Ranabali Release Date | రణబలి విడుదల తేదీపై సస్పెన్స్

Published: 11 Aug 2026 • 03:11 PM

ఆకేరు న్యూస్‌, హైద‌రాబాద్ :

విజయ్ దేవరకొండ–రష్మిక మందన్న జంటగా నటిస్తున్న ‘రణబలి’పై విడుదల తేదీ విషయంలో కొత్త చర్చ మొదలైంది. ఈ సినిమాను సెప్టెంబర్ 11, 2026న విడుదల చేయనున్నట్లు మేకర్స్ గతంలో ప్రకటించారు. అయితే తాజాగా ఈ తేదీ మారే అవకాశం ఉందంటూ టాలీవుడ్‌లో ప్రచారం జరుగుతోంది.

కొన్ని తాజా సోషల్ మీడియా చర్చల్లో అక్టోబర్ 30న విడుదల చేసే అవకాశం ఉందని పేర్కొంటున్నారు. అయితే అక్టోబర్ 30 తేదీపై ఇప్పటివరకు అధికారిక ప్రకటన వెలువడలేదు. అందువల్ల ప్రస్తుతం సెప్టెంబర్ 11నే అధికారిక విడుదల తేదీగా పరిగణించాలి. తుది నిర్ణయాన్ని మేకర్స్ అధికారికంగా ప్రకటించిన తర్వాతే విడుదల తేదీపై స్పష్టత రానుంది. రాహుల్ సంకృత్యాన్ దర్శకత్వం వహిస్తున్న ఈ చిత్రంపై భారీ అంచనాలు ఉన్నాయి.

* ముచ్చటగా మూడోది

రష్మిక మందన్న, విజయ్ దేవరకొండ జోడీకి టాలీవుడ్‌లో ప్రత్యేకమైన క్రేజ్ ఉంది. వీరిద్దరూ తొలిసారి ‘గీత గోవిందం’ చిత్రంలో కలిసి నటించగా, ఈ సినిమా ఘన విజయం సాధించింది. ఆ తర్వాత ‘డియర్ కామ్రేడ్’ లో మరోసారి జంటగా కనిపించారు. ఈ రెండు చిత్రాల్లోనూ వీరి కెమిస్ట్రీ ప్రేక్షకులను ఆకట్టుకుంది. ఇప్పుడు మరోసారి వీరిద్దరూ కలిసి నటిస్తున్న చిత్రంపై అభిమానుల్లో భారీ అంచనాలు నెలకొన్నాయి. ఈ కాంబినేషన్‌కు ఉన్న క్రేజ్‌తో కొత్త సినిమా కూడా ప్రేక్షకుల్లో ఆసక్తిని పెంచుతోంది.