Ind U19 vs Pak U19 | U19 ఆసియా కప్‌లో భారత్‌కు షాక్..

Published: 08 Nov 2026 • 06:59 PM

* సెంచరీతో పాక్‌ను గెలిపించిన హంజా జహూర్!

* అర్జున్ రాజ్‌పుత్ సెంచరీ వృథా

ఆకేరు న్యూస్, స్పోర్ట్స్: అండర్-19 ఆసియా కప్‌లో భారత్‌కు మరోసారి నిరాశ ఎదురైంది. పాకిస్థాన్‌తో జరిగిన ఉత్కంఠభరిత పోరులో టీమిండియా ఓటమి పాలైంది. తొలుత బ్యాటింగ్ చేసిన భారత యువ జట్టు 208 పరుగులకు ఆలౌటైంది. అర్జున్ రాజ్‌పుత్ (107) అద్భుత సెంచరీతో రాణించినప్పటికీ జట్టుకు విజయాన్ని అందించలేకపోయాడు. 209 పరుగుల లక్ష్యంతో బరిలోకి దిగిన పాకిస్థాన్ ఒక దశలో 61 పరుగులకే ఐదు వికెట్లు కోల్పోయింది. అయితే హంజా జహూర్ అజేయ సెంచరీతో జట్టును విజయతీరాలకు చేర్చాడు.

* 61 పరుగులకే ఐదు వికెట్లు

ఒమన్‌లోని అల్ అమరత్ క్రికెట్ గ్రౌండ్‌లో జరిగిన ఈ మ్యాచ్‌లో టాస్ గెలిచిన భారత్ తొలుత బ్యాటింగ్ ఎంచుకుంది. అర్జున్ రాజ్‌పుత్ 107 పరుగులతో సెంచరీ సాధించడంతో టీమిండియా 46.3 ఓవర్లలో 208 పరుగులు చేసింది. అనంతరం 209 పరుగుల లక్ష్యంతో బరిలోకి దిగిన పాకిస్థాన్‌కు భారత బౌలర్లు ఆరంభంలోనే షాకిచ్చారు. జహంగీర్ బిలాల్, ఉస్మాన్ ఖాన్, అబ్దుల్ ఖాదిర్, అహ్మద్ హుస్సేన్, కెప్టెన్ ఫర్హాన్ యూసఫ్ తక్కువ పరుగులకే పెవిలియన్ చేరారు. దీంతో పాకిస్థాన్ 61 పరుగులకే ఐదు వికెట్లు కోల్పోయి కష్టాల్లో పడింది.

* హంజా, అబ్బాస్ కీలక భాగస్వామ్యం

ఈ సమయంలో హంజా జహూర్, హస్నైన్ అబ్బాస్ డార్ బాధ్యతాయుతంగా బ్యాటింగ్ చేశారు. భారత బౌలర్లను సమర్థంగా ఎదుర్కొంటూ పరుగులు సాధించారు. ఆరో వికెట్‌కు 107 పరుగుల కీలక భాగస్వామ్యాన్ని నెలకొల్పి పాకిస్థాన్‌ను తిరిగి పోటీలోకి తీసుకొచ్చారు. అబ్బాస్ 67 బంతుల్లో 38 పరుగులు చేసి మనాల్ చౌహాన్ బౌలింగ్‌లో ఔటయ్యాడు. అయితే మరోవైపు హంజా మాత్రం క్రీజులో నిలిచి జట్టును విజయానికి చేరువ చేశాడు.

* అన్వయ్ ద్రవిడ్ అద్భుత క్యాచ్

పాకిస్థాన్ విజయానికి చేరువవుతున్న సమయంలో భారత్‌కు ఏడో వికెట్ దక్కింది. మహమ్మద్ సయ్యమ్‌ను ఔట్ చేయడంలో వికెట్ కీపర్ అన్వయ్ ద్రవిడ్ కీలక పాత్ర పోషించాడు. మోహిత్ ఉల్వా వేసిన 42.5వ ఓవర్‌లో సయ్యమ్ బ్యాట్‌కు తగిలి వచ్చిన బంతిని అన్వయ్ ఒంటి చేత్తో అద్భుతంగా అందుకున్నాడు. దీంతో 183 పరుగుల వద్ద పాకిస్థాన్ ఏడో వికెట్ కోల్పోయింది. ఈ క్యాచ్‌తో భారత శిబిరంలో మళ్లీ గెలుపుపై ఆశలు చిగురించాయి. అయినప్పటికీ హంజా జహూర్‌ను మాత్రం భారత బౌలర్లు నిలువరించలేకపోయారు.

* సెంచరీతో పాకిస్థాన్‌కు విజయాన్ని అందించిన హంజా

చివరి ఓవర్లలో హంజా జహూర్ దూకుడుగా ఆడాడు. వరుస బౌండరీలతో లక్ష్యాన్ని క్రమంగా తగ్గించాడు. చివరకు విజయానికి అవసరమైన పరుగులను బౌండరీతో పూర్తి చేసి పాకిస్థాన్‌కు విజయాన్ని అందించాడు. ఈ క్రమంలోనే తన సెంచరీని కూడా పూర్తి చేసుకున్నాడు. హంజా 107 బంతుల్లో అజేయంగా 100 పరుగులు సాధించాడు.

ఒక దశలో 61 పరుగులకే ఐదు వికెట్లు కోల్పోయిన పాకిస్థాన్‌ను హంజా తన అద్భుత బ్యాటింగ్‌తో గెలిపించాడు. మరోవైపు అర్జున్ రాజ్‌పుత్ సెంచరీ చేసినా భారత జట్టుకు ఓటమి తప్పలేదు. దీంతో ఈ ఉత్కంఠ పోరులో పాకిస్థాన్ చిరస్మరణీయ విజయాన్ని నమోదు చేసింది.

A tough result for India U19.

Focus now shifts to Tuesday for their next fixture against UAE U19 in the #MensU19AsiaCup.

Scorecard ▶️ https://t.co/WullKDGgH4 https://t.co/Bl5f0KSFHv

— BCCI (@BCCI) November 8, 2026