Hanuman Ansh | విరుష్క దంపతులు.. మా సినిమా చూడాలి

Published: 03 Sep 2026 • 04:41 PM

ఆకేరు న్యూస్, హైదరాబాద్: తక్కువ బడ్జెట్‌తో తెరకెక్కిన ‘హనుమాన్ అంష్’ సినిమా విజయం కేవలం బాక్సాఫీస్ వసూళ్లకే పరిమితం కాలేదు. ఈ చిత్రాన్ని చూసిన పలువురు వివిధ రంగాలకు చెందిన ప్రముఖులు తమ అభిప్రాయాలను పంచుకుంటున్నారు. వారిలో మాజీ క్రికెటర్ వీరేంద్ర సెహ్వాగ్ స్పందన మాత్రం ఈ సినిమా దర్శకుడు, రచయిత డా. విశాల్ చతుర్వేదికి ప్రత్యేకంగా అనిపించింది. సెహ్వాగ్ తన కుమారుడితో కలిసి ఈ సినిమాను చూసి, అనంతరం సోషల్ మీడియాలో తన అభిప్రాయాన్ని పంచుకున్నారు. ఈ విషయం చతుర్వేదిని ఎంతగానో భావోద్వేగానికి గురిచేసింది.

* సెహ్వాగ్ రిటైర్ అయిన రోజు నుంచి

సెహ్వాగ్ స్పందన గురించి డా. విశాల్ చతుర్వేది ఒక చానల్తో మాట్లాడుతూ.. ‘‘నాకు చిన్నప్పటి నుంచే క్రికెట్ అంటే చాలా ఇష్టం. వీరేంద్ర సెహ్వాగ్ రిటైర్ అయిన రోజు నుంచి నేను క్రికెట్ చూడటం మానేశాను. అలాంటి వ్యక్తి.. మేము ఆయనను సినిమా చూడమని అడగకుండానే, తన కుమారుడితో కలిసి స్వయంగా వచ్చి మా సినిమాను చూశారు’’ అని చెప్పారు. ‘‘సినిమా చూసిన తర్వాత ఆయన రాసిన, చెప్పిన మాటలు నా జీవితంలో ఒక వృత్తం పూర్తయినట్లుగా అనిపించాయి. నేను చిన్నప్పటి నుంచి క్రికెట్‌కు వీరాభిమానిని. ఆయన చేసిన పని నా మనసును ఎంతో హత్తుకుంది. అది నాకు చెప్పలేనంత ఆనందాన్ని ఇచ్చింది’’ అని అన్నారు.

* వారు సినిమా చూడాలన్నదే కోరిక

ఇప్పుడు భారత క్రికెట్‌లో మరో ప్రముఖుడు విరాట్ కోహ్లీ కూడా ‘హనుమాన్ అంష్’ను చూడాలని చతుర్వేది కోరుకుంటున్నారు. తన కోరికను వెల్లడిస్తూ.. ‘‘విరాట్, అనుష్క కూడా ఈ సినిమాను చూడాలని నేను కోరుకుంటున్నాను. అందుకు ఏదైనా అవకాశం ఏర్పడితే చాలా సంతోషిస్తాను’’ అని ఆయన అన్నారు.