Eve Teasing
* 507 కేసులు, రూ.2.81 లక్షల జరిమానా
ఆకేరు న్యూస్, గుంటూరు : విద్యార్థినులు, మహిళల భద్రతకు మరింత ప్రాధాన్యతనిస్తూ గుంటూరు జిల్లా పోలీసులు ప్రత్యేక ఎన్ఫోర్స్మెంట్ డ్రైవ్ నిర్వహించారు. గుంటూరు జిల్లా ఎస్పీ వకుల్ జిందాల్, ఐపీఎస్ ఆదేశాల మేరకు సెప్టెంబర్ 25న సాయంత్రం 4 గంటల నుంచి రాత్రి 7 గంటల వరకు జిల్లా వ్యాప్తంగా ఈ ప్రత్యేక తనిఖీలు చేపట్టారు.
స్కూళ్లు, కాలేజీల పరిసరాల్లో ఈవ్ టీజింగ్ వంటి అసాంఘిక చర్యలను అరికట్టడంతో పాటు ట్రాఫిక్ నిబంధనలను కట్టుదిట్టంగా అమలు చేయడం, రోడ్డు ప్రమాదాలను నివారించడం ప్రధాన లక్ష్యంగా పోలీసులు ఈ డ్రైవ్ చేపట్టారు.
ఈ ప్రత్యేక డ్రైవ్లో భాగంగా జిల్లాలోని వివిధ స్కూళ్లు, కాలేజీల పరిసర ప్రాంతాలతో పాటు మహిళలు, విద్యార్థినులు అధికంగా సంచరించే ప్రాంతాలు, ప్రమాదాలకు అవకాశం ఉన్న ప్రాంతాలు, జాతీయ రహదారుల ప్రవేశ, నిష్క్రమణ మార్గాలు తదితర ముఖ్య ప్రాంతాల్లో పోలీసులు విస్తృతంగా తనిఖీలు నిర్వహించారు.
అనుమానాస్పదంగా తిరిగే వ్యక్తులు, ట్రాఫిక్ నిబంధనలు ఉల్లంఘించే వాహనదారులపై ప్రత్యేక దృష్టి సారించారు. ఈ సందర్భంగా నిబంధనలు ఉల్లంఘించిన వాహనదారులపై మొత్తం 507 చలానాలు నమోదు చేసి రూ.2,81,650 జరిమానా విధించారు.
డ్రైవింగ్ సమయంలో ట్రాఫిక్ నిబంధనలు పాటించకపోవడం, ఒక ద్విచక్ర వాహనంపై ముగ్గురు ప్రయాణించడం, మైనర్లు వాహనాలు నడపడం, ప్రమాదకరంగా వాహనాలు నడపడం, హెల్మెట్ ధరించకుండా ద్విచక్ర వాహనాలు నడపడం, రాంగ్ సైడ్లో వాహనాలు నడపడం, డ్రైవింగ్ సమయంలో సెల్ఫోన్ వినియోగించడం, మద్యం సేవించి వాహనాలు నడపడం వంటి ఉల్లంఘనలు ఈ తనిఖీల్లో గుర్తించారు.
ట్రిపుల్ రైడింగ్కు సంబంధించి 48 కేసులు, మైనర్ డ్రైవింగ్కు 14 కేసులు, ప్రమాదకర డ్రైవింగ్కు 4 కేసులు, హెల్మెట్ లేకుండా వాహనాలు నడిపినందుకు 144 కేసులు, రాంగ్ సైడ్ డ్రైవింగ్కు 29 కేసులు, డ్రైవింగ్ సమయంలో సెల్ఫోన్ వినియోగించినందుకు 16 కేసులు, మద్యం సేవించి వాహనం నడిపినందుకు 8 కేసులు నమోదు చేశారు. వీటితో పాటు ఇతర మోటారు వాహన చట్టాల ఉల్లంఘనలకు సంబంధించి మరో 210 కేసులు నమోదు చేసినట్లు పోలీసులు తెలిపారు.
మైనర్లు వాహనాలు నడపకుండా తల్లిదండ్రులు ప్రత్యేక శ్రద్ధ తీసుకోవాలని పోలీసులు సూచించారు. తక్కువ వయసులో వాహనాలు నడపడం వల్ల ప్రమాదాలు జరిగే అవకాశం ఉండటంతో పాటు ప్రాణనష్టం సంభవించే ప్రమాదం ఉందని హెచ్చరించారు.
నిబంధనలు ఉల్లంఘించిన మైనర్లకు, వారి తల్లిదండ్రులకు పోలీసులు కౌన్సెలింగ్ నిర్వహించారు. పిల్లలకు వాహనాలు ఇచ్చే విషయంలో తల్లిదండ్రులు బాధ్యతగా వ్యవహరించాలని సూచించారు.
* రోడ్డు భద్రతపై అవగాహన..
ప్రత్యేక ఎన్ఫోర్స్మెంట్ డ్రైవ్లో కేవలం నిబంధనల ఉల్లంఘనలను గుర్తించి చలానాలు విధించడానికే పరిమితం కాకుండా విద్యార్థులు, ప్రజల్లో రోడ్డు భద్రతపై అవగాహన కల్పించేందుకు కూడా పోలీసులు కార్యక్రమాలు నిర్వహించారు.
స్కూళ్లు, కాలేజీల పరిసరాల్లో ఈవ్ టీజింగ్ను అరికట్టడం, విద్యార్థినులు, మహిళల భద్రతకు తీసుకోవాల్సిన జాగ్రత్తలు, హెల్మెట్ ప్రాధాన్యత, ట్రాఫిక్ నిబంధనల అమలు, మద్యం సేవించి వాహనాలు నడపడం వల్ల కలిగే ప్రమాదాలపై అవగాహన కల్పించారు.
జిల్లా వ్యాప్తంగా నిర్వహించిన ఈ అవగాహన కార్యక్రమాల్లో 150 మంది విద్యార్థులు, 150 మంది సాధారణ ప్రజలకు రోడ్డు భద్రతపై అవగాహన కల్పించినట్లు పోలీసులు తెలిపారు. డ్రైవింగ్ సమయంలో సెల్ఫోన్ వినియోగించకూడదన్నారు.
ద్విచక్ర వాహనాలపై ప్రయాణించే ప్రతి ఒక్కరూ హెల్మెట్ ధరించాలని, వాహనాలను నిర్ణీత వేగ పరిమితుల్లోనే నడపాలని సూచించారు. ముఖ్యంగా యువత ట్రాఫిక్ నిబంధనలను తప్పనిసరిగా పాటించాలని పోలీసులు సూచించారు.
* భద్రతకు ప్రాధాన్యత..
ఈ సందర్భంగా గుంటూరు జిల్లా ఎస్పీ వకుల్ జిందాల్ మాట్లాడుతూ ట్రాఫిక్ నిబంధనలు పాటించడం ప్రతి పౌరుడి బాధ్యత అని అన్నారు. రహదారులపై వాహనాలు నడిపే సమయంలో ప్రతి ఒక్కరూ అప్రమత్తంగా వ్యవహరించాలని సూచించారు.
ద్విచక్ర వాహనదారులు తప్పనిసరిగా హెల్మెట్ ధరించాలని, మద్యం సేవించి వాహనాలు నడపకూడదని తెలిపారు. డ్రైవింగ్ సమయంలో సెల్ఫోన్ వినియోగించడం, నిద్రమత్తులో వాహనాలు నడపడం వంటి చర్యలకు దూరంగా ఉండాలని సూచించారు.
వాహనదారులు చిన్నపాటి నిర్లక్ష్యానికి కూడా పాల్పడకుండా జాగ్రత్తలు తీసుకోవాలని, ట్రాఫిక్ నిబంధనలు పాటించడం ద్వారా రోడ్డు ప్రమాదాలను గణనీయంగా తగ్గించవచ్చని ఎస్పీ పేర్కొన్నారు.
ముఖ్యంగా యువత ట్రాఫిక్ నిబంధనలను ఉల్లంఘిస్తూ ప్రమాదకరంగా వాహనాలు నడపకుండా తల్లిదండ్రులు కూడా పిల్లలపై ప్రత్యేక శ్రద్ధ వహించాలని సూచించారు.
విద్యార్థినులు, మహిళల భద్రతకు అత్యంత ప్రాధాన్యత ఇస్తున్నామని ఎస్పీ తెలిపారు. స్కూళ్లు, కాలేజీల పరిసర ప్రాంతాల్లో ఈవ్ టీజింగ్, మహిళలను వేధించడం, అసాంఘిక కార్యకలాపాలకు పాల్పడటం వంటి చర్యలను ఎట్టి పరిస్థితుల్లోనూ ఉపేక్షించబోమని స్పష్టం చేశారు.
విద్యార్థినులు, మహిళలకు ఇబ్బంది కలిగించే విధంగా ఎవరైనా వ్యవహరిస్తే చట్ట ప్రకారం చర్యలు తీసుకుంటామని హెచ్చరించారు.
స్కూళ్లు, కాలేజీల పరిసర ప్రాంతాల్లో పోలీసుల నిఘాను మరింత పెంచడంతో పాటు అవసరమైన ప్రాంతాల్లో ప్రత్యేక తనిఖీలు నిర్వహిస్తామని పోలీసులు తెలిపారు. విద్యార్థినులు, మహిళలు సురక్షితంగా ప్రయాణించేలా చర్యలు తీసుకుంటామని పేర్కొన్నారు.
మహిళలు, విద్యార్థినులకు ఏదైనా ఇబ్బంది ఎదురైతే వెంటనే పోలీసులకు సమాచారం అందించాలని సూచించారు.
ప్రజల ప్రాణ భద్రతతో పాటు మహిళలు, విద్యార్థినుల రక్షణే లక్ష్యంగా ఇటువంటి ప్రత్యేక ఎన్ఫోర్స్మెంట్ డ్రైవ్లను జిల్లా వ్యాప్తంగా నిరంతరం కొనసాగిస్తామని గుంటూరు జిల్లా పోలీసులు తెలిపారు.
స్కూళ్లు, కాలేజీల పరిసరాల్లో ప్రత్యేక తనిఖీలు నిర్వహిస్తూ ట్రాఫిక్ నిబంధనలు ఉల్లంఘించే వారిపై చట్ట ప్రకారం చర్యలు తీసుకుంటామని స్పష్టం చేశారు.
రోడ్డు భద్రత విషయంలో ప్రజలు కూడా పోలీసులకు సహకరించాలని, నిబంధనలు పాటిస్తూ ప్రమాదాల నివారణకు తమ వంతు బాధ్యతను నిర్వర్తించాలని పోలీసులు కోరారు.
About the Author
Please tell us what is wrong. Your report will be sent to the website team.
