Malkapur
* ప్రత్తి, వరి పంటల రక్షణకు కీలక సూచనలు..
* చీడపీడలు, తెగుళ్ల నివారణకు సలహాలు
ఆకేరు న్యూస్, కమలాపూర్: పంటలను ఆశిస్తున్న చీడపీడలు, తెగుళ్ల నుంచి రక్షించుకునేందుకు రైతులు తగిన యాజమాన్య పద్ధతులు పాటించాలని వ్యవసాయ శాస్త్రవేత్తలు సూచించారు. హనుమకొండ జిల్లా కమలాపూర్ మండలంలోని అంబాల, గూడూరు, కన్నూరు గ్రామాల్లో వరంగల్ ప్రాంతీయ వ్యవసాయ పరిశోధన కేంద్రం (RARS) శాస్త్రవేత్తలు, వ్యవసాయ శాఖ అధికారులు క్షేత్రస్థాయిలో పర్యటించి ప్రత్తి, వరి పంటలను పరిశీలించారు.
ప్రత్తిపై పచ్చదోమ, తెల్లదోమ ప్రభావం
ప్రస్తుతం కాయ దశలో ఉన్న ప్రత్తి పంటను పరిశీలించిన శాస్త్రవేత్తలు పచ్చదోమ, తెల్లదోమ ఉధృతి ఎక్కువగా ఉన్నట్లు గుర్తించారు. వీటి నివారణకు లీటరు నీటికి డయాఫెంథియూరాన్ 1.25 మి.లీ. లేదా అల్ఫిడోపైరోఫెన్ 2 మి.లీ. కలిపి పిచికారీ చేయాలని సూచించారు. వీటితోపాటు 1500 పీపీఎం వేప నూనెను లీటరు నీటికి 5 మి.లీ. చొప్పున కలపాలని తెలిపారు.
అధిక ఉష్ణోగ్రతలతో పంటకు ఒత్తిడి
ప్రస్తుత అధిక ఉష్ణోగ్రతల కారణంగా ప్రత్తి మొక్కలు వాడిపోకుండా ఉండేందుకు లీటరు నీటికి 19:19:19 నీటిలో కరిగే ఎరువును 5 గ్రాముల చొప్పున కలిపి పిచికారీ చేయాలని శాస్త్రవేత్తలు సూచించారు.
వరి గింజమచ్చ తెగులుపై అప్రమత్తత
గింజ గట్టిపడే దశలో ఉన్న వరి పంటను కూడా శాస్త్రవేత్తలు పరిశీలించారు. ఈ దశలో పంటను ఆశించే గింజమచ్చ తెగులు నివారణకు లీటరు నీటికి ప్రాపికోనజోల్ 1 మి.లీ. చొప్పున పిచికారీ చేయాలని సిఫార్సు చేశారు.
రైతులకు క్షేత్రస్థాయిలో అవగాహన
ఈ పర్యటనలో వరంగల్ ప్రాంతీయ వ్యవసాయ పరిశోధన కేంద్రం శాస్త్రవేత్తలు డా. ఈ. నర్సయ్య, డా. జె. భార్గవి, డా. డి. వీరన్న, మండల వ్యవసాయ అధికారి బి. వేణు పాల్గొన్నారు. పంటల ప్రస్తుత పరిస్థితులు, చీడపీడల నివారణ, తెగుళ్ల నియంత్రణకు సంబంధించిన సూచనలను రైతులకు వివరించారు. క్షేత్రస్థాయిలో నిపుణుల సలహాలు తెలుసుకున్న రైతులు పంటల సంరక్షణకు అవసరమైన సమాచారాన్ని పొందారు.
About the Author
Please tell us what is wrong. Your report will be sent to the website team.
