మైక్రోసాఫ్ట్‌ (Microsoft) సేవలు
* 36 గంటల అంతరాయానికి తెర..
* నెట్వర్క్ అప్‌గ్రేడ్‌లో సాంకేతిక లోపమే కారణం
ఆకేరు న్యూస్‌, డెస్క్‌: ప్రపంచవ్యాప్తంగా కోట్లాది మంది వినియోగదారులను ఇబ్బందులకు గురిచేసిన మైక్రోసాఫ్ట్‌ (Microsoft) సేవల అంతరాయానికి ఎట్టకేలకు తెరపడింది. సుమారు 36 గంటల పాటు కొనసాగిన సాంకేతిక సమస్యను పరిష్కరించినట్లు సంస్థ నవంబర్‌ 14న ప్రకటించింది. దీంతో ఔట్‌లుక్‌, మైక్రోసాఫ్ట్‌ టీమ్స్‌, కోపైలట్‌, మైక్రోసాఫ్ట్‌ 365 సహా పలు క్లౌడ్‌ ఆధారిత సేవలు తిరిగి అందుబాటులోకి వచ్చాయి. నవంబర్‌ 12న ప్రారంభమైన ఈ అంతరాయం 13వ తేదీ వరకు కొనసాగడంతో ప్రపంచవ్యాప్తంగా కార్యాలయ కార్యకలాపాలు, ఈ-మెయిల్‌ కమ్యూనికేషన్‌, ఆన్‌లైన్‌ సమావేశాలు, వ్యాపార లావాదేవీలపై ప్రభావం పడింది.
నవంబర్‌ 14న విడుదల చేసిన ప్రకటనలో సమస్యకు కారణమైన సాంకేతిక లోపాన్ని సరిచేసినట్లు మైక్రోసాఫ్ట్‌ వెల్లడించింది. అయితే సేవల పనితీరు, ఆలస్యమైన ఈ-మెయిల్స్‌, పెండింగ్‌ సందేశాల ప్రాసెసింగ్‌ను ఇంకా పర్యవేక్షిస్తున్నట్లు తెలిపింది.
* అమెరికాలో మొదలై ప్రపంచవ్యాప్తంగా ప్రభావం
తొలుత అమెరికా ప్రాంతంలో ప్రారంభమైన కనెక్టివిటీ సమస్యలు క్రమంగా ప్రపంచవ్యాప్తంగా విస్తరించాయి. ముఖ్యంగా ఎక్స్ఛేంజ్‌ ఆన్‌లైన్‌ మెయిల్‌బాక్స్‌లను యాక్సెస్‌ చేయడంలో వినియోగదారులు ఇబ్బందులు ఎదుర్కొన్నారు. ఆ తర్వాత ఔట్‌లుక్‌, టీమ్స్‌, కోపైలట్‌, షేర్‌పాయింట్‌, ప్లానర్‌, టు డూ వంటి సేవలపైనా ప్రభావం పడింది.
టీమ్స్‌లో సాధారణ సందేశాలు, కొన్ని ఆన్‌లైన్‌ సమావేశాలు పనిచేసినప్పటికీ క్యాలెండర్లు, సమావేశాల షెడ్యూలింగ్‌ వంటి సదుపాయాలు దెబ్బతిన్నాయి. కోపైలట్‌లో చాట్‌లు తెరవడం, ఈ-మెయిల్స్‌, క్యాలెండర్లు, ఫైళ్లకు సంబంధించిన సమాచారాన్ని పొందడంలోనూ సమస్యలు తలెత్తాయి.
*నెట్వర్క్ అప్‌గ్రేడ్‌లో లోపం
ఈ అంతరాయంపై చేపట్టిన ప్రాథమిక దర్యాప్తులో నెట్వర్క్ సామర్థ్యాన్ని విస్తరించేందుకు గతంలో చేపట్టిన అప్‌గ్రేడ్‌లోని సాంకేతిక లోపమే ప్రధాన కారణమని మైక్రోసాఫ్ట్‌ గుర్తించింది. ఇటీవల చేసిన మరో నెట్వర్క్ మార్పు తర్వాత ఈ సమస్య బయటపడినట్లు వివరించింది.
దీంతో కొన్ని సర్వర్లు పనిచేయడం నిలిచిపోయాయి. వాటిపై ఉండాల్సిన ట్రాఫిక్‌ ఇతర సర్వర్లకు మళ్లడంతో వాటిపై అదనపు ఒత్తిడి ఏర్పడింది. ఫలితంగా పలు ప్రాంతాల్లోని సాంకేతిక మౌలిక సదుపాయాలు ప్రభావితమై సేవలు నిలిచిపోయాయి. అయితే వినియోగదారుల సంఖ్య ఒక్కసారిగా పెరగడం వల్ల ఈ సమస్య తలెత్తలేదని సంస్థ స్పష్టం చేసింది. సైబర్‌ దాడి, హ్యాకింగ్‌ లేదా ఏఐ టూల్స్‌ ప్రమేయం కూడా లేదని వెల్లడించింది.
*దశలవారీగా పునరుద్ధరణ
సేవలను తిరిగి అందుబాటులోకి తీసుకురావడం మైక్రోసాఫ్ట్‌ ఇంజినీరింగ్‌ బృందానికి సవాలుగా మారింది. తొలుత పునరుద్ధరించిన కొన్ని సర్వర్లపైకి వినియోగదారుల ట్రాఫిక్‌ను మళ్లించగానే అవి మళ్లీ స్పందించడం నిలిపివేశాయి.
దీంతో మొత్తం ట్రాఫిక్‌ను ఒకేసారి అనుమతించకుండా సర్వర్ల సామర్థ్యాన్ని క్రమంగా పెంచుతూ, ప్రతి దశలో వ్యవస్థల స్థిరత్వాన్ని పరీక్షించారు. ఈ ప్రక్రియకు ఎక్కువ సమయం పట్టినప్పటికీ మరోసారి అంతరాయం తలెత్తకుండా జాగ్రత్తగా సేవలను పునరుద్ధరించినట్లు సంస్థ తెలిపింది. ఆలస్యమైన ఈ-మెయిల్స్‌ తిరిగి అందేలా, పెండింగ్‌ సందేశాలు ప్రాసెస్‌ అయ్యేలా టైమ్‌అవుట్‌ వ్యవధిని 48 గంటలకు పెంచినట్లు వెల్లడించింది.
*ఇండిగో సేవలపైనా ప్రభావం
మైక్రోసాఫ్ట్‌ సేవల అంతరాయం భారత్‌లోని కార్పొరేట్‌ రంగంతో పాటు విమానయాన సంస్థలపైనా ప్రభావం చూపింది. దేశీయ విమానయాన సంస్థ ఇండిగో తన ఈ-మెయిల్‌ కస్టమర్‌ సపోర్ట్‌ ఛానల్‌లో సమస్యలు ఎదురయ్యాయని వెల్లడించింది. ప్రయాణికుల నుంచి ఈ-మెయిల్స్‌ స్వీకరించడంలో ఇబ్బందులు తలెత్తినప్పటికీ ప్రత్యామ్నాయ మార్గాల ద్వారా సేవలను కొనసాగించినట్లు తెలిపింది.
మరోవైపు మైక్రోసాఫ్ట్‌ ఇండియా, దక్షిణాసియా అధ్యక్షుడు పునీత్‌ చందోక్‌ స్పందిస్తూ.. క్లిష్ట పరిస్థితుల్లో భారత్‌తో పాటు ప్రపంచవ్యాప్తంగా ఉన్న సాంకేతిక బృందాలు అవిశ్రాంతంగా శ్రమించి సేవలను పునరుద్ధరించాయని పేర్కొన్నారు.
*వినియోగదారులకు క్షమాపణలు
ఈ అంతరాయం కారణంగా ఇబ్బందులు ఎదుర్కొన్న వినియోగదారులు, వ్యాపార భాగస్వాములకు మైక్రోసాఫ్ట్‌ క్షమాపణలు తెలిపింది. వినియోగదారులు తమపై ఉంచిన నమ్మకాన్ని బాధ్యతగా పరిగణిస్తున్నామని పేర్కొంది. ఈ ఘటనపై పూర్తిస్థాయి సమీక్ష నిర్వహించి, సమస్యకు అసలు కారణాలు, భవిష్యత్తులో ఇలాంటి అంతరాయాలు పునరావృతం కాకుండా తీసుకోబోయే చర్యలతో కూడిన సమగ్ర నివేదికను విడుదల చేస్తామని హామీ ఇచ్చింది.
ప్రపంచవ్యాప్తంగా 43 కోట్ల మందికి పైగా వినియోగదారులు మైక్రోసాఫ్ట్‌ 365 సేవలపై ఆధారపడుతున్న నేపథ్యంలో ఈ ఘటన ప్రాధాన్యం సంతరించుకుంది. ప్రముఖ సాంకేతిక సేవలు నిలిచిపోయినప్పుడు వ్యాపార కార్యకలాపాలు సజావుగా కొనసాగించేందుకు ప్రత్యామ్నాయ ప్రణాళికలు సిద్ధం చేసుకోవాల్సిన అవసరాన్ని ఈ అంతరాయం మరోసారి గుర్తుచేసింది.
About the Author
Please tell us what is wrong. Your report will be sent to the website team.
