గన్నవరం ఎయిర్పోర్టు
* మురసు తుఫాన్‌ ప్రభావం
* ఎనిమిది సర్వీసులు రద్దు
Gannavaram Airport| ఆకేరు న్యూస్, డెస్క్: మురసు తుఫాన్‌ ప్రభావంతో విజయవాడలోని గన్నవరం విమానాశ్రయంలో విమాన రాకపోకలకు అంతరాయం ఏర్పడింది. తుఫాన్‌ కారణంగా భారీ వర్షాలు, ప్రతికూల వాతావరణ పరిస్థితులు నెలకొనడంతో విమానయాన సంస్థలు ముందస్తు జాగ్రత్త చర్యలు చేపట్టాయి. ఇందులో భాగంగా నవంబర్‌ 3న విజయవాడకు రాకపోకలు సాగించాల్సిన ఎనిమిది విమాన సర్వీసులను ఇండిగో సంస్థ రద్దు చేసింది. దీంతో విమాన ప్రయాణానికి సిద్ధమైన పలువురు ప్రయాణికులు ఇబ్బందులు ఎదుర్కొంటున్నారు.
పలు నగరాలకు విమాన సేవలపై ప్రభావం
విజయవాడ నుంచి బెంగళూరు, హైదరాబాద్‌, కడప, ఢిల్లీ, చెన్నై, సింగపూర్‌ తదితర మార్గాల్లో నడవాల్సిన విమాన సర్వీసులపై తుఫాన్‌ ప్రభావం పడింది. వాతావరణ పరిస్థితులను అంచనా వేసిన అనంతరం ఇండిగో సంస్థ ఎనిమిది సర్వీసులను రద్దు చేస్తూ నిర్ణయం తీసుకుంది. తుఫాన్‌ తీవ్రత, వర్షాల పరిస్థితిని బట్టి మరిన్ని విమానాల రాకపోకల్లోనూ మార్పులు చోటుచేసుకునే అవకాశం ఉంది.
ప్రయాణికులకు కీలక సూచనలు
విమాన సర్వీసుల రద్దు, ఆలస్యాల నేపథ్యంలో ప్రయాణికులు అప్రమత్తంగా ఉండాలని అధికారులు సూచిస్తున్నారు. విమానాశ్రయానికి బయలుదేరే ముందు సంబంధిత విమానయాన సంస్థ వెబ్‌సైట్‌ లేదా మొబైల్‌ యాప్‌లో విమాన సమయాలు, ప్రస్తుత స్థితిని తప్పనిసరిగా తనిఖీ చేసుకోవాలని కోరుతున్నారు. విమానం రద్దయిన వారు టికెట్‌ రీషెడ్యూల్‌, రీఫండ్‌ వివరాల కోసం సంబంధిత ఎయిర్‌లైన్‌ను సంప్రదించాలని సూచించారు. వాతావరణం పూర్తిగా అనుకూలించే వరకు విమాన సర్వీసుల షెడ్యూల్‌లో మార్పులు ఉండే అవకాశం ఉందని ప్రయాణికులు గమనించాలి.
About the Author
Please tell us what is wrong. Your report will be sent to the website team.
