Delhi Protest | ఢిల్లీలో ఆగ‌ని పోరు.. ఈసీ తీరుపై ఆందోళనలు

Published: 12 Oct 2026 • 01:17 PM

* కొనసాగుతున్న పోలీసుల ఆంక్షలు..
* ఆరు మెట్రో స్టేషన్ల తాత్కాలిక మూసివేత

ఆకేరు న్యూస్, డెస్క్ : కేంద్ర ఎన్నికల సంఘం ధోరణికి వ్యతిరేకంగా దేశ రాజధాని ఢిల్లీలో విపక్ష ఇండియా కూటమి (Delhi Protest) ఆందోళ‌న‌ల‌ను ఉధృతం చేస్తోంది. ప్రధాన ఎన్నికల కమిషనర్ జ్ఞానేశ్ కుమార్ తక్షణమే తన పదవికి రాజీనామా చేయాలని డిమాండ్ చేస్తూ ఢిల్లీలోని తెలంగాణ భవన్‌లో కాంగ్రెస్ పార్టీ సీనియర్ నేతలు, కూటమి నాయకులు భారీ ఆందోళన చేపట్టారు.

ఈ నిరసన కార్యక్రమంలో తెలంగాణ రాష్ట్ర ఉప ముఖ్యమంత్రి భట్టి విక్రమార్కతో పాటు పలువురు రాష్ట్ర మంత్రులు, పార్లమెంట్ సభ్యులు, శాసనసభ్యులు పెద్ద సంఖ్యలో పాల్గొని తమ నిరసన గళాన్ని వినిపించారు.

* సుప్రీంకోర్టు వైపు ర్యాలీ

తెలంగాణ భవన్‌లో చేపట్టిన నిరసన అనంతరం కాంగ్రెస్ అగ్రనేతలు మధ్యాహ్నం 1:00 గంటకు ప్రత్యేకంగా లంచ్ మీటింగ్ ఏర్పాటు చేసి భవిష్యత్ కార్యాచరణపై సుదీర్ఘంగా చర్చించారు. ఈ భేటీ పూర్తయిన తర్వాత సుప్రీంకోర్టు వైపు భారీ ర్యాలీగా తరలివెళ్లేందుకు నాయకులు సన్నాహాలు చేశారు.

విపక్షాల నిరసన మార్చ్ తీవ్ర రూపం దాల్చే అవకాశం ఉండటంతో, కేంద్ర ప్రభుత్వం మరియు ఢిల్లీ పోలీసులు (Delhi Protest) అప్రమత్తమయ్యారు. ఎలాంటి అవాంఛనీయ సంఘటనలు జరగకుండా సుప్రీంకోర్టు మరియు పరిసర ప్రాంతాల్లో పోలీసులు, పారామిలటరీ బలగాలను భారీగా మోహరించి భద్రతను అత్యంత కట్టుదిట్టం చేశారు.

* మెట్రో స్టేష‌న్ల మూసివేత‌

ర్యాలీ నేపథ్యంలో శాంతిభద్రతల పరిరక్షణ మరియు ట్రాఫిక్ నియంత్రణ దృష్ట్యా ఢిల్లీ నగరవ్యాప్తంగా కఠినమైన ఆంక్షలు అమలులోకి తెచ్చారు. ముందుజాగ్రత్త చర్యగా నగరంలోని అత్యంత కీలకమైన 6 మెట్రో స్టేషన్లను తాత్కాలికంగా మూసివేస్తున్నట్లు మెట్రో అధికారులు ప్రకటించారు.

పలు ప్రధాన రహదారుల్లో వాహనాల రాకపోకలను మళ్లించడంతో నగరంలో రవాణా వ్యవస్థపై తీవ్ర ప్రభావం పడింది. ఈ భద్రతా ఆంక్షలు, ట్రాఫిక్ నియంత్రణ చర్యలు సాయంత్రం 4:00 గంటల వరకు అమల్లో ఉంటాయని అధికారులు అధికారికంగా వెల్లడించారు.