ్బింగ్ (Telugu Dubbing) పనులు పూర్తయ్యాయి. ప్రపంచవ్యాప్తంగా థియేటర్లలో విడుదల చేసేందుకు చిత్ర బృందం ఏర్పాట్లు చేస్తోంది.
కులవివక్షపై పోరాటమే కథాంశం
సమాజంలో వేళ్లూనుకున్న కులవివక్ష (Caste Discrimination), సామాజిక అసమానతలు, మహిళలపై వివక్షకు వ్యతిరేకంగా జ్యోతిరావ్ ఫూలే, సావిత్రిబాయి ఫూలే దంపతులు సాగించిన పోరాటాన్ని ఈ చిత్రంలో ప్రధానంగా చూపించారు. మహిళా విద్య (Women’s Education), సమానత్వం (Equality), సామాజిక న్యాయం (Social Justice) కోసం వారు చేసిన కృషి, ఎదుర్కొన్న సవాళ్లను కథాంశంగా మలిచారు. ప్రముఖ దర్శకుడు అనంత్ మహదేవన్ (Ananth Mahadevan) ఈ చిత్రానికి దర్శకత్వం వహించారు. సుపదా క్రియేషన్స్ (Supada Creations) నిర్మాణంలో డా. పొన్నం రవిచంద్ర నిర్మాతగా వ్యవహరించారు.
సీఎం, డిప్యూటీ సీఎం ప్రత్యేక ప్రదర్శన
తెలంగాణ ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్కతో పాటు పలువురు మంత్రులు, ఎమ్మెల్యేలు, ఎమ్మెల్సీలు ఈ చిత్రాన్ని ప్రత్యేకంగా వీక్షించినట్లు చిత్ర బృందం వెల్లడించింది. సినిమా చూసిన అనంతరం ఫూలే దంపతులు సమాజానికి చేసిన సేవలను, కులవివక్ష నిర్మూలన, మహిళా విద్య అభివృద్ధి కోసం వారు సాగించిన పోరాటాన్ని ప్రశంసించారు. వారి ఆశయాలు నేటి తరానికి ఎంతో స్ఫూర్తిదాయకమని అభిప్రాయపడ్డారు.
యువతకు స్ఫూర్తినిచ్చే చారిత్రక గాథ
‘ఫూలే’ (Phule) కేవలం సినిమా మాత్రమే కాదని, సామాజిక మార్పు కోసం జీవితాలను అంకితం చేసిన ఇద్దరు మహనీయుల ఆశయాలను నేటి తరానికి పరిచయం చేసే చారిత్రక కథనమని చిత్ర బృందం పేర్కొంది. విద్యార్థులు, యువతతో పాటు ప్రతి ఒక్కరూ ఫూలే దంపతుల జీవిత చరిత్రను తెలుసుకోవాల్సిన అవసరం ఉందని తెలిపింది.
సమానత్వం, విద్య, మానవత్వం, సామాజిక బాధ్యత వంటి విలువలను గుర్తుచేసే ఈ చిత్రాన్ని ప్రేక్షకులు థియేటర్లలో వీక్షించాలని చిత్ర బృందం కోరింది. నవంబర్ 27న తెలుగు ప్రేక్షకుల ముందుకు రానున్న ఈ సినిమా ఎలాంటి ఆదరణ పొందుతుందో చూడాలి.

Please tell us what is wrong. Your report will be sent to the website team.

