Voyager 1
* భూమికి ఒక కాంతి దినం దూరం
* 24 గంటలు పడుతున్న రేడియో సిగ్నల్
ఆకేరు న్యూస్, డెస్క్: అంతరిక్ష పరిశోధనలో అమెరికా అంతరిక్ష పరిశోధనా సంస్థ నాసా (NASA)కు చెందిన వాయేజర్-1 (Voyager 1) మరో అరుదైన చరిత్ర సృష్టించింది. మానవులు తయారు చేసిన వస్తువుల్లో భూమి నుంచి అత్యంత దూరంలో ప్రయాణిస్తున్న ఈ వ్యోమనౌక నవంబర్ 18న ఒక కాంతి దినం (One Light-Day) దూరాన్ని చేరుకుంది. అంటే భూమి నుంచి పంపించే రేడియో సంకేతం (Radio Signal) వాయేజర్-1ను చేరుకోవడానికి సుమారు 24 గంటల సమయం పడుతుంది. అక్కడి నుంచి పంపించే సమాచారం తిరిగి భూమికి చేరడానికి మరో 24 గంటలు పడుతుంది. దీంతో ఒక సందేశం పంపి, దానికి సమాధానం తెలుసుకోవడానికి దాదాపు రెండు రోజులు వేచి చూడాల్సిన పరిస్థితి ఏర్పడింది. అంతరిక్ష పరిశోధన చరిత్రలో ఇదొక కీలక మైలురాయిగా నిలిచింది.
25.9 బిలియన్ కిలోమీటర్ల దూరం!
నాసా సమాచారం ప్రకారం.. వాయేజర్-1 భూమికి సుమారు 25.9 బిలియన్ కిలోమీటర్లు (16.1 బిలియన్ మైళ్లు) దూరంలో ఉంది. కాంతి ఒక రోజులో ప్రయాణించే దూరాన్ని కాంతి దినం (Light-Day) అంటారు. కాంతి వేగం సెకనుకు సుమారు 3 లక్షల కిలోమీటర్లు. ఈ వేగంతో ప్రయాణించే రేడియో తరంగాలు సైతం వాయేజర్-1ను చేరుకోవడానికి 24 గంటలు తీసుకుంటాయి. ఈ దూరం కేవలం ప్రయాణ సమయాన్ని మాత్రమే కాదు.. విశ్వం ఎంత విశాలంగా ఉందో కూడా తెలియజేస్తోంది.
1977లో మొదలైన ప్రయాణం
వాయేజర్-1ను 1977 సెప్టెంబర్ 5న నాసా అంతరిక్షంలోకి ప్రయోగించింది. తొలుత గురు గ్రహం (Jupiter), శని గ్రహం (Saturn)లను అధ్యయనం చేయడమే దీని ప్రధాన లక్ష్యం. ఈ గ్రహాల సమీపం నుంచి ప్రయాణిస్తూ కీలక సమాచారాన్ని, చిత్రాలను భూమికి పంపించింది. అయితే ప్రాథమిక లక్ష్యాలను పూర్తి చేసిన తర్వాత కూడా తన ప్రయాణాన్ని కొనసాగించింది. 2012లో సౌర కుటుంబం చుట్టూ ఉన్న సూర్యుడి ప్రభావ పరిధి (Heliosphere)ను దాటి అంతర్నక్షత్ర అంతరిక్షంలోకి (Interstellar Space) ప్రవేశించింది. ఈ ఘనత సాధించిన తొలి వ్యోమనౌకగా చరిత్ర సృష్టించింది. ప్రస్తుతం నక్షత్రాల మధ్య ఉన్న అంతరిక్ష పరిస్థితులపై సమాచారాన్ని పంపిస్తోంది.
భూమి సందేశాలతో గోల్డెన్ రికార్డు
వాయేజర్-1లో మరో ప్రత్యేక ఆకర్షణ గోల్డెన్ రికార్డు (Golden Record). భూమిపై జీవితం, మానవ సంస్కృతి, ప్రకృతి, సంగీతం, వివిధ భాషల్లో పలకరింపులు, ప్రకృతి శబ్దాలు, చిత్రాలకు సంబంధించిన సమాచారాన్ని ఇందులో భద్రపరిచారు. భవిష్యత్తులో విశ్వంలోని ఇతర జీవరాశులు ఈ వ్యోమనౌకను గుర్తిస్తే భూమి గురించి తెలుసుకునే అవకాశం కల్పించాలన్న ఉద్దేశంతో దీనిని రూపొందించారు. మానవ నాగరికతకు ప్రతీకగా నిలిచే ఈ రికార్డు వాయేజర్ ప్రయాణానికి ప్రత్యేక గుర్తింపును తీసుకొచ్చింది.
తగ్గుతున్న విద్యుత్.. ఆగని ప్రయాణం
దాదాపు ఐదు దశాబ్దాలుగా అంతరిక్షంలో ప్రయాణిస్తున్న వాయేజర్-1లో విద్యుత్ ఉత్పత్తి సామర్థ్యం క్రమంగా తగ్గుతోంది. ఇందులోని ప్లూటోనియం-238 క్షీణత (Radioactive Decay) ద్వారా వెలువడే వేడిని విద్యుత్తుగా మారుస్తారు. కాలక్రమేణా విద్యుత్ ఉత్పత్తి తగ్గుతుండటంతో నాసా శాస్త్రవేత్తలు విద్యుత్ ఆదా చర్యలు చేపడుతున్నారు. ఇందులో భాగంగా కొన్ని శాస్త్రీయ పరికరాలు, ఇతర వ్యవస్థలను దశలవారీగా నిలిపివేస్తున్నారు. తద్వారా అందుబాటులో ఉన్న విద్యుత్తును కీలక వ్యవస్థలకు కేటాయిస్తూ వ్యోమనౌకతో సంబంధాలను కొనసాగిస్తున్నారు. అయినప్పటికీ పనిచేస్తున్న పరికరాల ద్వారా అంతర్నక్షత్ర అంతరిక్షానికి సంబంధించిన విలువైన సమాచారాన్ని భూమికి పంపుతోంది.
2027లో 50 ఏళ్ల మైలురాయి
వాయేజర్-1 ప్రయాణం కేవలం ఒక అంతరిక్ష ప్రయోగం మాత్రమే కాదు. మానవ మేధస్సు, శాస్త్ర సాంకేతిక పరిజ్ఞానం సాధించిన అద్భుత విజయానికి నిదర్శనం. 1977లో ప్రారంభమైన ప్రయాణం 2027లో 50 ఏళ్ల మైలురాయిని చేరుకోనుంది. భూమి నుంచి ఒక కాంతి దినం దూరాన్ని చేరుకోవడం వల్ల వ్యోమనౌకలో ప్రత్యేకమైన మార్పులేమీ చోటుచేసుకోవు. అయితే భూమి నుంచి పంపిన సంకేతం అక్కడికి చేరడానికి ఒక రోజు పట్టేంత దూరం ప్రయాణించడం మానవ చరిత్రలో అపూర్వమైన ఘట్టం. దాదాపు అర్ధ శతాబ్దం తర్వాత కూడా విశ్వ రహస్యాలను అన్వేషిస్తూ ముందుకు సాగుతున్న వాయేజర్-1 ప్రయాణం శాస్త్రవేత్తలకు స్ఫూర్తినిస్తోంది.

Please tell us what is wrong. Your report will be sent to the website team.

