Telangana Auto Charges| తెలంగాణలో ఆటో చార్జీలు పెంపు

Published: 02 Oct 2026 • 07:15 PM

Telangana Auto Charges| ఆకేరు న్యూస్, హైదరాబాద్: తెలంగాణలో ఆటో రిక్షా ప్రయాణికులకు చార్జీల భారం పెరగనుంది. ఆటో కనీస చార్జీతో పాటు కిలోమీటర్ రేటు, డిటెన్షన్‌, లగేజీ చార్జీలను సవరిస్తూ రాష్ట్ర ప్రభుత్వం నిర్ణయం తీసుకుంది. ఈ మేరకు రవాణా శాఖ కొత్త జీవో జారీ చేసింది. దాదాపు 12 ఏళ్ల తర్వాత ఆటో చార్జీలను ప్రభుత్వం పునఃసమీక్షించింది.

కనీస చార్జీ రూ.30

కొత్త రేట్ల ప్రకారం ఇప్పటివరకు రూ.20గా ఉన్న ఆటో కనీస చార్జీ రూ.30కి పెరగనుంది. అలాగే ప్రతి కిలోమీటర్‌కు ఉన్న రూ.11 రేటును రూ.14కు పెంచారు. దీంతో తక్కువ దూరం ప్రయాణించే వారిపై కూడా అదనపు వ్యయం పడనుంది.

డిటెన్షన్‌, లగేజీ రేట్లు పెంపు

ఆటో వేచి ఉండే సమయానికి సంబంధించిన డిటెన్షన్‌ చార్జీని కూడా సవరించారు. ప్రస్తుతం 50 పైసలుగా ఉన్న రేటును 75 పైసలకు పెంచారు. అదనపు లగేజీపై వసూలు చేసే చార్జీని 25 పైసల నుంచి 50 పైసలకు పెంచారు.

అయితే ఆటోలో అనుమతించే గరిష్ఠ లగేజీ పరిమితిలో మార్పు చేయలేదు. గతంలో ఉన్నట్లుగానే 100 కిలోల పరిమితి కొనసాగుతుంది.

రాత్రి చార్జీల్లో మార్పు లేదు

రాత్రి వేళల్లో సాధారణ చార్జీకి 1.5 రెట్లు వసూలు చేసే విధానం యథావిధిగా కొనసాగనుంది. దీంతో నిర్ణీత రాత్రి సమయాల్లో ఆటోలో ప్రయాణించే వారికి సాధారణ రేట్ల కంటే ఎక్కువ చెల్లించాల్సి ఉంటుంది.

మీటర్లకు మూడు నెలల గడువు

కొత్త చార్జీలకు అనుగుణంగా ఆటో మీటర్లను రీసెట్‌ చేసుకునేందుకు ప్రభుత్వం మూడు నెలల సమయం ఇచ్చింది. ఈ గడువులోగా మీటర్లలో కొత్త రేట్లను అమలు చేయాల్సి ఉంటుంది. సంబంధిత అధికారులు మీటర్ల సవరణ ప్రక్రియను పర్యవేక్షించనున్నారు.

దీర్ఘకాలంగా ఆటో చార్జీలను పెంచాలన్న డిమాండ్లు ఉన్న నేపథ్యంలో ప్రభుత్వం ఈ నిర్ణయం తీసుకుంది. కొత్త రేట్ల అమలుతో ఆటో డ్రైవర్ల ఆదాయం, ప్రయాణికులపై పడే అదనపు ఖర్చులో ఎలాంటి మార్పులు వస్తాయన్నది ఇకపై కీలకంగా మారనుంది.