GOVERNOR SHIV PRATAP SHUKLA | వరంగల్ లో స్టాళ్ల సందర్శన

* వస్తువులు స్వయంగా కొనుగోలు చేసిన శివ్ ప్రతాప్

ఆకేరు న్యూస్, వరంగల్: స్వయం సహాయక సంఘాల (SHG) మహిళలు స్వశక్తితో ఆర్థికంగా ఎదగడం అభినందనీయమని తెలంగాణ రాష్ట్ర గవర్నర్ శివ్ ప్రతాప్ శుక్లా కొనియాడారు. గురువారం హనుమకొండ జిల్లా కలెక్టరేట్ (ఐడీఓసీ) ప్రాంగణంలో గ్రామీణ పేదరిక నిర్మూలన సంస్థ (SERP), పట్టణ పేదరిక నిర్మూలన సంస్థ (MEPMA), వ్యవసాయ, ఉద్యానవన శాఖల సంయుక్త ఆధ్వర్యంలో ఏర్పాటు చేసిన ప్రత్యేక ప్రదర్శన స్టాళ్లను గవర్నర్ సందర్శించారు. మహిళలు తయారు చేసిన వివిధ రకాల ఉత్పత్తులను ఆయన ఆసక్తిగా పరిశీలించి, వారి నైపుణ్యాలను మనస్ఫూర్తిగా ప్రశంసించారు.

* ఉత్పత్తులను అడిగి స్వయంగా కొనుగోలు చేసి..

స్టాళ్ల పరిశీలనలో భాగంగా చిరుధాన్యాలతో (మిల్లెట్స్) తయారు చేసిన పౌష్టికాహారాలు, చేతితో నేసిన సాంప్రదాయ వస్త్రాలు, స్వచ్ఛమైన నెయ్యి, వంట నూనెలు మరియు సేంద్రీయ విలువ ఆధారిత ఆహార ఉత్పత్తులను గవర్నర్ పరిశీలించారు. వాటి తయారీ విధానం, నాణ్యత ప్రమాణాలు, మార్కెటింగ్ సౌకర్యాల గురించి మహిళలను అడిగి తెలుసుకున్నారు. మహిళల శ్రమను గుర్తించి, వారిని ఆర్థికంగా ప్రోత్సహించాలనే సత్సంకల్పంతో పలు రకాల ఉత్పత్తులను గవర్నర్ స్వయంగా డబ్బులు చెల్లించి కొనుగోలు చేయడం అక్కడి వారిలో రెట్టింపు ఉత్సాహాన్ని నింపింది.

* అంతర్జాతీయ స్థాయి గుర్తింపు పొందిన వరంగల్ దరీలు

ప్రసిద్ధ వరంగల్ దరీ (చేనేత తివాచీలు) స్టాల్‌ను సందర్శించిన గవర్నర్, నేత కార్మికుల పనితనాన్ని ప్రత్యేకంగా అభినందించారు. ఈ దరీల ప్రత్యేకత, తయారీకి పట్టే సమయం, జాతీయ మరియు అంతర్జాతీయ మార్కెట్లలో వీటికి ఉన్న డిమాండ్‌పై నిర్వాహకులతో ముచ్చటించారు. నేత నాణ్యత అద్భుతంగా ఉందంటూ వరంగల్ దరీలను కూడా కొనుగోలు చేసి మహిళా కళాకారులకు తన మద్దతును ప్రకటించారు.

* మార్కెటింగ్ పెరిగితేనే మహిళలు బలోపేతం..

“మహిళా సంఘాలు తయారు చేస్తున్న వస్తువులకు అద్భుతమైన నాణ్యత ఉంది. వీటికి ప్రభుత్వం అన్ని విధాలా ప్రోత్సాహం అందిస్తోంది. ఇలాంటి స్థానిక ఉత్పత్తులకు విస్తృతమైన మార్కెటింగ్ సదుపాయాలు కల్పిస్తే, మహిళలు ఆర్థికంగా మరింత బలోపేతం అవుతారు,” అని గవర్నర్ ఈ సందర్భంగా అభిప్రాయపడ్డారు.

* ప్రముఖుల సమక్షంలో..

ఈ స్టాళ్ల సందర్శన కార్యక్రమంలో రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్, శాసనమండలి డిప్యూటీ చైర్మన్ డాక్టర్ బండ ప్రకాష్, గవర్నర్ ప్రత్యేక ప్రధాన కార్యదర్శి ఎం. దాన కిషోర్ పాల్గొన్నారు. వీరితో పాటు వరంగల్ జిల్లా కలెక్టర్ డాక్టర్ సత్య శారద, హనుమకొండ జిల్లా కలెక్టర్ చాహత్ బాజ్ పాయి, వరంగల్ పోలీస్ కమిషనర్ శ్వేత మరియు ఇతర జిల్లా ఉన్నతాధికారులు గవర్నర్ వెంట ఉండి స్టాళ్ల వివరాలను వివరించారు.