Cyclone Aquan | బంగాళాఖాతంలో తుపాను టెన్షన్..!

Published: 15 Nov 2026 • 02:40 PM

* రేపు ‘అక్వాన్’ తుపానుగా మారే అవకాశం
* గంటకు 100 కి.మీ వేగంతో గాలులు..
* ఐఎండీ హెచ్చరిక

ఆకేరు న్యూస్, హైదరాబాద్ : బంగాళాఖాతంలో ఏర్పడిన అల్పపీడనం వాయుగుండంగా (Cyclone Aquan) బలపడింది. ఆగ్నేయ, దానికి ఆనుకుని ఉన్న నైరుతి బంగాళాఖాతంలో ఈ వాయుగుండం కేంద్రీకృతమై ఉన్నట్లు భారత వాతావరణ శాఖ (IMD) వెల్లడించింది. సముద్రంలో ఏర్పడిన ఈ వాతావరణ వ్యవస్థ రానున్న రోజుల్లో మరింత బలపడే అవకాశం ఉందని అంచనా వేసింది.

* 700 కిలోమీటర్ల దూరంలో వాయుగుండం

నవంబర్ 15న ఉదయం విడుదల చేసిన వాతావరణ శాఖ బులెటిన్ ప్రకారం.. ఈ వాయుగుండం అండమాన్ దీవుల్లోని శ్రీ విజయపురం (పోర్ట్ బ్లెయిర్)కు పశ్చిమ-నైరుతి దిశగా సుమారు 700 కిలోమీటర్ల దూరంలో, చెన్నైకి ఆగ్నేయంగా 860 కిలోమీటర్ల దూరంలో కేంద్రీకృతమై ఉంది. విశాఖపట్నానికి దక్షిణ-ఆగ్నేయంగా 1,040 కిలోమీటర్లు, ఒడిశాలోని గోపాల్‌పూర్‌కు 1,160 కిలోమీటర్ల దూరంలో ఉన్నట్లు ఐఎండీ తెలిపింది.

* 16న తుపానుగా.. 17న తీవ్ర తుపానుగా!

ఈ వాయుగుండం ఉత్తర-వాయవ్య దిశగా కదులుతూ నవంబర్ 16న దక్షిణ మధ్య బంగాళాఖాతంలో తుపానుగా (Cyclone Aquan) బలపడే అవకాశం ఉందని వాతావరణ శాఖ అంచనా వేసింది. అనంతరం నవంబర్ 17న పశ్చిమ మధ్య బంగాళాఖాతంలో తీవ్ర తుపానుగా మారవచ్చని పేర్కొంది. ఈ తుపానుకు ‘అక్వాన్’ (Akvan) అనే పేరు పెట్టనున్నారు.

* గాలుల వేగం పెరిగే అవకాశం..

ఐఎండీ అంచనాల ప్రకారం నవంబర్ 15న గంటకు 40–50 కిలోమీటర్ల వేగంతో గాలులు వీచే అవకాశం ఉంది. ఈదురుగాలుల వేగం గంటకు 60 కిలోమీటర్ల వరకు ఉండవచ్చు. నవంబర్ 16న తుపానుగా మారే సమయంలో గాలుల వేగం గంటకు 75–85 కిలోమీటర్లకు చేరవచ్చని అంచనా. నవంబర్ 17న తీవ్ర తుపానుగా బలపడితే గంటకు 90–100 కిలోమీటర్ల వేగంతో గాలులు వీచే అవకాశం ఉంది.

* తీర ప్రాంతాలకు అప్రమత్తత..

బంగాళాఖాతంలో సముద్ర పరిస్థితులు క్రమంగా అల్లకల్లోలంగా మారే అవకాశం ఉంది. అండమాన్ సముద్రం, అండమాన్ నికోబార్ దీవులు, దక్షిణ బంగాళాఖాతంలోని పలు ప్రాంతాల్లో బలమైన గాలులు, వర్షాలు నమోదయ్యే సూచనలు ఉన్నాయి. సముద్రంలో ఉన్న మత్స్యకారులు నవంబర్ 15లోగా తీరానికి చేరుకోవాలని, తదుపరి సూచనలు వచ్చే వరకు సముద్రంలోకి వేటకు వెళ్లవద్దని వాతావరణ శాఖ హెచ్చరించినట్లు వార్తా నివేదికలు పేర్కొన్నాయి.

* తీరం దాటే ప్రాంతంపై ఇంకా స్పష్టత లేదు

ఈ వాయుగుండం ఉత్తర-వాయవ్య దిశగా కదిలే అవకాశం ఉందని ఐఎండీ తెలిపింది. కొన్ని వాతావరణ నమూనాలు ఉత్తరాంధ్ర తీరం వైపు కదలికను సూచిస్తున్నప్పటికీ, తుపాను తదుపరి గమనం, తీవ్రత, తీరం దాటే ప్రాంతంపై ఇంకా స్పష్టత లేదు. కాబట్టి తీర ప్రాంత ప్రజలు వాతావరణ శాఖ తాజా హెచ్చరికలను గమనించాలని సూచిస్తున్నారు.