* హనుమకొండ ప్రసూతి ఆసుపత్రిలో విషాదం
* బాలింత మృతితో కలకలం
ఆకేరు న్యూస్ వరంగల్ జిల్లా : ప్రసవం కోసం ఆసుపత్రికి వెళ్లిన ఓ గర్భిణి.. పండంటి ఆడబిడ్డకు జన్మనిచ్చిన కొద్ది గంటల్లోనే ప్రాణాలు కోల్పోయింది. అధిక రక్తస్రావం కారణంగా బాలింత మృతి చెందడం హనుమకొండలో విషాదాన్ని నింపింది. ఈ ఘటనకు వైద్యుల నిర్లక్ష్యమే కారణమంటూ మృతురాలి కుటుంబ సభ్యులు ఆందోళనకు దిగారు. హనుమకొండ ప్రసూతి ఆసుపత్రిలో ఈ ఘటన చోటుచేసుకుంది. స్టేషన్ ఘన్‌పూర్ మండలం పాంనూరు గ్రామానికి చెందిన పొన్న రమ్యను కుటుంబ సభ్యులు ప్రసవం కోసం ఆసుపత్రికి తీసుకెళ్లారు. అక్కడ ఆమె ఆడ శిశువుకు జన్మనిచ్చింది. అయితే ప్రసవం జరిగిన రెండు గంటలకే పరిస్థితి విషమించి అధిక రక్తస్రావం ప్రారంభమైంది. చివరకు తెల్లవారుజామున 4 గంటల సమయంలో రమ్య మృతి చెందింది.
* సకాలంలో వైద్యం అందలేదని కుటుంబ సభ్యుల ఆరోపణ
రమ్యకు అధిక రక్తస్రావం జరుగుతున్న సమయంలో ఆసుపత్రిలో డ్యూటీలో జూనియర్ డాక్టర్ మాత్రమే అందుబాటులో ఉన్నారని కుటుంబ సభ్యులు ఆరోపిస్తున్నారు. అత్యవసర పరిస్థితుల్లో సీనియర్ వైద్యులు సకాలంలో అందుబాటులోకి రాకపోవడంతోనే తమ కుటుంబ సభ్యురాలు ప్రాణాలు కోల్పోయిందని వారు ఆవేదన వ్యక్తం చేస్తున్నారు.
* ఆసుపత్రి వద్ద కుటుంబ సభ్యుల ఆందోళన
వైద్యుల నిర్లక్ష్యం కారణంగానే రమ్య మృతి చెందిందంటూ ఆమె బంధువులు ఆసుపత్రి వద్ద ఆందోళనకు దిగారు. ప్రసవం అనంతరం బాలింత ఆరోగ్య పరిస్థితిని సరిగా పర్యవేక్షించారా? అధిక రక్తస్రావం ప్రారంభమైనప్పుడు తగిన వైద్య సేవలు అందించారా? అనే అంశాలపై కుటుంబ సభ్యులు ప్రశ్నలు లేవనెత్తుతున్నారు. ఆడబిడ్డకు జన్మనిచ్చిన ఆనందం కుటుంబంలో ఎంతోసేపు నిలవకముందే రమ్య మృతి చెందడంతో పాంనూరు గ్రామంలో విషాదం నెలకొంది. ఈ ఘటనపై అధికారులు విచారణ జరిపి వాస్తవాలను వెల్లడించాలని, బాధ్యులపై చర్యలు తీసుకోవాలని కుటుంబ సభ్యులు కోరుతున్నారు.
About the Author
Please tell us what is wrong. Your report will be sent to the website team.
