Husnabad BRS Protest
* హుస్నాబాద్ అంబేద్కర్ చౌరస్తాలో భారీ ధర్నా
ఆకేరు న్యూస్, హుస్నాబాద్ :
రాష్ట్రంలోని నిరుపేద కుటుంబాల ఆడబిడ్డల పెళ్లిళ్లకు ఆర్థిక ఆసరాగా నిలిచిన కళ్యాణలక్ష్మి, షాదీముబారక్ పథకాలను ఎలాంటి ఆంక్షలు లేకుండా యథావిధిగా కొనసాగించాలని డిమాండ్ చేస్తూ హుస్నాబాద్ లో భారత్ రాష్ట్ర సమితి (బీఆర్ఎస్) ఆధ్వర్యంలో ఉద్రిక్త వాతావరణంలో భారీ నిరసన కార్యక్రమం జరిగింది.
* హుస్నాబాద్ లో రాస్తారోకో స్తంభించిన రవాణా
పట్టణంలోని ప్రధాన కూడలి అయిన అంబేద్కర్ చౌరస్తాలో హుస్నాబాద్ మాజీ ఎమ్మెల్యే వొడితల సతీష్కుమార్ ప్రత్యక్ష నాయకత్వంలో సోమవారం ధర్నా మరియు రాస్తారోకో చేపట్టారు. నియోజకవర్గంలోని వివిధ మండలాల నుంచి బీఆర్ఎస్ నాయకులు, ప్రజాప్రతినిధులు, కార్యకర్తలు మరియు పెద్ద ఎత్తున మహిళలు ఈ ఆందోళనలో పాల్గొన్నారు. అంబేద్కర్ చౌరస్తాలో నాయకులు రహదారిపై బైఠాయించడంతో సిద్దిపేట-కరీంనగర్ మార్గంలో రవాణా పూర్తిగా నిలిచిపోయి తీవ్ర ట్రాఫిక్ జామ్ ఏర్పడింది. కాంగ్రెస్ ప్రభుత్వానికి వ్యతిరేకంగా శ్రేణులు చేసిన నినాదాలతో హుస్నాబాద్ హోరెత్తింది.
* పేదింటి ఆడబిడ్డలకు కేసీఆర్ ఇచ్చిన కొండంత అండ
ఈ సందర్భంగా ధర్నాను ఉద్దేశించి వొడితల సతీష్కుమార్ మాట్లాడుతూ.. తెలంగాణ ఏర్పడిన తర్వాత నాటి ముఖ్యమంత్రి కేసీఆర్ గ్రామీణ ప్రాంతాల్లో పేద తల్లిదండ్రులు ఆడపిల్లల పెళ్లిళ్ల కోసం పడే వేదనను గుర్తించి కళ్యాణలక్ష్మి, షాదీముబారక్ పథకాలను ప్రవేశపెట్టారని గుర్తుచేశారు. ప్రారంభంలో రూ. 51,000గా ఉన్న ఆర్థిక సాయాన్ని తదనంతర కాలంలో రూ. 1,00,116లకు పెంచి వేలాది కుటుంబాలకు కొండంత అండగా నిలిచారని తెలిపారు. ఈ పథకం ద్వారా కులమతాలకు అతీతంగా లక్షలాది మంది పేదింటి ఆడపిల్లల వివాహాలు గౌరవప్రదంగా జరిగాయని, పేద కుటుంబాలు అప్పులపాలు కాకుండా కాపాడిన ఘనత కేసీఆర్కే దక్కుతుందని కొనియాడారు.
* కాంగ్రెస్ పాలన అంటే ‘కోతలు.. ఎగవేతలు.. కూల్చివేతలు’
ప్రస్తుత కాంగ్రెస్ ప్రభుత్వంపై సతీష్కుమార్ విమర్శనాస్త్రాలు సంధించారు. కాంగ్రెస్ పార్టీ అధికారంలోకి వస్తే కళ్యాణలక్ష్మితో పాటు తులం బంగారం ఉచితంగా ఇస్తామని హామీ ఇచ్చి, ఇప్పుడు ఉన్న పథకానికే ఎసరు పెట్టేలా వ్యవహరిస్తోందని మండిపడ్డారు. సాంకేతిక నెపాలు, నిబంధనల పేరుతో ఈ పథకంపై ఆంక్షలు విధించి లబ్ధిదారులకు ఎగనామం పెట్టే కుట్రలు జరుగుతున్నాయని ఆరోపించారు. ఇప్పటికే ఫీజు రీయింబర్స్మెంట్ నిధులు విడుదల చేయకపోవడంతో విద్యార్థులు, కళాశాల యాజమాన్యాలు రోడ్డెక్కాల్సిన పరిస్థితి వచ్చిందని, ఇప్పుడు పేదల పెళ్లిళ్లకు ఇచ్చే సాయంపై కోతలు విధించడం దారుణమన్నారు. ప్రస్తుత కాంగ్రెస్ పాలన కోతలు, ఎగవేతలు, కూల్చివేతలుగా మారిందని తీవ్ర స్థాయిలో ఎద్దేవా చేశారు.
* పథకాలు కొనసాగించే వరకు బీఆర్ఎస్ పోరాటం
పేదల సంక్షేమ పథకాలను నిర్వీర్యం చేసే ప్రయత్నాలను బీఆర్ఎస్ ఊరుకోదని సతీష్కుమార్ స్పష్టం చేశారు. కళ్యాణలక్ష్మి, షాదీముబారక్లతో పాటు రైతులకు ఎంతో మేలు చేసే రైతు బంధు, రైతు బీమా పథకాలను ఎలాంటి కోతలు లేకుండా యథావిధిగా అమలు చేయాలని డిమాండ్ చేశారు. కాంగ్రెస్ ప్రభుత్వం ప్రజలకు ఇచ్చిన ఆరు గ్యారెంటీలను, బేషరతు హామీలను తక్షణమే నెరవేర్చాలని, లేని పక్షంలో ప్రజా క్షేత్రంలో పోరాటాలను మరింత ఉధృతం చేస్తామని హెచ్చరించారు. ఈ కార్యక్రమంలో బీఆర్ఎస్ నియోజకవర్గ స్థాయి ముఖ్య నాయకులు, మున్సిపల్ ప్రజాప్రతినిధులు, మండలాల పార్టీ అధ్యక్షులు మరియు పెద్ద ఎత్తున కార్యకర్తలు పాల్గొన్నారు.
About the Author
Please tell us what is wrong. Your report will be sent to the website team.
