Danam Nagender | సుప్రీంకోర్టులో ఊహించని షాక్..

Published: 24 Sep 2026 • 12:39 PM

* హైకోర్టు తీర్పు డిస్మిస్
* ఖైరతాబాద్‌లో ఉప ఎన్నిక ఖాయమా?

ఆకేరు న్యూస్, హైదరాబాద్ : తెలంగాణ రాజకీయాల్లో అత్యంత సంచలనం సృష్టించిన ఖైరతాబాద్ ఎమ్మెల్యే దానం నాగేందర్ అనర్హత వ్యవహారంలో సుప్రీంకోర్టు స్పష్టమైన తీర్పు వెలువరించింది. దానం నాగేందర్ దాఖలు చేసిన పిటిషన్‌ను అత్యున్నత ధర్మాసనం కొట్టివేసింది. తెలంగాణ హైకోర్టు ఇచ్చిన అనర్హత తీర్పును సర్వోన్నత న్యాయస్థానం సమర్థించడంతో పాటు, ఆయన పిటిషన్‌ను అధికారికంగా డిస్మిస్ చేసింది. ఈ పరిణామంతో ఖైరతాబాద్ నియోజకవర్గానికి ఉపఎన్నిక నిర్వహించడం అనివార్యమైంది.

* హైకోర్టు ఏమని తీర్పునిచ్చింది

2023 శాసనసభ ఎన్నికల్లోభారత రాష్ట్ర సమితి (BRS) తరఫున ఖైరతాబాద్ స్థానం నుంచి విజయం సాధించిన దానం నాగేందర్, ఆ తర్వాత మారిన రాజకీయ పరిణామాల నేపథ్యంలో కాంగ్రెస్ పార్టీలో చేరారు. అంతేకాకుండా 2024 లోక్‌సభ ఎన్నికల్లో సికింద్రాబాద్ పార్లమెంటు స్థానం నుంచి కాంగ్రెస్ అభ్యిర్థిగా పోటీ చేశారు.

దీనిని సవాల్ చేస్తూ బీజేపీఎల్పీ నేత ఏలేటి మహేశ్వర్ రెడ్డి, బీఆర్ఎస్ ఎమ్మెల్యే పాడి కౌశిక్ రెడ్డి తెలంగాణ హైకోర్టులో పిటిషన్లు దాఖలు చేశారు. ఈ పిటిషన్లపై విచారణ జరిపిన హైకోర్టు దానం నాగేందర్‌పై అనర్హత వేటు వేస్తూ సంచలన తీర్పు వెలువరించింది. ఆయన లోక్‌సభ ఎన్నికల కోసం నామినేషన్ దాఖలు చేసిన ఏప్రిల్ 23, 2024 నాటి నుంచే ఈ అనర్హత వర్తిస్తుందని స్పష్టం చేసింది. అసెంబ్లీ స్పీకర్ గతంలో కొట్టివేసిన అనర్హత పిటిషన్లను హైకోర్టు తప్పుబడుతూ, ఖైరతాబాద్ సీటు ఖాళీ అయినట్లు ప్రకటించింది.

* ఎందుకు ఆశ్రయించాల్సి వచ్చింది..

తెలంగాణ హైకోర్టు తన సభ్యత్వాన్ని రద్దు చేస్తూ ఇచ్చిన తీర్పును సవాలు చేస్తూ దానం నాగేందర్ సుప్రీంకోర్టును ఆశ్రయించారు. తాను అధికారికంగా బీఆర్‌ఎస్‌ ప్రాథమిక సభ్యత్వానికి రాజీనామా చేయలేదని, తనపై అనర్హత వేటు వేయడం నిబంధనలకు విరుద్ధమని ఆయన తన ప్రత్యేక ఎస్ఎల్పీ (స్పెషల్ లీవ్ పిటిషన్) లో వాదించారు. హైకోర్టు ఇచ్చిన తీర్పుపై స్టే విధించాలని, తద్వారా తన ఎమ్మెల్యే పదవిని కాపాడుకోవాలని ఆయన సీనియర్ న్యాయవాదుల ద్వారా సుప్రీంకోర్టును కోరారు.

*సుప్రీంకోర్టులో విచారణ

ఈ పిటిషన్‌పై విచారణ జరిపిన ప్రధాన ధర్మాసనం ఇరువర్గాల వాదనలను గమనించింది. దానం నాగేందర్ తరఫున ప్రముఖ న్యాయవాది వాదనలు వినిపించగా, ప్రతివాదుల తరఫున కేవియట్ పిటిషన్లు దాఖలయ్యాయి. అన్ని అంశాలను పరిశీలించిన సుప్రీంకోర్టు, ఒక పార్టీ తరఫున గెలిచి మరో పార్టీ తరఫున ప్రత్యక్ష ఎన్నికల్లో పోటీ చేయడం అనేది స్వచ్ఛందంగా పార్టీ మారిన కిందకే వస్తుందని తేల్చిచెప్పింది.

హైకోర్టు ఇచ్చిన తీర్పులో ఎలాంటి తప్పులేదని స్పష్టం చేస్తూ, దానం నాగేందర్ దాఖలు చేసిన పిటిషన్‌ను కోర్టు డిస్మిస్ చేసింది. అనర్హత ఖాయమని తేలిపోయినందున మళ్లీ ఎన్నికలకు సిద్ధం కావాలని స్పష్టం చేసింది.

* ఖైరతాబాద్‌లో ఉప ఎన్నిక ఖాయమా

సుప్రీంకోర్టు కూడా పిటిషన్‌ను డిస్మిస్ చేయడంతో ఖైరతాబాద్ శాసనసభ స్థానానికి ఉపఎన్నిక జరగడం ప్రస్తుతం లాంఛనప్రాయంగా మారింది. హైకోర్టు ఇచ్చిన తీర్పును సుప్రీంకోర్టు సమర్థించడంతో ఎన్నికల కమిషన్ త్వరలోనే ఈ స్థానానికి ఉపఎన్నిక షెడ్యూల్ విడుదల చేసే అవకాశం ఉంది. ఈ తీర్పు తెలంగాణ రాజకీయాల్లో పార్టీ మారిన ఇతర ఎమ్మెల్యేల విషయంలోనూ తీవ్ర ప్రభావం చూపే అవకాశం ఉందని రాజకీయ విశ్లేషకులు భావిస్తున్నారు.