Warangal RTC Revenue | ఆర్టీసీకి ఆదాయం అదుర్స్‌..!

Published: 22 Oct 2026 • 02:48 PM

* బతుకమ్మ, దసరా పండుగల సీజన్‌లో భారీ ఆదాయం
* రూ.24.60 కోట్ల ఆదాయం సాధించిన వరంగల్ రీజియన్
* రీజినల్ మేనేజర్ సోమరాజు భవానీ ప్రసాద్ వెల్లడి

ఆకేరు న్యూస్, వరంగల్ : తెలంగాణ ప్రజలు అత్యంత వైభవంగా జరుపుకునే బతుకమ్మ, విజయదశమి దసరా పండుగల సందర్భంగా తెలంగాణ రాష్ట్ర రోడ్డు రవాణా సంస్థ (TGSRTC) వరంగల్ రీజియన్ భారీ విజయాన్ని నమోదు చేసింది. పండుగ రోజుల్లో ప్రయాణికుల రాకపోకలు పెరగడంతో సంస్థకు భారీగా ఆదాయం సమకూరింది. వరంగల్ రీజియన్ నుంచి బతుకమ్మ, దసరా పండుగల సీజన్‌లో ఏకంగా రూ. 24.60 కోట్ల ఆదాయం వచ్చినట్లు వరంగల్ రీజినల్ మేనేజర్ (RM) సోమరాజు భవానీ ప్రసాద్ అధికారికంగా వెల్లడించారు.

* 45.86 లక్షల మంది సురక్షిత ప్రయాణం

వరంగల్ రీజియన్ పరిధిలోని వివిధ డిపోల ద్వారా ప్రత్యేక మరియు సాధారణ బస్సు సర్వీసులను నిర్వహించి, మొత్తం 45,86,025 మంది ప్రయాణికులను అత్యంత సురక్షితంగా వారి గమ్యస్థానాలకు చేర్చినట్లు ఆర్‌ఎమ్‌ భవానీ ప్రసాద్ వివరించారు. ప్రజలు పండుగ వేళ తమ సొంత ఊళ్లకు, బంధువుల ఇళ్లకు చేరుకునేందుకు వీలుగా నిరంతరం బస్సు సర్వీసులను అందుబాటులో ఉంచడం జరిగిందన్నారు.

* 55శాతం మంది మహిళా ప్రయాణికులు

ప్రభుత్వం ప్రవేశపెట్టిన ‘మహాలక్ష్మి’ పథకం ద్వారా ఉచిత బస్సు ప్రయాణం సౌకర్యం ఉండటంతో మహిళలు పెద్ద సంఖ్యలో ఆర్టీసీ బస్సులను ఆశ్రయించారు. మొత్తం ప్రయాణించిన వారిలో 55 శాతం మంది మహిళలు ‘మహాలక్ష్మి’ పథకం కింద ఉచితంగా ప్రయాణించారు. మిగిలిన 45 శాతం మంది పురుషులు టిక్కెట్లు తీసుకుని ప్రయాణించారు. పండుగ వేళ మహిళలకు ఆర్థిక భారం పడకుండా ఉచిత ప్రయాణ సౌకర్యం కల్పించడం వల్ల ఆర్టీసీ బస్సులకు రద్దీ విశేషంగా పెరిగిందని అధికారులు భావిస్తున్నారు.

* సిబ్బందికి కృతజ్ఞతలు..

పండుగ రద్దీ సమయంలో ఎలాంటి అవాంఛనీయ సంఘటనలు జరగకుండా, ప్రయాణికులకు ఎలాంటి ఇబ్బందులు తలెత్తకుండా సమర్థవంతంగా విధులు నిర్వహించిన డ్రైవర్లు, కండక్టర్లు, గ్యారేజ్ సిబ్బంది, పర్యవేక్షకులు మరియు ఆర్టీసీ అధికారుల సేవలను రీజినల్ మేనేజర్ సోమరాజు భవానీ ప్రసాద్ ప్రత్యేకంగా కొనియాడారు. రాత్రింబవళ్లు కష్టపడి పనిచేసిన ప్రతీ ఒక్కరికీ ఆయన హృదయపూర్వక ధన్యవాదాలు మరియు కృతజ్ఞతలు తెలిపారు.