Chandrababu Naidu | తిరుమలలో సీఎం చంద్రబాబు పర్యటన

Published: 15 Sep 2026 • 10:14 AM

* తిరుమల శ్రీవారికి పట్టువస్త్రాలు సమర్పించనున్న సీఎం
* పలు అభివృద్ధి కార్యక్రమాలకు శ్రీకారం

ఆకేరు న్యూస్, తిరుపతి : ఆంధ్రప్రదేశ్ ముఖ్యమంత్రి చంద్రబాబు నాయుడు నేడు, రేపు తిరుపతి, తిరుమలలో పర్యటించనున్నారు. రెండు రోజుల పర్యటనలో భాగంగా పలు ఆధ్యాత్మిక కార్యక్రమాలతో పాటు తిరుమలలో పలు అభివృద్ధి కార్యక్రమాలను ప్రారంభించనున్నారు. సీఎం పర్యటన నేపథ్యంలో అధికారులు పకడ్బందీ ఏర్పాట్లు చేశారు. భద్రతా పరంగా ఎలాంటి లోపాలు తలెత్తకుండా పోలీసులు ప్రత్యేక చర్యలు చేపట్టారు.

చంద్రబాబు నేడు సాయంత్రం తిరుపతికి చేరుకోనున్నారు. అనంతరం తిరుమలకు వెళ్లి శ్రీవారిని దర్శించుకోనున్నారు. తిరుమల శ్రీవారికి ప్రభుత్వం తరఫున పట్టువస్త్రాలు సమర్పించనున్నారు. అలాగే బేడి ఆంజనేయస్వామిని కూడా సీఎం దర్శించుకోనున్నారు. పూజా కార్యక్రమాల్లో పాల్గొన్న అనంతరం తిరుమలలోనే రాత్రి బస చేయనున్నారు.

* రేపు పలు అభివృద్ధి కార్యక్రమాల ప్రారంభం..

చంద్రబాబు రేపు తిరుమలలో పలు కీలక కార్యక్రమాల్లో పాల్గొననున్నారు. యాత్రికుల సౌకర్యాలను మరింత మెరుగుపరిచే ఉద్దేశంతో ఏర్పాటు చేసిన పిలిగ్రిమ్ ఎక్స్‌పీరియన్స్ సెంటర్‌ను సీఎం ప్రారంభించనున్నారు. భక్తులకు తిరుమల యాత్రను మరింత సౌకర్యవంతంగా, సమాచారంతో కూడిన అనుభవంగా మార్చేందుకు ఈ కేంద్రం ఉపయోగపడనుంది. అలాగే గోగర్భం డ్యామ్ సర్కిల్ సమీపంలో ఎలక్ట్రిక్ బస్సులకు చంద్రబాబు జెండా ఊపి ప్రారంభించనున్నారు.

*పర్యావరణ పరిరక్షణకు ప్రాధాన్యం..

తిరుమలలో ఎలక్ట్రిక్ వాహనాల వినియోగాన్ని పెంచే దిశగా ఈ కార్యక్రమం చేపట్టనున్నారు. అనంతరం ఎస్వీ మ్యూజియంను కూడా సీఎం చంద్రబాబు ప్రారంభించనున్నారు. తిరుమల చరిత్ర, ఆధ్యాత్మిక వైభవం, కళలు, సంస్కృతికి సంబంధించిన అంశాలను సందర్శకులకు మరింత చేరువ చేసేలా మ్యూజియం అభివృద్ధి చేసినట్లు అధికారులు తెలిపారు.

*అధికారులతో సీఎం సమీక్ష..

రేపు తిరుమలలో అధికారులతో చంద్రబాబు ప్రత్యేక సమావేశం నిర్వహించనున్నారు. తిరుమలలో కొనసాగుతున్న అభివృద్ధి పనులు, భక్తులకు అందుతున్న సౌకర్యాలు, మౌలిక వసతులు, పారిశుధ్యం, రవాణా తదితర అంశాలపై అధికారులతో సమీక్షించే అవకాశం ఉంది. భక్తులకు ఎలాంటి ఇబ్బందులు లేకుండా తీసుకుంటున్న చర్యలపై కూడా సీఎం అధికారుల నుంచి వివరాలు తెలుసుకోనున్నారు.

*పకడ్బందీ భద్రతా ఏర్పాట్లు..

ముఖ్యమంత్రి పర్యటన నేపథ్యంలో తిరుపతి, తిరుమలలో పోలీసులు భారీ భద్రతా ఏర్పాట్లు చేశారు. సీఎం వెళ్లే మార్గాల్లో భద్రతను కట్టుదిట్టం చేయడంతో పాటు, కార్యక్రమాల ప్రదేశాల్లో ప్రత్యేక బందోబస్తు ఏర్పాటు చేశారు. ట్రాఫిక్‌కు అంతరాయం కలగకుండా అవసరమైన చర్యలు చేపట్టారు. రెండు రోజుల పర్యటన ముగించుకుని చంద్రబాబు రేపు మధ్యాహ్నం తిరుమల నుంచి ఉండవల్లికి తిరుగు ప్రయాణం కానున్నారు.