Adilabad | ఖాకీ చాటున లంచం బాగోతం..!

Published: 05 Nov 2026 • 08:43 AM

* ఏసీబీకి చిక్కిన బజార్ హత్నూర్ ఎస్ఐ..

* రూ. 40 వేలు లంచం తీసుకుంటూ రెడ్ హ్యాండెడ్ పట్టివేత..

ఆకేరు న్యూస్, ఆదిలాబాద్ : జిల్లాలో ఖాకీ దుస్తుల చాటున సాగుతున్న అవినీతి బాగోతం బట్టబయలైంది. ఓ కేసు వ్యవహారంలో లంచం డిమాండ్ చేసిన పోలీస్ అధికారి, ఏసీబీ (ACB) అధికారుల వ్యూహాత్మక వలలో చిక్కి కటకటపాలపాలయ్యే పరిస్థితి కొనితెచ్చుకున్నారు.

* వివరాల్లోకి వెళ్తే..

ఆదిలాబాద్ జిల్లా బజార్ హత్నూర్ పోలీస్ స్టేషన్‌లో ఎస్ఐగా బాధ్యతలు నిర్వర్తిస్తున్న రమేష్.. స్టేషన్‌కు వచ్చిన ఓ బాధితుడిని కేసు విషయంలో వేధించడం మొదలుపెట్టాడు. సమస్య పరిష్కరించాలంటే తనకు రూ. 50వేలు లంచం ఇవ్వాలని డిమాండ్ చేశాడు. అంత పెద్ద మొత్తంలో డబ్బులు ఇచ్చుకోలేనని బాధితుడు ఎంతగానో బతిమిలాడాడు. చివరికి ఎస్ఐ కరిగిపోకపోగా.. బేరం కుదుర్చుకుని రూ. 40వేలు ఇవ్వాల్సిందేనని హుకుం జారీ చేశాడు.

* ఏసీబీ రంగప్రవేశం..

ఎస్ఐ డిమాండ్లతో మానసికంగా వేదనకు గురైన బాధితుడు, రాజీ మార్గాన్ని పక్కనపెట్టి నేరుగా అవినీతి నిరోధక శాఖ (ఏసీబీ) అధికారులను ఆశ్రయించి లిఖితపూర్వక ఫిర్యాదు చేశాడు. బాధితుడి ఫిర్యాదును సీరియస్‌గా తీసుకున్న ఏసీబీ డీఎస్పీ గొర్రె మధు వెంటనే రంగంలోకి దిగారు. పక్కా ప్రణాళికతో ప్లాన్ రచించి, సిబ్బందితో కలిసి వ్యూహాత్మకంగా వల పన్నారు.

పథకం ప్రకారం బాధితుడు ఎస్ఐ రమేష్‌కు లంచం సొమ్ము అందజేస్తున్న సమక్షంలోనే.. ఏసీబీ అధికారులు దాడులు చేసి రూ. 40వేల నగదును స్వాధీనం చేసుకుని ఎస్ఐని రెడ్ హ్యాండెడ్‌గా అదుపులోకి తీసుకున్నారు.

* ఏసీబీ విజ్ఞప్తి ..

ప్రభుత్వ శాఖలలో ఎవరైనా ఉద్యోగులు లేదా అధికారులు లంచం డిమాండ్ చేస్తే ప్రజలు భయపడాల్సిన అవసరం లేదన్నారు. వెంటనే ఏసీబీ అధికారులను సంప్రదించాలని డీఎస్పీ గొర్రె మధు ఈ సందర్భంగా ప్రజలకు విజ్ఞప్తి చేశారు.