Telangana Assembly Today
* 22A, ఎల్నినోపై స్వల్పకాలిక చర్చ..
* సీఎం రేవంత్ కీలక ప్రకటన
ఆకేరు న్యూస్, హైదరాబాద్: మూడు రోజుల విరామం అనంతరం తెలంగాణ అసెంబ్లీ సమావేశాలు నేడు తిరిగి ప్రారంభం కానున్నాయి. ప్రస్తుత అసెంబ్లీ సమావేశాలకు నేటితో ముగింపు పలకనున్నారు. చివరి రోజు సభలో పలు కీలక అంశాలపై చర్చ జరగనుంది.
ప్రధానంగా 22A నోటిఫికేషన్, భూముల రిజిస్ట్రేషన్లకు ఎదురవుతున్న ఇబ్బందులపై అసెంబ్లీలో స్వల్పకాలిక చర్చ చేపట్టనున్నారు. 22A అంశంపై ముఖ్యమంత్రి రేవంత్రెడ్డి సభలో ప్రకటన చేయనున్నారు. ఈ వ్యవహారంలో ప్రభుత్వం తీసుకుంటున్న చర్యలు, భూ సమస్యల పరిష్కారానికి చేపట్టిన చర్యలను సీఎం వివరించే అవకాశం ఉంది.
అదేవిధంగా ధరణి వ్యవస్థలో జరిగిన అక్రమాలు, భూ లావాదేవీలకు సంబంధించిన అంశాలు కూడా చర్చకు వచ్చే అవకాశం ఉంది. అక్రమాలపై విచారణకు ఆదేశించే అంశంపైనా సభలో స్పష్టత వచ్చే అవకాశముంది. భూముల రిజిస్ట్రేషన్ల సమయంలో ప్రజలు ఎదుర్కొంటున్న సమస్యలు, 22A పరిధిలో ఉన్న భూముల కారణంగా ఏర్పడుతున్న ఇబ్బందులపై సభ్యులు ప్రస్తావించనున్నారు.
మరోవైపు ఎల్నినో ప్రభావంపై కూడా అసెంబ్లీలో స్వల్పకాలిక చర్చ జరగనుంది. ఎల్నినో ప్రభావాలతో వాతావరణ పరిస్థితుల్లో మార్పులు, వర్షపాతం తగ్గే అవకాశం, వ్యవసాయ రంగంపై పడే ప్రభావాలపై చర్చించనున్నారు. కరవు పరిస్థితులు, నీటి కొరత, సాగునీటి లభ్యత, రైతులు ఎదుర్కొనే సమస్యలు వంటి అంశాలు కూడా సభలో ప్రస్తావనకు వచ్చే అవకాశం ఉంది.
ఎల్నినో ప్రభావాలను ఎదుర్కొనేందుకు ప్రభుత్వం తీసుకోవాల్సిన నివారణ చర్యలు, ముందస్తు ప్రణాళికలు ఏంటి అనే అంశంపైనా సభ్యులు చర్చించనున్నారు. ముఖ్యంగా తాగునీరు, సాగునీరు, వ్యవసాయ రంగానికి అవసరమైన ఏర్పాట్లపై ప్రభుత్వం దృష్టి సారించాల్సిన అవసరాన్ని సభ్యులు ప్రస్తావించే అవకాశం ఉంది.
మూడు రోజుల విరామం తర్వాత జరుగుతున్న చివరి రోజు సమావేశాల్లో 22A, ధరణి, భూ రిజిస్ట్రేషన్లు, ఎల్నినో, కరవు, నీటి కొరత, వ్యవసాయం వంటి అంశాలు ప్రధానంగా చర్చకు రానుండటంతో అసెంబ్లీ సమావేశాలపై ఆసక్తి నెలకొంది.
About the Author
Please tell us what is wrong. Your report will be sent to the website team.
