AP Parishad Elections 2026 | ఏపీలో పరిషత్‌ ఎన్నికల సందడి..

Published: 21 Oct 2026 • 02:30 PM

* నేటి నుంచి నామినేషన్లు!

* అక్టోబర్ 23 వరకు నామినేషన్ల స్వీకరణ..

* నవంబర్ 3న పోలింగ్, 5న ఫలితాలు

ఆకేరు న్యూస్, అమరావతి : ఆంధ్రప్రదేశ్‌లో గ్రామీణ స్థానిక సంస్థల ఎన్నికల సందడి మొదలైంది. మండల పరిషత్‌ ప్రాదేశిక నియోజకవర్గాల (ఎంపీటీసీ), జిల్లా పరిషత్‌ ప్రాదేశిక నియోజకవర్గాల (జెడ్పీటీసీ) ఎన్నికలకు బుధవారం (అక్టోబర్‌ 21) నుంచి నామినేషన్ల స్వీకరణ ప్రారంభం కానుంది. ఈ మేరకు రాష్ట్ర ఎన్నికల సంఘం ఎన్నికల షెడ్యూల్‌ను ప్రకటించింది. దీంతో గ్రామీణ ప్రాంతాల్లో రాజకీయంగా ఎన్నికల వేడి పెరగనుంది.

ఈ నెల 23 వరకు నామినేషన్లు

ఎంపీటీసీ, జెడ్పీటీసీ స్థానాలకు పోటీ చేయాలనుకునే అభ్యర్థులు అక్టోబర్‌ 21 నుంచి 23వ తేదీ వరకు నామినేషన్లు దాఖలు చేయవచ్చు. ఉదయం 10.30 గంటల నుంచి సాయంత్రం 5 గంటల వరకు నామినేషన్లను స్వీకరిస్తారు. ఎంపీటీసీ స్థానాలకు సంబంధిత మండల కేంద్రాల్లో, జెడ్పీటీసీ స్థానాలకు నిర్దేశించిన కేంద్రాల్లో అభ్యర్థులు నామినేషన్ పత్రాలను సమర్పించాలి.

అక్టోబర్‌ 24న నామినేషన్ పత్రాల పరిశీలన నిర్వహిస్తారు. నామినేషన్లు తిరస్కరణకు గురైన అభ్యర్థులు అక్టోబర్‌ 25న అప్పీలు చేసుకోవచ్చు. వచ్చిన అప్పీళ్లను అక్టోబర్‌ 26న పరిష్కరిస్తారు. పోటీ నుంచి తప్పుకోవాలనుకునే అభ్యర్థులు అక్టోబర్‌ 27వ తేదీ మధ్యాహ్నం 3 గంటల వరకు నామినేషన్లను ఉపసంహరించుకోవచ్చు. అదే రోజు తుది అభ్యర్థుల జాబితాను ప్రకటిస్తారు.

నవంబర్‌ 3న పోలింగ్‌.. 5న ఫలితాలు

రాష్ట్రవ్యాప్తంగా నవంబర్‌ 3వ తేదీన ఉదయం 7 గంటల నుంచి సాయంత్రం 5 గంటల వరకు పోలింగ్‌ నిర్వహించనున్నారు. అవసరమైన చోట నవంబర్‌ 4న రీపోలింగ్‌ చేపడతారు. నవంబర్‌ 5వ తేదీ ఉదయం 8 గంటల నుంచి ఓట్ల లెక్కింపు ప్రారంభించి, అదే రోజు ఫలితాలను ప్రకటించనున్నారు.

10,488 స్థానాలకు ఎన్నికలు

రాష్ట్రంలో 28 జిల్లా పరిషత్‌ల పరిధిలోని 659 జెడ్పీటీసీ స్థానాలు, 9,829 ఎంపీటీసీ స్థానాలకు ఎన్నికలు జరగనున్నాయి. మొత్తం 10,488 స్థానాలకు ఓటింగ్‌ నిర్వహించేందుకు ఎన్నికల సంఘం ఏర్పాట్లు చేస్తోంది. ఈ ఎన్నికలతో గ్రామీణ స్థాయిలో స్థానిక ప్రజాప్రతినిధుల ఎంపిక ప్రక్రియ కీలక దశకు చేరనుంది.

రాజకీయ పార్టీలకు కీలకం

గ్రామీణ ప్రాంతాల్లో ప్రజాబలాన్ని అంచనా వేసేందుకు ఈ ఎన్నికలు రాజకీయ పార్టీలకు కీలకంగా మారనున్నాయి. అభ్యర్థుల ఎంపిక, స్థానిక నాయకుల మధ్య సమన్వయం, ప్రచార వ్యూహాలపై పార్టీలు దృష్టి సారించనున్నాయి. నామినేషన్ల ప్రక్రియ ప్రారంభం కావడంతో గ్రామాలు, మండలాల్లో రాజకీయ సందడి మరింత పెరిగే అవకాశం ఉంది.

ఎన్నికల ప్రక్రియను ప్రశాంతంగా నిర్వహించేందుకు అధికారులు ఏర్పాట్లు చేస్తున్నారు. అభ్యర్థులు ఎన్నికల సంఘం నిబంధనలను పాటిస్తూ గడువులోగా నామినేషన్లు దాఖలు చేయాలని సూచిస్తున్నారు.