Melasma Causes and Treatment Tips
* స్టెరాయిడ్‌ క్రీములతో చర్మానికి ముప్పు
* డెర్మటాలజిస్ట్‌ అశ్విని సూచనలు
ఆకేరు న్యూస్, హెల్త్‌: ముఖంపై నల్లటి మచ్చలు.. రోజురోజుకూ పెరుగుతున్న పిగ్మెంటేషన్‌.. అందాన్ని దెబ్బతీస్తున్న నల్లబొంగు సమస్యతో చాలామంది ఇబ్బందులు పడుతున్నారు. ఎండ ప్రభావం, హార్మోన్ల మార్పులు, మానసిక ఒత్తిడి వంటి అనేక కారణాలు ఈ సమస్యకు దారితీయవచ్చు. అయితే నల్లటి మచ్చలు కనిపించగానే సొంత వైద్యం చేసుకోవడం, స్టెరాయిడ్‌ క్రీములను ఇష్టానుసారంగా వాడటం మరింత ప్రమాదకరమని ప్రముఖ డెర్మటాలజిస్ట్‌ డాక్టర్‌ అశ్విని గుత్తెదార్‌ (Dr Ashwini Guttedar – MD, DVL) హెచ్చరించారు. సరైన చర్మ సంరక్షణ, సన్‌స్క్రీన్‌ వినియోగం, వైద్యుల సూచనలతో ఆధునిక చికిత్సలు తీసుకోవడం ద్వారా సమస్యను నియంత్రించవచ్చని తెలిపారు. ఆకేరు న్యూస్ స్టూడియోలో జరిగిన ప్రత్యేక ఇంటర్వ్యూలో నల్లబొంగు సమస్యకు కారణాలు, నివారణ చర్యలు, అందుబాటులో ఉన్న చికిత్సల గురించి ఆమె కీలక సూచనలు చేశారు.
* నల్లబొంగుకు కారణాలివే!
నల్లబొంగు (పిగ్మెంటేషన్‌ లేదా మెలాస్మా) సమస్య ఒక్క కారణంతోనే వస్తుందని చెప్పలేమని డాక్టర్‌ అశ్విని వివరించారు. సూర్యరశ్మి ప్రభావం, హార్మోన్లలో మార్పులు, గర్భధారణ సమయంలో చోటుచేసుకునే మార్పులు, మానసిక ఒత్తిడి వంటి అంశాలు దీనికి కారణం కావచ్చని తెలిపారు. సమస్యను గుర్తించిన వెంటనే చర్మ వైద్యులను సంప్రదించి, దానికి తగిన చికిత్స తీసుకోవాలని సూచించారు.
* సన్‌స్క్రీన్‌తో రక్షణ
నల్లబొంగు సమస్యను నియంత్రించడంలో సన్‌స్క్రీన్‌ (sunscreen) కీలక పాత్ర పోషిస్తుందని డాక్టర్‌ అశ్విని పేర్కొన్నారు. ఎండలోకి వెళ్లే ముందు బ్రాడ్‌ స్పెక్ట్రమ్‌ సన్‌స్క్రీన్‌ (SPF 30 లేదా అంతకంటే ఎక్కువ) ఉపయోగించాలని సూచించారు. బయట ఎక్కువసేపు ఉన్నప్పుడు సుమారు ప్రతి రెండు గంటలకు ఒకసారి, అలాగే చెమట పట్టినప్పుడు లేదా ముఖం కడిగిన తర్వాత తిరిగి అప్లై చేయడం మంచిదని తెలిపారు. టోపీ, గొడుగు వంటి రక్షణ పద్ధతులు కూడా పాటించాలని చెప్పారు.
చర్మం పొడిబారకుండా ఉండేందుకు తగిన మాయిశ్చరైజర్‌ ఉపయోగించాలని సూచించారు. గ్లైకోలిక్‌ యాసిడ్‌, కోజిక్‌ యాసిడ్‌ వంటి పదార్థాలు కలిగిన ఉత్పత్తులు కొన్ని సందర్భాల్లో ఉపయోగపడతాయని, అయితే చర్మ స్వభావాన్ని బట్టి వైద్యుల సూచనలతోనే వాటిని వాడాలని వివరించారు.
* స్టెరాయిడ్‌ క్రీములతో జాగ్రత్త!
నల్లటి మచ్చలు తగ్గుతాయనే ఉద్దేశంతో మెడికల్‌ షాపుల్లో లభించే స్టెరాయిడ్‌ క్రీములను సొంతంగా కొనుగోలు చేసి ఉపయోగించడం ప్రమాదకరమని డాక్టర్‌ అశ్విని హెచ్చరించారు. వీటిని వాడినప్పుడు తొలుత మచ్చలు తగ్గినట్లు కనిపించినా, తర్వాత సమస్య తిరిగి వచ్చే అవకాశం ఉందని తెలిపారు. వైద్యుల పర్యవేక్షణ లేకుండా ఎక్కువకాలం వాడితే చర్మం పలుచబడటం, రక్తనాళాలు స్పష్టంగా కనిపించడం, మొటిమలు రావడం, అవాంఛిత రోమాలు పెరగడం వంటి దుష్ప్రభావాలు తలెత్తవచ్చని వివరించారు. అందుకే సొంత వైద్యానికి దూరంగా ఉండాలని సూచించారు.
* ఆధునిక చికిత్సలతో మెరుగైన ఫలితాలు
సాధారణ చర్మ సంరక్షణ, వైద్యులు సూచించిన క్రీములతో ఆశించిన ఫలితం రాని సందర్భాల్లో ఇతర చికిత్సలను పరిశీలిస్తామని డాక్టర్‌ అశ్విని తెలిపారు. సమస్య తీవ్రత, చర్మ స్వభావాన్ని బట్టి కెమికల్‌ పీలింగ్‌, క్యూ-స్విచ్‌ లేజర్‌, పిగ్మెంటేషన్‌ లేజర్‌ వంటి విధానాలను సూచించే అవకాశం ఉందన్నారు. కొన్ని సందర్భాల్లో కాస్మెలాన్‌ పీల్‌ చికిత్సను కూడా పరిశీలిస్తామని వివరించారు.
ఈ చికిత్సలతో కొంతమందిలో గణనీయమైన మెరుగుదల కనిపించవచ్చని, అయితే అందరికీ ఒకే రకమైన ఫలితాలు రావని స్పష్టం చేశారు. చర్మానికి సరిపడే చికిత్సను నిపుణుల సలహాతో ఎంచుకోవడం ముఖ్యమని తెలిపారు.
* ఎండ వేళల్లో మరింత అప్రమత్తం
సాధ్యమైనంతవరకు ఉదయం 10 గంటల నుంచి సాయంత్రం 4 గంటల మధ్య నేరుగా ఎండలో తిరగకుండా ఉండటం మంచిదని డాక్టర్‌ అశ్విని సూచించారు. తప్పనిసరిగా బయటకు వెళ్లాల్సి వస్తే సన్‌స్క్రీన్‌ ఉపయోగించడంతో పాటు టోపీ, గొడుగు లేదా రక్షణ కల్పించే దుస్తులను ధరించాలని చెప్పారు. ముఖాన్ని ఎండ నుంచి కాపాడుకోవడం ద్వారా నల్లబొంగు మరింత పెరగకుండా నియంత్రించేందుకు సహాయపడుతుందని వివరించారు.
* క్రమబద్ధమైన సంరక్షణే కీలకం
నల్లబొంగు సమస్యకు ఒక్క క్రీమ్‌తోనే శాశ్వత పరిష్కారం లభిస్తుందని భావించకూడదని డాక్టర్‌ అశ్విని గుత్తెదార్‌ తెలిపారు. సన్‌స్క్రీన్‌ వినియోగం, మాయిశ్చరైజర్‌తో చర్మ సంరక్షణ, ఎండ నుంచి రక్షణ, వైద్యుల సూచనల మేరకు చికిత్స కొనసాగించడం ముఖ్యమన్నారు. సమస్య తగ్గిన తర్వాత కూడా తగిన జాగ్రత్తలు పాటించాలని సూచించారు. నల్లటి మచ్చలు ఎక్కువవుతున్నా, కొత్తగా ఏర్పడుతున్నా లేదా ఉపయోగిస్తున్న క్రీములతో చర్మంపై ఇబ్బందులు కలుగుతున్నా చర్మ వైద్యులను సంప్రదించాలని తెలిపారు.
About the Author
Please tell us what is wrong. Your report will be sent to the website team.
