Nagar Kurnool Irrigation DEE | ఇరిగేషన్ డీఈఈపై ఏసీబీ పంజా..!

Published: 13 Nov 2026 • 01:42 PM

* రూ.100 కోట్ల ఆస్తులు వెలుగులోకి..
* 25 ఎకరాల భూమి, విల్లా, ప్లాట్లు.. 50 తులాల బంగారం స్వాధీనం..
* ఆదాయానికి మించిన ఆస్తుల కేసులో అధికారి అరెస్ట్

ఆకేరు న్యూస్, హైదరాబాద్ : తెలంగాణలో అవినీతి నిరోధక శాఖ (ఏసీబీ) మరోసారి సంచలనం సృష్టించింది. నాగర్‌కర్నూల్ జిల్లాలో పనిచేస్తున్న ఇరిగేషన్ అండ్ క్యాడ్ శాఖ డిప్యూటీ ఎగ్జిక్యూటివ్ ఇంజినీర్ (డీఈఈ) రాగిరి సత్యనారాయణ గౌడ్‌పై ఆదాయానికి మించిన ఆస్తుల ఆరోపణలతో ఏసీబీ అధికారులు విస్తృతంగా సోదాలు నిర్వహించారు.

హైదరాబాద్‌తో పాటు నాగర్‌కర్నూల్, వనపర్తి జిల్లాల్లో మొత్తం పది ప్రాంతాల్లో ఏకకాలంలో తనిఖీలు చేపట్టారు. ఈ సోదాల్లో భారీగా స్థిర, చరాస్తులకు సంబంధించిన పత్రాలను గుర్తించారు. ప్రభుత్వ లెక్కల ప్రకారం గుర్తించిన ఆస్తుల విలువ సుమారు రూ.6 నుంచి రూ.7 కోట్ల వరకు ఉన్నట్లు తెలుస్తోంది. కాగా బహిరంగ మార్కెట్ విలువ అంచనాల ప్రకారం రూ.100 కోట్ల వరకు ఉంటుందని సమాచారం.

* పది ప్రాంతాల్లో ఏకకాలంలో సోదాలు..

నాగర్‌కర్నూల్ జిల్లాలో ఇరిగేషన్ డీఈఈగా విధులు నిర్వహిస్తున్న రాగిరి సత్యనారాయణ గౌడ్‌పై ఆదాయానికి మించి ఆస్తులు కూడబెట్టారంటూ ఏసీబీకి ఫిర్యాదులు అందాయి. దీంతో సుమారు రెండు నెలలుగా ఆయనపై నిఘా పెట్టిన అధికారులు గురువారం ఉదయం సెర్చ్ వారెంట్లతో రంగంలోకి దిగారు.

హైదరాబాద్‌లోని ఆయన నివాసంతో పాటు నాగర్‌కర్నూల్‌లోని కార్యాలయం, వనపర్తి జిల్లా షాపూర్‌లోని స్వగృహం, బంధువుల ఇళ్లు, ఫామ్‌హౌస్‌లతో కలిపి మొత్తం పది ప్రాంతాల్లో తనిఖీలు చేపట్టారు.

* 25 ఎకరాల భూమి.. విల్లా.. ఫ్లాట్లు గుర్తింపు..

ఏసీబీ తనిఖీల్లో సత్యనారాయణ గౌడ్‌కు సంబంధించిన పలు ఆస్తుల వివరాలు వెలుగులోకి వచ్చాయి. వనపర్తి జిల్లాలో సుమారు 25 ఎకరాల వ్యవసాయ భూమి, ఫామ్‌హౌస్, తుక్కుగూడలో విలాసవంతమైన విల్లా, హైదరాబాద్‌లో రెండు ఫ్లాట్లు, పలు ప్రాంతాల్లో ఓపెన్ ప్లాట్లకు సంబంధించిన పత్రాలను అధికారులు గుర్తించారు.

అలాగే సుమారు 50 తులాల బంగారు ఆభరణాలు, మూడు నుంచి నాలుగు కార్లు, ఒక ట్రాక్టర్‌కు సంబంధించిన వివరాలు కూడా తనిఖీల్లో బయటపడ్డాయి. ఎల్‌ఐసీ పాలసీలు, మ్యూచువల్ ఫండ్లు, ఇతర పెట్టుబడులకు సంబంధించిన పత్రాలను సైతం అధికారులు పరిశీలించారు.

* ప్రభుత్వ విలువ రూ.6-7 కోట్లు..

ఏసీబీ అధికారులు గుర్తించిన ఆస్తుల ప్రభుత్వ విలువ సుమారు రూ.6 నుంచి రూ.7 కోట్ల వరకు ఉన్నట్లు ప్రాథమిక సమాచారం. అయితే భూములు, విల్లాలు, ఫ్లాట్లు, ఇతర స్థిరాస్తుల ప్రస్తుత మార్కెట్ విలువను లెక్కిస్తే ఈ మొత్తం గణనీయంగా పెరిగే అవకాశం ఉందని అధికారులు అంచనా వేసినట్లు తెలుస్తోంది.

మార్కెట్ విలువ రూ.20 కోట్లకు పైగా, మరికొన్నింటిలో రూ.70 కోట్ల నుంచి రూ.100 కోట్ల వరకు ఉంటుందని అంచనాలు వెలువడ్డాయి. పూర్తి విలువను నిర్ధారించాల్సి ఉంది.

* 2005లో ఉద్యోగంలో చేరిన సత్యనారాయణ..

రాగిరి సత్యనారాయణ గౌడ్ 2005లో ఇరిగేషన్ శాఖలో అసిస్టెంట్ ఇంజినీర్‌గా ఉద్యోగంలో చేరినట్లు సమాచారం. అనంతరం వివిధ హోదాల్లో పనిచేస్తూ ప్రస్తుతం నాగర్‌కర్నూల్ జిల్లాలో డిప్యూటీ ఎగ్జిక్యూటివ్ ఇంజినీర్‌గా విధులు నిర్వహిస్తున్నారు.

ఆయన భార్య కూడా ట్రాన్స్‌కోలో అసిస్టెంట్ డైరెక్టర్‌గా పనిచేస్తున్నట్లు వార్తా కథనాలు వెల్లడించాయి. కుటుంబ సభ్యుల పేర్లపై ఉన్న ఆస్తులు, ఆర్థిక లావాదేవీల వివరాలను కూడా ఏసీబీ అధికారులు పరిశీలిస్తున్నారు.

* అరెస్ట్.. దర్యాప్తు కొనసాగింపు..

సోదాల సందర్భంగా గుర్తించిన ఆస్తులకు సంబంధించి కీలక పత్రాలను ఏసీబీ అధికారులు స్వాధీనం చేసుకున్నారు. సత్యనారాయణ గౌడ్‌ను అదుపులోకి తీసుకున్నట్లు అధికారులు వెల్లడించారు. ఆయనను ఏసీబీ ప్రత్యేక కోర్టులో హాజరుపరిచి రిమాండ్‌కు తరలించినట్లు సమాచారం.

ఆదాయ వనరులు, ఆస్తుల కొనుగోళ్లు, బ్యాంకు లావాదేవీలు, కుటుంబ సభ్యుల పేర్లపై ఉన్న ఆస్తులపై దర్యాప్తు కొనసాగుతోంది. ప్రభుత్వ ఉద్యోగుల ఆదాయానికి మించి ఆస్తులు ఉన్నాయనే ఫిర్యాదులపై ఏసీబీ దృష్టి సారించిన నేపథ్యంలో ఈ తనిఖీలు రాష్ట్రవ్యాప్తంగా చర్చనీయాంశంగా మారాయి. సోదాలు పూర్తయిన తర్వాత ఆస్తుల పూర్తి వివరాలు, వాటి విలువపై అధికారికంగా మరింత సమాచారం వెల్లడయ్యే అవకాశం ఉంది.