Northeast Monsoon 2026 | ఈశాన్య రుతుపవనాలు వచ్చేస్తున్నాయ్‌

Published: 02 Oct 2026 • 12:30 PM

* అక్టోబర్ 15–21 మధ్య ప్రవేశం

అకేరు న్యూస్, డెస్క్ : దేశంలో నైరుతి రుతుపవనాల సీజన్ ముగియడంతో ఇప్పుడు ఈశాన్య రుతుపవనాలపై అందరి దృష్టి నెలకొంది. ఈశాన్య రుతుపవనాలు దక్షిణ ద్వీపకల్పంలో అక్టోబర్ 15 నుంచి 21 మధ్య ప్రారంభమయ్యే అవకాశం ఉందని భారత వాతావరణ శాఖ (IMD) అంచనా వేసింది. అక్టోబర్ నుంచి డిసెంబర్ వరకు దక్షిణ ద్వీపకల్పంలో మొత్తంగా సాధారణ స్థాయి వర్షపాతం నమోదయ్యే అవకాశం ఉందని తెలిపింది.

ఈశాన్య రుతుపవనాల ప్రభావంతో తమిళనాడు, పుదుచ్చేరి, కోస్తాంధ్ర, రాయలసీమ, కేరళ, దక్షిణ అంతర్గత కర్ణాటక ప్రాంతాల్లో సాధారణ వర్షపాతం నమోదయ్యే అవకాశాలు ఉన్నట్లు IMD వెల్లడించింది. అయితే ప్రాంతాలవారీగా వర్షపాతంలో గణనీయమైన తేడాలు ఉండవచ్చని పేర్కొంది.

*ఎల్‌నినో ప్రభావం ఉంటుందా?

ప్రస్తుతం పసిఫిక్ మహాసముద్రంలో ఎల్‌నినో పరిస్థితులు కొనసాగుతున్నప్పటికీ.. ఈశాన్య రుతుపవనాలపై దాని ప్రభావం స్పష్టంగా ఉండకపోవచ్చని IMD డైరెక్టర్ జనరల్ మృత్యుంజయ్ మహాపాత్ర తెలిపారు. గత రెండు దశాబ్దాల్లో ఎల్‌నినో, ఈశాన్య రుతుపవనాల మధ్య ఒకే విధమైన సంబంధం కనిపించలేదని ఆయన వివరించారు. ఎల్‌నినో ప్రభావం డిసెంబర్ తర్వాత తగ్గే అవకాశం ఉందని చెప్పారు.

*తమిళనాడుకు సాధారణ వర్షాలు

ఈశాన్య రుతుపవనాల సమయంలో తమిళనాడులో సాధారణ వర్షపాతం నమోదయ్యే అవకాశం ఉంది. అక్టోబర్‌లో రాష్ట్రంలోని దక్షిణ ప్రాంతాలతో పాటు ఉత్తర తమిళనాడులోని కొన్ని ప్రాంతాల్లో సాధారణం నుంచి అధిక వర్షపాతం నమోదయ్యే అవకాశాలున్నాయి. అదే సమయంలో మరికొన్ని ప్రాంతాల్లో సాధారణం కంటే తక్కువ వర్షాలు కురిసే అవకాశం ఉందని IMD అంచనా వేసింది.

*అక్టోబర్‌లో ఉష్ణోగ్రతలు పెరిగే అవకాశం

అక్టోబర్ నెలలో దేశంలోని అనేక ప్రాంతాల్లో సాధారణం కంటే అధిక ఉష్ణోగ్రతలు నమోదయ్యే అవకాశం ఉందని వాతావరణ శాఖ అంచనా వేసింది. ఈ పరిస్థితుల నేపథ్యంలో రానున్న రోజుల్లో వర్షాలు, ఉష్ణోగ్రతల్లో ప్రాంతాలవారీగా మార్పులు చోటుచేసుకునే అవకాశం ఉంది.

ఈశాన్య రుతుపవనాల ప్రవేశం, వాటి విస్తరణపై రానున్న రోజుల్లో మరింత స్పష్టత వచ్చే అవకాశం ఉంది. రైతులు, ప్రజలు అధికారిక వాతావరణ శాఖ హెచ్చరికలను ఎప్పటికప్పుడు గమనించాలని నిపుణులు సూచిస్తున్నారు.