Vande Mataram Controversy in Kerala
* నాకు దేశభక్తి నేర్పించొద్దు: మంత్రి
* కేరళలో వందేమాతరం వివాదం
* మంత్రి తీరుపై బీజేపీ ఫైర్
ఆకేరు న్యూస్, డెస్క్ : కేరళలో వందేమాతరం గీతం ఆలాపన వ్యవహారం రాజకీయ వివాదానికి దారితీసింది. ప్రభుత్వ కార్యక్రమంలో జాతీయ గీతం పూర్తిగా ఆలపించకముందే ఆరోగ్య మంత్రి కే. మురళీధరన్‌తో పాటు పలువురు ప్రజాప్రతినిధులు తమ సీట్లలో కూర్చోవడం చర్చనీయాంశంగా మారింది. కాసరగోడ్‌ జిల్లాలోని ముళ్లేరియా కుటుంబ ఆరోగ్య కేంద్రంలో ల్యాబ్‌ ప్రారంభోత్సవం సందర్భంగా ఈ ఘటన చోటుచేసుకుంది. ఈ దృశ్యాలు బయటకు రావడంతో బీజేపీ విమర్శలు గుప్పించగా, మంత్రి కూడా తనదైన శైలిలో స్పందించారు.
మొదటి రెండు చరణాల తర్వాతే కూర్చున్న నేతలు
ముళ్లేరియా ఫ్యామిలీ హెల్త్‌ సెంటర్‌లో ల్యాబ్‌ ప్రారంభోత్సవ కార్యక్రమం సందర్భంగా వందేమాతరం ఆలపించారు. ఈ సమయంలో వేదికపై ఉన్న ఆరోగ్య మంత్రి కే. మురళీధరన్‌, కాసరగోడ్‌ ఎంపీ రాజ్‌మోహన్‌ ఉన్నితన్‌, ఎమ్మెల్యే కే. మహిన్‌, జిల్లా కలెక్టర్‌ మొదటి రెండు చరణాలు పూర్తికాగానే కూర్చునేందుకు ప్రయత్నించారు. అయితే గీతం కొనసాగడంతో వారు సీట్లలో కూర్చున్నారు. మరోవైపు ఎమ్మెల్యే కే. నీలకంఠన్‌, డీసీసీ అధ్యక్షుడు పీకే ఫైసల్‌ మాత్రం వందేమాతరం పూర్తయ్యే వరకు నిలబడే ఉన్నారు. గీతం ఆలపిస్తున్న సమయంలో మంత్రి పక్కన ఉన్నవారితో మాట్లాడుతున్న దృశ్యాలు కూడా ప్రసార మాధ్యమాల్లో కనిపించాయి.
రెండు చరణాలే పాడాలన్న కేరళ ప్రభుత్వ వైఖరి
కేరళలో ప్రభుత్వ కార్యక్రమాల్లో వందేమాతరం మొదటి రెండు చరణాలు మాత్రమే ఆలపించాలన్న వైఖరిని మంత్రి గతంలోనే వెల్లడించారు. కేంద్ర ప్రభుత్వం పూర్తి గీతాన్ని ఆలపించాలని మార్గదర్శకాలు జారీ చేసిన నేపథ్యంలో ఈ అంశంపై రాష్ట్రంలో రాజకీయ చర్చ మొదలైంది. రాష్ట్ర ప్రభుత్వ కార్యక్రమాల్లో పాత పద్ధతినే కొనసాగిస్తామని కేరళ కాంగ్రెస్‌ నాయకులు గతంలో ప్రకటించారు. అయితే రాష్ట్రపతి, ఉపరాష్ట్రపతి, గవర్నర్‌, ప్రధానమంత్రి వంటి రాజ్యాంగబద్ధ పదవుల్లో ఉన్న ప్రముఖులు పాల్గొనే కార్యక్రమాల్లో కేంద్ర ప్రోటోకాల్‌ ప్రకారం పూర్తి గీతాన్ని ఆలపిస్తామని కేరళ ముఖ్యమంత్రి వీడీ సతీశన్‌ గతంలో స్పష్టం చేశారు.
‘నాకు దేశభక్తి నేర్పించాల్సిన అవసరం లేదు’
ఈ ఘటనపై విమర్శలు వెల్లువెత్తడంతో మంత్రి కే. మురళీధరన్‌ స్పందించారు. తాను స్వాతంత్ర్య సమరయోధుడి కుమారుడినని, తనకు ఎవరూ దేశభక్తిని నేర్పించాల్సిన అవసరం లేదని వ్యాఖ్యానించారు. రాష్ట్ర ప్రభుత్వ అధికారిక కార్యక్రమాల్లో కేంద్ర ప్రభుత్వ ప్రోటోకాల్‌ లేదా బీజేపీ ఎజెండాను అమలు చేయడానికి అనుమతించబోమని స్పష్టం చేశారు. ఈ వ్యవహారంలో చట్టపరమైన చర్యలు ఎదురైనా సిద్ధంగా ఉన్నట్లు తెలిపారు.
బీజేపీ విమర్శలు.. రాజకీయంగా వేడెక్కిన వివాదం
వందేమాతరం పూర్తికాకముందే మంత్రి, ఇతర ప్రజాప్రతినిధులు కూర్చోవడంపై కేరళ బీజేపీ తీవ్ర అభ్యంతరం వ్యక్తం చేసింది. జాతీయ గీతం ఆలాపన సమయంలో పాటించాల్సిన గౌరవాన్ని విస్మరించారని విమర్శించింది. మరోవైపు మంత్రి తన గత ప్రకటనలు, రాష్ట్రంలో అమలవుతున్న ప్రోటోకాల్‌ను ప్రస్తావిస్తూ తన వైఖరిని సమర్థించుకున్నారు. కేంద్ర మార్గదర్శకాలు, కేరళ ప్రభుత్వ వైఖరి మధ్య ఉన్న భిన్నాభిప్రాయాలు ఈ ఘటనతో మరోసారి తెరపైకి వచ్చాయి. వందేమాతరం ఆలాపనకు సంబంధించిన ప్రోటోకాల్‌పై రాజకీయ పార్టీల మధ్య వాదోపవాదాలు కొనసాగుతున్నాయి. ఈ నేపథ్యంలో కాసరగోడ్‌ కార్యక్రమానికి సంబంధించిన వీడియోలు రాజకీయ చర్చకు కేంద్రంగా మారాయి.
About the Author
Please tell us what is wrong. Your report will be sent to the website team.
