Sonia Gandhi Book | సోనియా గాంధీ జ్ఞాపకాలు..

Published: 10 Nov 2026 • 12:15 PM

* ఇటలీ నుంచి ప్రధాని పదవి నిరాకరణ వరకు

* ప్రధాని పదవిని ఎందుకు వద్దనుకున్నారు

* తన పుస్తకంలో సోనియా గాంధీ కీలక విషయాలు

ఆకేరు న్యూస్, డెస్క్: ఇటలీలోని చిన్న పట్టణంలో సాధారణ బాల్యం.. కేంబ్రిడ్జ్‌లో రాజీవ్ గాంధీతో పరిచయం.. ప్రేమ, పెళ్లి.. భారతదేశంలో కొత్త జీవితం.. ఆ తర్వాత వరుస వ్యక్తిగత విషాదాలు.. చివరకు దేశ రాజకీయాల్లో కీలక నాయకురాలిగా ఎదుగుదల. కాంగ్రెస్ అగ్రనేత సోనియా గాంధీ తన జీవితంలో ఎదురైన అనుభవాలు, భావోద్వేగాలు, రాజకీయ ప్రయాణంలోని కీలక ఘట్టాలను ‘Belonging: A Journey of Love’ పుస్తకంలో ఆవిష్కరించారు. నవంబర్ 10న విడుదలైన ఈ పుస్తకంలో తన బాల్యం నుంచి 2004లో ప్రధానమంత్రి పదవిని నిరాకరించిన నిర్ణయం వరకు అనేక ఆసక్తికర విషయాలను వెల్లడించారు.

* సాధారణ కుటుంబం నుంచి భారతదేశం వరకు

1946లో ఇటలీలోని ఒక కాథలిక్ కుటుంబంలో జన్మించిన సోనియా గాంధీ బాల్యం రెండో ప్రపంచ యుద్ధం తర్వాతి పరిస్థితుల్లో గడిచింది. ఇటలీలోని చిన్న పట్టణంలో సాధారణ కుటుంబ వాతావరణంలో పెరిగిన ఆమెకు అప్పట్లో భారత రాజకీయాలతో ఎలాంటి సంబంధం లేదు. చదువుల కోసం ఇంగ్లండ్‌లోని కేంబ్రిడ్జ్‌కు వెళ్లిన తర్వాత ఆమె జీవితంలో కీలక మలుపు మొదలైంది. 1965లో కేంబ్రిడ్జ్‌లో చదువుకుంటున్న సమయంలో రాజీవ్ గాంధీతో పరిచయం ఏర్పడింది. ఒక గ్రీకు రెస్టారెంట్‌లో తొలిసారి కలుసుకున్నామని సోనియా తన జ్ఞాపకాల్లో పేర్కొన్నారు. ఆ పరిచయం క్రమంగా ప్రేమగా మారింది. 1968లో ఇద్దరూ వివాహం చేసుకున్నారు. అనంతరం భారతదేశానికి వచ్చి నెహ్రూ కుటుంబంలో సభ్యురాలిగా కొత్త జీవితాన్ని ప్రారంభించారు. భారతీయ సంప్రదాయాలు, ఆహారపు అలవాట్లు, భాష, సంస్కృతికి అలవాటు పడిన విధానాన్ని కూడా పుస్తకంలో వివరించారు. అత్త ఇందిరా గాంధీతో తన అనుబంధం, కుటుంబ సభ్యులతో గడిపిన రోజులు, భారతదేశం తనకు క్రమంగా ఎలా సొంత దేశంగా మారిందనే విషయాలను పంచుకున్నారు.

* ప్రజలతో బలమైన అనుబంధం

సోనియా గాంధీ జీవితంలో వరుస విషాదాలు తీవ్ర ప్రభావం చూపాయి. 1980లో సంజయ్ గాంధీ విమాన ప్రమాదంలో మరణించడం, 1984లో ఇందిరా గాంధీ హత్య, 1991లో రాజీవ్ గాంధీ హత్య ఆమె కుటుంబాన్ని తీవ్ర విషాదంలోకి నెట్టాయి. రాజీవ్ గాంధీ రాజకీయాల్లోకి రావడాన్ని మొదట్లో తాను వ్యతిరేకించానని, ఆయన భద్రత గురించి ఎప్పుడూ ఆందోళన చెందేదాన్నని సోనియా గుర్తుచేసుకున్నారు. ఇందిరా గాంధీ హత్య తర్వాత రాజీవ్ రాజకీయాల్లోకి రావడం, ఆ తర్వాత ఆయన కూడా హత్యకు గురికావడం తన జీవితాన్ని పూర్తిగా మార్చేశాయని వివరించారు. రాజీవ్ గాంధీ మరణం తర్వాత కొంతకాలం రాజకీయాలకు దూరంగా ఉండి పిల్లలు రాహుల్, ప్రియాంకల పెంపకంపై దృష్టి పెట్టారు. అయితే కుటుంబంలో ఎదురైన విషాదాలు, ప్రజల నుంచి లభించిన ఆదరణ, భారతదేశంతో ఏర్పడిన అనుబంధం ఆమెను క్రమంగా ప్రజాజీవితంలోకి నడిపించాయి. 1998లో కాంగ్రెస్ పార్టీ నాయకత్వ బాధ్యతలు స్వీకరించి జాతీయ రాజకీయాల్లో కీలక పాత్ర పోషించడం ప్రారంభించారు. తనకు వ్యక్తిగతంగా ఎదురైన నష్టాల సమయంలో భారత ప్రజలు చూపిన ప్రేమ, ఆదరణ తనలో దేశం పట్ల బాధ్యతను మరింత పెంచాయని పుస్తకంలో వివరించారు. ఇటలీలో పుట్టి పెరిగినప్పటికీ, భారతదేశమే తన జీవితానికి కొత్త అర్థాన్ని ఇచ్చిందనే భావనను తన జ్ఞాపకాల ద్వారా పంచుకున్నారు.

* 2004లో ప్రధాని పదవిని ఎందుకు నిరాకరించారు..

సోనియా గాంధీ పుస్తకంలో అత్యంత ఆసక్తికరమైన అంశం 2004లో ప్రధానమంత్రి పదవిని నిరాకరించిన నిర్ణయం. ఆ ఏడాది లోక్‌సభ ఎన్నికల్లో కాంగ్రెస్ నేతృత్వంలోని యూపీఏ కూటమి విజయం సాధించింది. దీంతో సోనియా గాంధీ ప్రధానమంత్రి అవుతారని దేశవ్యాప్తంగా చర్చ జరిగింది. కాంగ్రెస్ పార్లమెంటరీ పార్టీ కూడా ఆమెను తమ నాయకురాలిగా ఎన్నుకుంది. అయితే ఎన్నికలకు ముందే తన పిల్లలు రాహుల్, ప్రియాంకలతో ఈ విషయంపై చర్చించినట్లు సోనియా వెల్లడించారు. ప్రధానమంత్రి పదవిని స్వీకరించాలనే ఆలోచన తనకు లేదని అప్పుడే స్పష్టం చేసినట్లు తెలిపారు. ఇందిరా గాంధీ, రాజీవ్ గాంధీల హత్యలను ప్రత్యక్షంగా చూసిన కుటుంబ సభ్యులుగా రాహుల్, ప్రియాంకలు ఆ పదవిని చేపట్టవద్దని భావించారని పేర్కొన్నారు. ఆ పదవితో ముడిపడిన భద్రతాపరమైన ప్రమాదాల గురించి వారు ఆందోళన చెందారని వివరించారు. మరోవైపు, తన ఇటలీ మూలాలను రాజకీయ ప్రత్యర్థులు ఎన్నికల ప్రచారంలో ప్రధాన అంశంగా మార్చారని, ప్రధానమంత్రి పదవిని స్వీకరిస్తే ఆ అంశంపై మరింత రాజకీయ ఉద్రిక్తతలు తలెత్తే అవకాశం ఉందని ఆమె భావించినట్లు పుస్తకంలోని వివరాలు వెల్లడిస్తున్నాయి. తాను ప్రేమించిన, తనకు ఆదరణ ఇచ్చిన భారతదేశానికి అలాంటి పరిణామాలు మంచివి కావని ఆలోచించినట్లు పేర్కొన్నారు.

అయితే ప్రధానమంత్రి పదవిని నిరాకరించాలనే నిర్ణయం అంత సులభంగా తీసుకోలేదని సోనియా వివరించారు. ఒకవైపు ఆ పదవిని స్వీకరించకూడదనే తన వ్యక్తిగత నిర్ణయం బలంగా ఉండగా, మరోవైపు పార్టీ కార్యకర్తలు, తనకు ఓటు వేసిన ప్రజల నమ్మకానికి న్యాయం చేయాలనే బాధ్యత తనను ఆలోచనలో పడేసిందని గుర్తుచేసుకున్నారు. ఈ రెండు ఆలోచనల మధ్య తాను తీవ్ర సంఘర్షణకు గురైనట్లు వివరించారు. చివరకు తన అంతరాత్మ చెప్పిన నిర్ణయానికే కట్టుబడి ఉండాలని నిర్ణయించుకున్నారు. పిల్లలతో మరోసారి మాట్లాడిన తర్వాత ప్రధాని పదవిని స్వీకరించబోనని స్పష్టం చేయాలని నిర్ణయించుకున్నట్లు తన జ్ఞాపకాలలో పేర్కొన్నారు.

* మన్మోహన్ సింగ్ పేరును ప్రతిపాదించిన సోనియా

2004 మేలో కాంగ్రెస్ పార్లమెంటరీ పార్టీ సమావేశంలో సోనియా గాంధీ ప్రధానమంత్రి పదవిని స్వీకరించబోనని ప్రకటించారు. ప్రధానమంత్రి పదవి తన లక్ష్యం కాదని, తన నిర్ణయాన్ని గౌరవించాలని పార్టీ నేతలను కోరారు. అనంతరం డాక్టర్ మన్మోహన్ సింగ్ పేరును ప్రధానమంత్రి పదవికి ప్రతిపాదించారు. దీంతో మన్మోహన్ సింగ్ దేశ ప్రధానిగా బాధ్యతలు చేపట్టారు. ఈ నిర్ణయం తీసుకునే సమయంలో పార్టీ నేతలు తనను ఒప్పించేందుకు ప్రయత్నించడం, తన పిల్లలు రాహుల్, ప్రియాంకలు తన నిర్ణయానికి మద్దతుగా నిలవడం వంటి సంఘటనలను కూడా సోనియా పుస్తకంలో వివరించారు. చివరకు తన నిర్ణయంపై స్పష్టతకు వచ్చి, ప్రధానమంత్రి పదవిని నిరాకరించినట్లు తెలిపారు.

* తన జీవితానికి అద్దం పట్టిన పుస్తకం

‘Belonging: A Journey of Love’ పుస్తకం కేవలం రాజకీయ జీవిత విశేషాలకే పరిమితం కాలేదు. ప్రేమ, కుటుంబ బంధాలు, వ్యక్తిగత నష్టాలు, బాధ్యతలు, భారతదేశంతో తనకున్న అనుబంధం వంటి అంశాలకు ఇందులో ప్రాధాన్యం ఇచ్చారు. తన కుటుంబం గురించి ఎన్నో కథనాలు వెలువడ్డాయని, అయితే వారి ఆలోచనలు, నిర్ణయాలు, మానవీయ కోణాలను తన మాటల్లో చెప్పాలనే ఉద్దేశంతో ఈ పుస్తకం రాసినట్లు సోనియా వెల్లడించారు. ఇటలీలో ప్రారంభమైన తన జీవన ప్రయాణం భారతదేశం వరకు, అక్కడి నుంచి జాతీయ రాజకీయాల కేంద్రం వరకు ఎలా సాగిందో ఈ పుస్తకం వివరిస్తుంది. ముఖ్యంగా యుద్ధానంతర ఇటలీలో గడిచిన బాల్యం, రాజీవ్ గాంధీతో ప్రేమకథ, భారత్‌లో ఎదురైన వ్యక్తిగత విషాదాలు, ప్రజలతో ఏర్పడిన అనుబంధం, 2004లో ప్రధాని పదవిని నిరాకరించడానికి దారితీసిన ఆలోచనలు ఈ పుస్తకంలోని ప్రధాన అంశాలుగా నిలిచాయి.