INDIA vs ENGLAND T20 | నేడు ఇంగ్లండ్‌తో మూడో టీ20

Published: 07 Jul 2026 • 06:16 PM

* సిరీస్‌లో నిలవాలంటే తప్పనిసరిగా గెలవాల్సిందే

ఆకేరు న్యూస్, డెస్క్:

భారత్-ఇంగ్లండ్ మధ్య జరుగుతున్న ఐదు మ్యాచ్‌ల టీ20 సిరీస్‌లో నేడు (జూలై 7) మూడో మ్యాచ్ జరగనుంది. నాటింగ్‌హమ్ వేదికగా భారత కాలమానం ప్రకారం రాత్రి 11 గంటలకు మ్యాచ్ ప్రారంభం కానుంది.

తొలి మ్యాచ్ వర్షం కారణంగా రద్దు కాగా, రెండో మ్యాచ్‌లో ఓటమి చవిచూసిన టీమిండియా.. సిరీస్‌లో నిలవాలంటే ఈ మ్యాచ్‌లో తప్పనిసరిగా విజయం సాధించాల్సిన పరిస్థితి ఏర్పడింది.

* శ్రేయస్ సేనపై భారీ అంచనాలు

టీ20 జట్టుకు కొత్త కెప్టెన్‌గా బాధ్యతలు చేపట్టిన శ్రేయస్ అయ్యర్‌కు ఇప్పటివరకు విజయాన్ని అందుకోవడం సాధ్యపడలేదు. దీంతో మూడో టీ20 అతడి నాయకత్వానికి కూడా కీలక పరీక్షగా మారింది. ఈ మ్యాచ్‌లో గెలిస్తే సిరీస్ 1-1తో సమమవుతుంది. ఓడితే సిరీస్‌పై ఇంగ్లండ్ ఆధిపత్యం మరింత పెరుగుతుంది.

* వైభవ్‌పై మరోసారి అందరి చూపు

రెండో టీ20లో అంతర్జాతీయ అరంగేట్రం చేసిన యువ సంచలనం వైభవ్ సూర్యవంశీ దూకుడైన బ్యాటింగ్‌తో ఆకట్టుకున్నాడు. దీంతో మరోసారి అతడే ఓపెనర్‌గా బరిలోకి దిగే అవకాశాలు కనిపిస్తున్నాయి.

అభిషేక్ శర్మతో కలిసి ఇన్నింగ్స్ ప్రారంభించే అవకాశం ఉంది. దీంతో వికెట్ కీపర్ సంజూ శాంసన్‌కు మరోసారి తుది జట్టులో చోటు దక్కడం కష్టంగానే కనిపిస్తోంది.

* మిడిల్ ఆర్డర్ రాణించాల్సిందే

ఇషాన్ కిషన్, శ్రేయస్ అయ్యర్, తిలక్ వర్మ, శివమ్ దూబేలు బాధ్యతాయుతంగా ఆడాల్సిన అవసరం ఉంది. తొలి రెండు మ్యాచ్‌ల్లో మిడిల్ ఆర్డర్ ఆశించిన స్థాయిలో రాణించకపోవడం భారత్‌కు ప్రతికూలంగా మారింది.

* బౌలింగ్‌లో మార్పులు?

బౌలింగ్ విభాగంలో టీమ్ మేనేజ్‌మెంట్ ఒక మార్పు చేసే అవకాశాలు ఉన్నాయి. స్పిన్నర్ రవి బిష్ణోయ్ స్థానంలో యువ పేసర్ ప్రిన్స్ యాదవ్ కు అవకాశం ఇవ్వొచ్చని సమాచారం. అర్ష్‌దీప్ సింగ్, హర్షిత్ రాణా పేస్ దళంలో కొనసాగనుండగా.. అక్షర్ పటేల్, వరుణ్ చక్రవర్తి స్పిన్ బాధ్యతలు చేపట్టే అవకాశం ఉంది.

భారత్‌కు ఈ మ్యాచ్ అత్యంత కీలకం. గెలిస్తే సిరీస్‌లో మళ్లీ పోటీకి వస్తుంది. ఓడితే ఇంగ్లండ్ సిరీస్‌ను చేజిక్కించుకునే దిశగా భారీ అడుగు వేస్తుంది. దీంతో నేటి పోరు ఇరు జట్లకూ ఆసక్తికరంగా మారింది.