Bathukamma | ఒక‌రోజు ముందే మురిసిన బ‌తుక‌మ్మ‌

Published: 08 Oct 2026 • 09:01 PM

* హైద‌రాబాద్ కూకట్‌పల్లిలో ప్రారంభ‌మైన వేడుక‌లు

ఆకేరు న్యూస్, హైదరాబాద్: తెలంగాణ పూల పండుగ, ఆడపడుచుల ఆత్మగౌరవ ప్రతీక అయిన బతుకమ్మ ఉత్సవాలు కూకట్‌పల్లిలో అప్పుడే తొలకరి పలకరింపులా అత్యంత వైభవంగా ప్రారంభమయ్యాయి. సాధారణంగా వర్షాకాలం ముగిసే సమయంలో ప్రకృతి ఒడిలో విరబూసే రంగురంగుల గునుగు, తంగేడుతో పాటు ఇతర స్థానిక పూలతో గౌరమ్మను పూజించడం ఇక్కడి విశిష్ట సంప్రదాయం. రాష్ట్రవ్యాప్తంగా ఈ నెల 10వ తేదీన ఎంగిలిపూల బతుకమ్మతో సంబరాలు షురూ కానుండగా, కూకట్‌పల్లి వాసులు మాత్రం ఆనవాయితీ ప్రకారం ఒక రోజు ముందే పండుగ సంబరాల్లో మునిగితేలారు.

* తిథుల ప్రాధాన్యం

కూకట్‌పల్లి గ్రామంలో ఏటా అధికారిక తేదీ కంటే ఒకరోజు ముందే బతుకమ్మ వేడుకలు నిర్వహించడం తరతరాలుగా వస్తున్న ఆచారం. ఈసారి శనివారం అమావాస్య ఘడియలు వస్తుండటంతో, శుక్రవారం రోజు గౌరమ్మను ఇంట్లోంచి బయటకు తీసుకువెళ్లడం శ్రేయస్కరం కాదనే వేద పండితుల సూచనతో గురువారమే వేడుకలను ప్రారంభించాలని కమిటీ నిర్ణయించింది. ఇందులో భాగంగా గురువారం సాయంత్రం కూకట్‌పల్లి గ్రామంలోని పురాతన శ్రీ ఆంజనేయస్వామి ఆలయ ప్రాంగణంలో ఉత్సవ కమిటీ ఆధ్వర్యంలో వేడుకలను అత్యంత అంగరంగ వైభవంగా ఏర్పాటు చేశారు.

* రంగుల హరివిల్లు.. మహిళల కోలాహలం

ఆలయ ప్రాంగణమంతా వర్ణరంజితమైన రంగవల్లులు, విద్యుత్ దీపాల కాంతులతో శోభాయమానంగా మారింది. తొలిరోజే స్థానిక మహిళలు, యువతులు పోటీపడి గునుగు, తంగేడు, చామంతి, బంతి పూలను పొరలు పొరలుగా, పిరమిడ్ ఆకారంలో పేర్చి సుందరమైన పెద్ద బతుకమ్మలను తయారుచేసి ఆలయ వద్దకు తీసుకువచ్చారు. పట్టువస్త్రాలు ధరించిన నారీమణులందరూ బతుకమ్మల చుట్టూ వలయంగా చేరి, లయబద్ధమైన చప్పట్లతో, ఒకరినొకరు అనుకరిస్తూ ఆనందోత్సాహాల నడుమ ఆటపాటల్లో లీనమయ్యారు.

“ఇద్దరక్క చెల్లెండ్లు ఉయ్యాలో..
ఒక్కూరికిచ్చిరి ఉయ్యాలో..
ఒక్కడే మాయన్న ఉయ్యాలో..
వచ్చన్న పోడాయో ఉయ్యాలో…”

అంటూ తెలంగాణ గ్రామీణ సాంస్కృతిక సౌరభం ఉట్టిపడేలా సాగిన జానపద గేయాలు సాయంత్ర వేళల్లో ప్రత్యేక ఆకర్షణగా నిలిచాయి. చిన్నా పెద్దా తేడా లేకుండా మహిళలంతా ఒక్కటై ఆడిన బతుకమ్మ ఆటలు గ్రామంలో పండుగ శోభను నింపాయి.

* చెరువులో నిమజ్జనం

ఆటపాటల అనంతరం బతుకమ్మలకు విశేష పూజలు నిర్వహించి, నైవేద్యాలను సమర్పించారు. అనంతరం స్థానిక మహిళలందరూ ఊరేగింపుగా వెళ్లి సమీపంలోని ఐడిఎల్ చెరువులో బతుకమ్మలను భక్తిశ్రద్ధలతో నిమజ్జనం చేశారు. గౌరమ్మకు వీడ్కోలు పలుకుతూ, మళ్లీ ఏడాదైనా త్వరగా రావాలంటూ కోరుకున్నారు.