Rudraksha Ganesh Hyderabad | రుద్రాక్ష గ‌ణ‌ప‌తిం భ‌జే!

Published: 24 Sep 2026 • 07:06 PM

* 25,340 రుద్రాక్షలతో విశేష గణేశ విగ్రహం

వినాయక చవితి వేడుకలంటేనే కళల సమ్మేళనం, భక్తి పారవశ్యం. హైద‌రాబాద్ నగరంలోని ప్ర‌తీ గ‌ల్లీ కొద్దిరోజులుగా గ‌ణ‌ప‌తి నామస్మరణతో మార్మోగుతోంది. ఈ పండుగ వాతావరణాన్ని మరింత ఆధ్యాత్మికం చేస్తూ, నగరవాసులను సంభ్రమాశ్చర్యాలకు గురిచేసే ఒక అద్భుత శిల్పకళా ఖండం ఉప్పల్‌లో కొలువుదీరింది. ఉప్పల్‌లోని ప్రసిద్ధ డీఎస్‌ఎల్‌ వర్చు మాల్ లో ఏర్పాటు చేసిన ‘రుద్రాక్ష గణేశుడు’ ప్రత్యేక ఆకర్షణగా ఆక‌ట్టుకుంటున్నాడు.

* 25,340 పవిత్ర రుద్రాక్షలు

సాధారణంగా మట్టి, ప్లాస్టర్ ఆఫ్ పారిస్ లేదా విభిన్న రకాల వస్తువులతో విగ్రహాలను తయారు చేయడం చూస్తుంటాం. కానీ, ఇక్కడ కళాకారులు చూపిన సృజనాత్మకత అనన్యసామాన్యం. ఏకంగా 25,340 అసలైన, పవిత్రమైన రుద్రాక్షలను ఉపయోగించి ఈ మహాగణపతి విగ్రహాన్ని రూపుదిద్దారు. కేవలం వస్తువులను అమర్చడం కాకుండా, ఒక్కో రుద్రాక్షను అత్యంత సూక్ష్మంగా, పకడ్బందీగా అమర్చడానికి కళాకారులు దాదాపు తొమ్మిది రోజుల పాటు శ్రమించారు.

* దైవికత ఉట్టిపడే రూపం

శివునికి అత్యంత ప్రీతిపాత్రమైన రుద్రాక్షలతో సాక్షాత్తు ఆ శివపుత్రుడైన గణేశుడిని మలచడం ఇక్కడ ప్రధాన విశేషం. విగ్రహాన్ని దగ్గరికెళ్లి చూస్తే.. ఆ కళాకారుల సహనం, నైపుణ్యం, అంకితభావం స్పష్టంగా కనిపిస్తాయి. గణేశుడి తొండం, చెవులు, కిరీటం, శరీరాకృతి వంటి ప్రతి సూక్ష్మ వివరమూ చెక్కుచెదరకుండా రుద్రాక్షలతోనే అత్యంత రమణీయంగా తీర్చిదిద్దారు. రుద్రాక్షల సహజమైన ముదురు గోధుమ రంగు, వాటిపై ఉన్న రేఖలు గణనాథుని రూపానికి మరింత దివ్యత్వాన్ని, జీవకళను తెచ్చిపెట్టాయి.

* సృజనాత్మకతంగా..

భారతీయ సనాతన సంప్రదాయంలో రుద్రాక్షలకు ఆధ్యాత్మికంగా ఎంతో ప్రాముఖ్యత ఉంది. అలాంటి పవిత్రమైన రుద్రాక్షలను ఆధునిక కాలానికి తగినట్లుగా సృజనాత్మకంగా మ‌లిచారు. సంప్రదాయ భక్తిభావాన్ని, సమకాలీన శిల్పకళా నైపుణ్యాన్ని ఈ విగ్రహం అద్భుతంగా కళ్లకు కడుతోంది. ఈ అరుదైన రుద్రాక్ష గణేశుడిని కనులారా వీక్షించేందుకు చుట్టుపక్కల ప్రాంతాల నుంచే కాక, నగరంలోని వివిధ ప్రాంతాల నుంచి కూడా భారీ సంఖ్యలో భక్తులు, సందర్శకులు డీఎస్‌ఎల్‌ వర్చు మాల్‌కు తరలివస్తున్నారు.

* సెల్ఫీలు.. ఫొటోలు

విగ్రహం ముందు నిలబడి సెల్ఫీలు దిగేందుకు, ఆ అద్భుత శిల్ప సౌందర్యాన్ని కెమెరాల్లో బంధించేందుకు పోటీ పడుతున్నారు. వినాయక చవితి వేడుకల్లో భక్తికి, కళా నైపుణ్యానికి ప్రతీకగా నిలిచిన ఈ రుద్రాక్ష గణేషుని దర్శనం ప్రతి ఒక్కరికీ ఒక మరువలేని ఆధ్యాత్మిక అనుభూతిని పంచుతోంది. ఈ ఉత్సవాల కాలంలో మీరు కూడా ఉప్పల్ వెళ్తే.. డీఎస్‌ఎల్‌ వర్చు మాల్‌లోని ఈ అపురూప గణనాథుని దర్శనాన్ని అస్సలు మిస్ కావద్దు!