MLC Mirza Rahmath | ఎమ్మెల్సీని టార్గెట్ చేసిన డీప్‌ఫేక్ ముఠా..

Published: 07 Nov 2026 • 03:15 PM

* మార్ఫింగ్ వీడియోలతో బ్లాక్‌మెయిల్..
* రూ.5 కోట్లు ఇవ్వకుంటే వీడియోలు వైరల్ చేస్తామంటూ బెదిరింపులు
* ఇబ్రహీంబాగ్‌లో పోలీసుల ఆపరేషన్..
* ఏఐ వీడియోలతో కొత్త తరహా సైబర్ నేరం..
* పోలీసులకు చిక్కిన ముఠా

ఆకేరు న్యూస్, హైదరాబాద్‌: టెక్నాలజీని అడ్డం పెట్టుకుని సైబర్ నేరాలకు పాల్పడుతున్న ముఠాల ఆగడాలు పెరుగుతున్నాయి. తాజాగా డీప్‌ఫేక్ వీడియోలు, మార్ఫింగ్ ఫొటోలతో తెలంగాణ ఎమ్మెల్సీ మీర్జా రహ్మత్ బేగ్‌ను బెదిరించి భారీగా డబ్బులు వసూలు చేసేందుకు ప్రయత్నించిన ఘటన హైదరాబాద్‌లో వెలుగుచూసింది. ఈ వ్యవహారంలో నార్సింగి పోలీసులు ఆరుగురు నిందితులను అరెస్టు చేశారు.

రూ.5 కోట్లు ఇవ్వాలంటూ బెదిరింపులు

పోలీసుల వివరాల ప్రకారం.. మీర్జా రహ్మత్ బేగ్‌కు సంబంధించిన ఫొటోలను మార్ఫింగ్ చేసి, అభ్యంతరకరమైన డీప్‌ఫేక్ వీడియోలు రూపొందించినట్లు నిందితులపై ఆరోపణలు ఉన్నాయి. వాటిని సోషల్ మీడియాలో ప్రచారం చేస్తామని బెదిరిస్తూ తొలుత రూ.5 కోట్లు డిమాండ్ చేశారు. డబ్బులు ఇవ్వకపోతే ఆయన రాజకీయ, సామాజిక ప్రతిష్ఠకు భంగం కలిగిస్తామని, ప్రాణాలకు హాని చేస్తామని హెచ్చరించినట్లు పోలీసులు వెల్లడించారు. ఈ బెదిరింపుల నేపథ్యంలో ఇప్పటికే మధ్యవర్తి ద్వారా రూ.5 లక్షలు వసూలు చేసినట్లు దర్యాప్తులో వెల్లడైంది. అయినప్పటికీ నిందితులు మరో రూ.5 లక్షలు ఇవ్వాలని ఒత్తిడి తెచ్చారు.

ఎమ్మెల్సీ కార్యాలయం వద్ద పోలీసుల వల

నవంబర్ 5న ఫాతిమా బేగం అలియాస్ రీమా మరో నలుగురితో కలిసి ఇబ్రహీంబాగ్‌లోని ఎమ్మెల్సీ కార్యాలయానికి వెళ్లింది. అక్కడ నగదు తీసుకుని తిరిగి వెళ్తుండగా ముందస్తు సమాచారంతో సిద్ధంగా ఉన్న నార్సింగి పోలీసులు వారిని అదుపులోకి తీసుకున్నారు. అనంతరం ఈ వ్యవహారంలో కీలకంగా ఉన్న మహ్మద్ మొహ్సిన్ ఖాన్‌ను కూడా అరెస్టు చేశారు. ఈ కేసులో మహ్మద్ మొహ్సిన్ ఖాన్, ఫాతిమా బేగం అలియాస్ రీమా, మహ్మద్ సమీర్, మహ్మద్ జమీర్, మహ్మద్ ఇమ్రాన్, సయ్యద్ రెహాన్‌ను పోలీసులు అరెస్టు చేశారు. వారి నుంచి రూ.4.70 లక్షల నగదు, రెండు ఆటోలు, ఆరు సెల్‌ఫోన్లు, ఒక ల్యాప్‌టాప్‌ను స్వాధీనం చేసుకున్నారు.

పరారీలో మరికొందరు.. కొనసాగుతున్న దర్యాప్తు

ఈ వ్యవహారం వెనుక మరికొందరి ప్రమేయం ఉన్నట్లు పోలీసులు అనుమానిస్తున్నారు. డీప్‌ఫేక్ వీడియోలు, మార్ఫింగ్ ఫొటోలను రూపొందించడం, వాటిని సోషల్ మీడియాలో ప్రచారం చేయడం వెనుక ఉన్న వ్యక్తుల వివరాలను సేకరిస్తున్నారు. పరారీలో ఉన్న నిందితుల కోసం గాలింపు కొనసాగుతోంది. ఇదిలా ఉండగా, మీర్జా రహ్మత్ బేగ్‌ను ఆగస్టు 2026లో ఎంఐఎం పార్టీ నుంచి బహిష్కరించిన విషయం తెలిసిందే. ఆయనకు సంబంధించినవిగా ప్రచారంలోకి వచ్చిన వీడియోలపై అప్పట్లో వివాదం తలెత్తింది. అవి ఏఐతో రూపొందించినవని బేగ్ పేర్కొన్నట్లు వార్తా కథనాలు వెల్లడించాయి. డీప్‌ఫేక్ టెక్నాలజీని ఉపయోగించి బెదిరింపులకు పాల్పడుతున్న ఈ ఘటన హైదరాబాద్‌లో చర్చనీయాంశంగా మారింది.