CBSE Three Language Formula | సీబీఎస్‌ఈ విద్యార్థులకు గుడ్ న్యూస్..

Published: 29 Sep 2026 • 05:17 PM

* సుప్రీంకోర్టు తాజా ఆదేశాలివే

ఆకేరు న్యూస్, డెస్క్ : కేంద్ర ప్రభుత్వం నూతనంగా తీసుకువచ్చిన విద్యా విధానంలో భాగంగా సీబీఎస్‌ఈ (సెంట్రల్ బోర్డ్ ఆఫ్ సెకండరీ ఎడ్యుకేషన్) పాఠశాలల్లో అమలు చేస్తున్న ‘త్రిభాషా విధానం’ (Three-Language Formula) పై సుప్రీంకోర్టు కీలక వ్యాఖ్యలు చేసింది. ఏడో తరగతి విద్యార్థులకు ఇప్పటికే ఇచ్చిన మినహాయింపును, ఈ విద్యా సంవత్సరానికి గాను ఆరో తరగతి విద్యార్థులకు కూడా వర్తింపజేసే అవకాశాన్ని పరిశీలించాలని కేంద్ర ప్రభుత్వాన్ని మరియు సీబీఎస్‌ఈని అత్యున్నత న్యాయస్థానం కోరింది.

* గతంలో సీబీఎస్‌ఈ ప్రకటన

దేశవ్యాప్తంగా ఉన్న సీబీఎస్‌ఈ పాఠశాలల్లో త్రిభాషా విధానాన్ని పకడ్బందీగా అమలు చేస్తున్న విషయం తెలిసిందే. అయితే, విద్యార్థులపై ఆకస్మిక భారాన్ని తగ్గించే ఉద్దేశంతో సీబీఎస్‌ఈ ఇదివరకే ఒక కీలక ప్రకటన చేసింది. ప్రస్తుత విద్యా సంవత్సరంలో 7, 8, 9 తరగతులు చదువుతున్న విద్యార్థులు.. భవిష్యత్తులో పదో తరగతికి చేరుకున్నప్పుడు తృతీయ భాషా (మూడో భాష) బోర్డు పరీక్ష రాయాల్సిన అవసరం లేదని సడలింపు ఇచ్చింది.

* సుప్రీంకోర్టు సూచనలివే..

సోమవారం ఈ వ్యవహారంపై జస్టిస్ సూర్యకాంత్, జస్టిస్ జోయ్‌మల్యా బాగ్చీ, జస్టిస్ వి.మోహనలతో కూడిన త్రిసభ్య ధర్మాసనం విచారణ చేపట్టింది. విచారణ సందర్భంగా ధర్మాసనం స్పందిస్తూ.. “ఏడో తరగతి విద్యార్థులకు ఇచ్చినట్లే, ఇప్పుడు ఆరో తరగతి చదువుతున్న విద్యార్థులకు కూడా ఈ ఒక్క ఏడాదికి మినహాయింపు ఎందుకు ఇవ్వకూడదు? ఈ అవకాశాన్ని పరిశీలించండి” అని సూచించింది.

త్రిభాషా విధానాన్ని ఈ ఏడాదికి వాయిదా వేస్తే, దానిని మరింత సమర్థవంతంగా అమలు చేయడానికి పాఠశాలల యాజమాన్యాలకు కూడా తగిన సమయం దొరుకుతుందని, అవసరమైన మౌలిక సదుపాయాలు, ఉపాధ్యాయుల నియామకం లాంటి ఏర్పాట్లు చేసుకుంటాయని ధర్మాసనం అభిప్రాయపడింది.

* మినహాయింపునకు సుముఖంగా లేమన్న కేంద్రం..

ఈ విచారణలో కేంద్ర ప్రభుత్వం తరఫున సొలిసిటర్ జనరల్ తుషార్ మెహతా వాదనలు వినిపించారు. “ఇప్పటికే దేశవ్యాప్తంగా 99 శాతం పాఠశాలలు త్రిభాషా విధానాన్ని స్వీకరించాయి. ప్రస్తుత విద్యా సంవత్సరం నుంచే ఇది పూర్తిస్థాయిలో అమలు కావాల్సి ఉంది. అందువల్ల ఈ దశలో ఎలాంటి అదనపు మినహాయింపులు ఇవ్వడానికి ప్రభుత్వం సుముఖంగా లేదు” అని ఆయన కోర్టుకు స్పష్టం చేశారు.

* నాలుగు వారాల్లో అఫిడవిట్..

ఇరువర్గాల వాదనలు సుదీర్ఘంగా విన్న సుప్రీంకోర్టు.. ఈ వ్యవహారంపై స్పష్టమైన వైఖరిని తెలియజేస్తూ నాలుగు వారాల్లోగా పూర్తి వివరాలతో కూడిన ప్రమాణపత్రం (అఫిడవిట్) దాఖలు చేయాలని సీబీఎస్‌ఈని ఆదేశించింది. అనంతరం తదుపరి విచారణను ఆరు వారాలకు వాయిదా వేసింది. సీబీఎస్‌ఈ దాఖలు చేసే అఫిడవిట్ ఆధారంగా ఆరో తరగతి విద్యార్థులకు ఈ ఏడాది మినహాయింపు దక్కుతుందా లేదా అనేది తేలనుంది.