Adilabad
* నవజాత శిశువు మృతి
ఆకేరు న్యూస్, ఆదిలాబాద్ : ఆదిలాబాద్‌లోని రిమ్స్ ఆస్పత్రిలో అర్ధరాత్రి భారీ అగ్నిప్రమాదం చోటుచేసుకుంది. ఆస్పత్రిలోని పిల్లల వార్డులో ఏసీ యూనిట్‌ పేలిపోవడంతో ఒక్కసారిగా మంటలు చెలరేగాయి. దీంతో వార్డు మొత్తం దట్టమైన పొగ కమ్ముకుంది. పొగతో ఊపిరాడక ఓ నవజాత శిశువు మృతి చెందినట్లు అధికారులు తెలిపారు.
ప్రమాద సమయంలో పిల్లల వార్డులో ఉన్న 26 మంది చిన్నారులను సిబ్బంది, తల్లిదండ్రులు అప్రమత్తమై సురక్షితంగా బయటకు తీసుకొచ్చారు. దట్టమైన పొగల కారణంగా వార్డులో నుంచి బయటకు రావడం కష్టంగా మారడంతో.. అద్దాలను పగలగొట్టి మరీ చిన్నారులను బయటకు తీసుకొచ్చారు. అనంతరం వారిని ఆదిలాబాద్‌లోని వివిధ ఆస్పత్రులకు తరలించి చికిత్స అందిస్తున్నారు.
ప్రాథమికంగా షార్ట్‌ సర్క్యూట్‌ కారణంగానే ప్రమాదం జరిగినట్లు నిర్ధారించినట్లు అధికారులు తెలిపారు. సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తీసుకొచ్చారు. ప్రమాదానికి సంబంధించిన పరిస్థితులను ఉన్నతాధికారులు ఎప్పటికప్పుడు సమీక్షిస్తున్నారు. ఘటనపై మరిన్ని వివరాలు తెలియాల్సి ఉంది.
*మరో చిన్నారి మృతి..
ఆదిలాబాద్ రిమ్స్ ఆసుపత్రిలో చోటుచేసుకున్న అగ్నిప్రమాదంలో మరో చిన్నారి మృతి చెందింది. దీంతో ఈ ఘటనలో మృతుల సంఖ్య రెండుకు చేరింది. చిన్నారుల వార్డులో ఏసీ పేలడంతో అర్ధరాత్రి సమయంలో ప్రమాదం చోటుచేసుకుంది. ప్రమాదం సమయంలో వార్డులో ఉన్న చిన్నారులు, వారి తల్లిదండ్రులు తీవ్ర భయాందోళనకు గురయ్యారు.
ప్రమాదం జరిగిన వెంటనే అప్రమత్తమైన ఆసుపత్రి సిబ్బంది చిన్నారులను సురక్షిత ప్రాంతాలకు తరలించే ప్రయత్నం చేశారు. అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తీసుకొచ్చారు. అయితే పొగ వ్యాపించడంతో పలువురు చిన్నారులు తీవ్ర అస్వస్థతకు గురయ్యారు.
ప్రస్తుతం మరో 23 మంది చిన్నారుల పరిస్థితి ఆందోళనకరంగా ఉన్నట్లు సమాచారం. వారిని వైద్యులు ప్రత్యేకంగా పర్యవేక్షిస్తూ చికిత్స అందిస్తున్నారు. ఘటనపై అధికారులు విచారణ చేపట్టారు. ఏసీ పేలడానికి గల కారణాలు, అగ్నిప్రమాద సమయంలో భద్రతా ఏర్పాట్లపై అధికారులు ఆరా తీస్తున్నారు.
ప్రమాద ఘటనపై ఆసుపత్రి అధికారులు పూర్తి వివరాలను సేకరిస్తున్నారు. బాధిత చిన్నారుల కుటుంబ సభ్యులు ఆందోళనలో ఉన్నారు.
రిమ్స్‌కు కలెక్టర్.. మాజీ ఎమ్మెల్యే
ఘటనపై సమాచారం అందుకున్న ఆదిలాబాద్ జిల్లా కలెక్టర్ రాజర్షి షా రిమ్స్ ఆసుపత్రికి చేరుకుని పరిస్థితిని సమీక్షించారు. చిన్నారుల ఆరోగ్య పరిస్థితి, వారికి అందుతున్న చికిత్స, వారిని ఇతర ఆసుపత్రులకు తరలించిన విధానంపై అధికారులను అడిగి తెలుసుకున్నారు. మాజీ ఎమ్మెల్యే జోగు రామన్న కూడా రిమ్స్‌కు చేరుకుని ఘటనపై వివరాలు అడిగి తెలుసుకున్నారు.
ఎస్‌ఎన్‌సీయూ వార్డులో ఏసీ పేలుడుకు దారితీసిన కారణాలు, విద్యుత్ వ్యవస్థలో లోపాలు ఉన్నాయా అనే అంశాలపై అధికారులు పరిశీలిస్తున్నారు.
About the Author
Please tell us what is wrong. Your report will be sent to the website team.
