Malkapur
* ఇతర నెట్‌వర్క్‌ల వైపు వినియోగదారులు
* మల్కాపూర్‌లో 4జీ సేవలు ఎప్పుడొస్తాయో?
Malkapur| ఆకేరు న్యూస్, స్టేషన్ ఘన్‌పూర్: గ్రామంలో సెల్ టవర్ ఉంది.. గతంలో టెలిఫోన్‌ సేవలు అందించిన చరిత్ర ఉంది. చుట్టుపక్కల గ్రామాలకు సైతం కమ్యూనికేషన్‌ సౌకర్యాలు కల్పించిన ఘనత ఉంది. కానీ ప్రస్తుతం అదే గ్రామంలో బీఎస్‌ఎన్‌ఎల్‌ సేవలు ఆశించిన స్థాయిలో అందకపోవడంపై వినియోగదారులు అసంతృప్తి వ్యక్తం చేస్తున్నారు. జనగామ జిల్లా చిల్పూర్‌ మండలం మల్కాపూర్‌లో బీఎస్‌ఎన్‌ఎల్‌ టవర్ ఉన్నప్పటికీ 4జీ సేవలు అందుబాటులో లేకపోవడం స్థానికులకు సమస్యగా మారింది.
గతంలో సేవలకు కేంద్రంగా..
మల్కాపూర్‌ గ్రామంలో 1978లో టెలిఫోన్‌ ఎక్స్ఛేంజ్‌తో పాటు టవర్ ఏర్పాటు చేసినట్లు స్థానికులు చెబుతున్నారు. అప్పట్లో మల్కాపూర్‌తో పాటు పరిసర గ్రామాల ప్రజలకు టెలిఫోన్‌ సౌకర్యాలు కల్పించడంలో ఈ కేంద్రం కీలక పాత్ర పోషించింది. వినియోగదారులకు మెరుగైన సేవలు అందించేందుకు అవసరమైన సిబ్బంది, కార్యాలయ నిర్వహణ సైతం ఉండేవి. అయితే కాలక్రమేణా సాంకేతికత మారడంతో ల్యాండ్‌లైన్‌ ఫోన్ల వినియోగం తగ్గి, సెల్‌ఫోన్ల వాడకం పెరిగింది.
మారుతున్న కాలానికి తగ్గ సేవలేవీ?
మొబైల్‌ నెట్‌వర్క్‌ రంగంలో వేగంగా మార్పులు చోటుచేసుకుంటున్నా, మల్కాపూర్‌లో బీఎస్‌ఎన్‌ఎల్‌ సేవలు మాత్రం ఆశించిన స్థాయిలో అందడం లేదని వినియోగదారులు వాపోతున్నారు. నెట్‌వర్క్‌ సేవలు సరిగా లేకపోవడంతో కొందరు ఇతర టెలికాం సంస్థలకు మారినట్లు చెబుతున్నారు. గ్రామంలో టవర్ ఉన్నప్పటికీ వినియోగదారులకు నాణ్యమైన సేవలు అందకపోవడం అధికారుల పర్యవేక్షణపై ప్రశ్నలు లేవనెత్తుతోంది.
తక్కువ రీఛార్జీ అయినా నిరాశే!
ఇటీవల బీఎస్‌ఎన్‌ఎల్‌ రీఛార్జీ ప్లాన్లపై ఆసక్తి పెరగడంతో కొందరు వినియోగదారులు తిరిగి ఆ నెట్‌వర్క్‌ వైపు మొగ్గు చూపుతున్నారు. అయితే 4జీ సేవలు అందుబాటులో లేకపోవడం వారికి నిరాశ కలిగిస్తోంది. తక్కువ ధరకు రీఛార్జీ లభించినా, అవసరమైన వేగంతో ఇంటర్నెట్‌ సేవలు అందకపోతే ప్రయోజనం ఏమిటని వినియోగదారులు ప్రశ్నిస్తున్నారు. ముఖ్యంగా ఆన్‌లైన్‌ సేవలు, డిజిటల్‌ చెల్లింపులు, విద్యార్థుల చదువులు, ఇతర అత్యవసర అవసరాలకు నెట్‌వర్క్‌ కీలకంగా మారిన నేపథ్యంలో ఈ సమస్యకు పరిష్కారం చూపాల్సిన అవసరం ఉందని అంటున్నారు.
అధికారుల స్పందన ఏదీ?
మల్కాపూర్‌లో బీఎస్‌ఎన్‌ఎల్‌ సేవలను మెరుగుపరిచి, 4జీ నెట్‌వర్క్‌ను అందుబాటులోకి తీసుకురావాలని వినియోగదారులు కోరుతున్నారు. టవర్ అందుబాటులో ఉన్న నేపథ్యంలో సాంకేతిక సమస్యలను గుర్తించి, అవసరమైన చర్యలు చేపట్టాలని విజ్ఞప్తి చేస్తున్నారు. గతంలో పరిసర గ్రామాలకు టెలిఫోన్‌ సేవలు అందించిన కేంద్రం.. ప్రస్తుతం కూడా ప్రజలకు ఉపయోగపడేలా అధికారులు చర్యలు తీసుకోవాలని కోరుతున్నారు.
About the Author
Please tell us what is wrong. Your report will be sent to the website team.
