Chilpur| బీసీలకు రాజ్యాధికారం బీజేపీతోనే సాధ్యం

Published: 24 Oct 2026 • 06:26 PM

* బీజేపీ, ఓబీసీ మోర్చా నాయకుల వ్యాఖ్యలు

Chilpur| ఆకేరు న్యూస్, స్టేషన్ ఘన్ పూర్: బీసీలకు రాజకీయంగా రాజ్యాధికారం సాధించడం బీజేపీతోనే సాధ్యమని పోచం సోమయ్య, ఓబీసీ మోర్చా జిల్లా అధ్యక్షుడు వడ్లకొండ రవి అన్నారు. జనగామ జిల్లా చిల్పూర్ మండల కేంద్రంలో బీజేపీ మండల అధ్యక్షుడు గంటె ఉపేందర్ ఆధ్వర్యంలో శనివారం నిర్వహించిన సమావేశంలో వారు ముఖ్య అతిథులుగా పాల్గొని మాట్లాడారు.

బీసీలకు రాజకీయ అవకాశాలు

2023లో తెలంగాణలో బీజేపీ అధికారంలోకి వస్తే బీసీని ముఖ్యమంత్రిని చేస్తామని ప్రకటించిన ఏకైక పార్టీ బీజేపీ అని నాయకులు పేర్కొన్నారు. బీసీలకు రాజకీయంగా ఎక్కువ అవకాశాలు కల్పించిన ఘనత తమ పార్టీకే దక్కుతుందని అన్నారు. కేంద్ర మంత్రివర్గంలో ఓబీసీలకు 40 శాతం ప్రాతినిధ్యం కల్పించినట్లు పేర్కొంటూ, బీసీల అభ్యున్నతికి బీజేపీ ప్రభుత్వం కృషి చేస్తోందని తెలిపారు.

విద్య, ఉపాధికి ప్రోత్సాహం

102వ రాజ్యాంగ సవరణ ద్వారా జాతీయ వెనుకబడిన తరగతుల కమిషన్‌ (ఎన్‌సీబీసీ)కు రాజ్యాంగ హోదా కల్పించిన ఘనత మోదీ ప్రభుత్వానిదని నాయకులు అన్నారు. మోదీ పాలనలో 40 విశ్వవిద్యాలయాల్లో 4,000 మంది బీసీలు ప్రొఫెసర్లు, అసిస్టెంట్‌ ప్రొఫెసర్లుగా నియమితులయ్యారని పేర్కొన్నారు.

ఎన్‌ఎఫ్‌ఓబీసీ (NFOBC) ఫెలోషిప్‌ కింద ఎంఫిల్‌, పీహెచ్‌డీ చేస్తున్న ఓబీసీ విద్యార్థులకు రూ.37 వేల నుంచి రూ.43 వేల వరకు స్టైపెండ్‌తో పాటు హెచ్‌ఆర్‌ఏ అందిస్తున్నట్లు తెలిపారు. బీసీలకు విద్య, ఉద్యోగ, రాజకీయ రంగాల్లో మరిన్ని అవకాశాలు కల్పించాల్సిన అవసరం ఉందని పేర్కొన్నారు.

పలువురు నాయకుల హాజరు

ఈ సమావేశంలో బీజేపీ జిల్లా నాయకుడు పెండ్యాల దిలీప్ కుమార్, ఓబీసీ జిల్లా ప్రధాన కార్యదర్శి ఊరడి రాజు, ఓబీసీ జిల్లా కార్యవర్గ సభ్యుడు ముక్కెర రమేష్, మండల ప్రధాన కార్యదర్శి వెలిశాల శ్రీనివాస్, మండల నాయకులు గొల్లపెల్లి శైలేష్, కన్నెబోయిన అఖిల్ కుమార్ తదితరులు పాల్గొన్నారు.