APPSC Group 2 Notification 2026 | 720 ఉద్యోగాలు.. అప్లై చేసుకోండి

Published: 11 Nov 2026 • 11:12 AM

* గ్రూప్-2 నోటిఫికేషన్ వచ్చేసింది
* డిసెంబర్ 11 చివరి తేదీ.. మిస్ కావొద్దు

ఆకేరు న్యూస్, డెస్క్: ఆంధ్రప్రదేశ్‌లో ప్రభుత్వ ఉద్యోగాల కోసం ఎదురుచూస్తున్న నిరుద్యోగ అభ్యర్థులకు ఏపీ పబ్లిక్ సర్వీస్ కమిషన్ (APPSC) శుభవార్త అందించింది. రాష్ట్రంలోని వివిధ ప్రభుత్వ శాఖల్లో ఖాళీగా ఉన్న 720 గ్రూప్-2 పోస్టుల భర్తీకి సమగ్ర నోటిఫికేషన్ విడుదల చేసింది. నోటిఫికేషన్ నంబర్ 37/2026 ద్వారా ఈ నియామక ప్రక్రియ చేపట్టనుంది. మొత్తం ఖాళీల్లో 471 ఎగ్జిక్యూటివ్ పోస్టులు, 249 నాన్ ఎగ్జిక్యూటివ్ పోస్టులు ఉన్నాయి. అర్హత కలిగిన అభ్యర్థులు నవంబర్ 10 నుంచి డిసెంబర్ 11, 2026 వరకు ఆన్‌లైన్‌లో దరఖాస్తు చేసుకోవచ్చు.

డిప్యూటీ తహసీల్దార్ పోస్టులే ఎక్కువ

ఈ గ్రూప్-2 నియామకాల్లో ఎగ్జిక్యూటివ్ విభాగంలో అత్యధికంగా డిప్యూటీ తహసీల్దార్ పోస్టులు ఉన్నాయి. ఈ విభాగంలో 203 ఖాళీలను భర్తీ చేయనున్నారు. అలాగే డిప్యూటీ మండల పరిషత్ డెవలప్‌మెంట్ ఆఫీసర్ (Dy. MPDO) పోస్టులు 176, గూడ్స్ అండ్ సర్వీసెస్ ట్యాక్స్ (GST) ఆఫీసర్ పోస్టులు 40, ప్రొహిబిషన్ అండ్ ఎక్సైజ్ సబ్ ఇన్‌స్పెక్టర్ పోస్టులు 29 ఉన్నాయి. వీటితోపాటు అసిస్టెంట్ రిజిస్ట్రార్ ఆఫ్ కోఆపరేటివ్ సొసైటీస్ పోస్టులు 10, సబ్ రిజిస్ట్రార్ గ్రేడ్-2 పోస్టులు 7, మున్సిపల్ కమిషనర్ గ్రేడ్-3 పోస్టులు 6 ఉన్నాయి. ఈ పోస్టులన్నీ కలిపి 471 ఎగ్జిక్యూటివ్ ఖాళీలు ఉన్నాయి.

నాన్ ఎగ్జిక్యూటివ్ విభాగంలో 249 పోస్టులు

నాన్ ఎగ్జిక్యూటివ్ విభాగంలోనూ పలు కీలక పోస్టులను భర్తీ చేయనున్నారు. జనరల్ అడ్మినిస్ట్రేషన్ విభాగంలో 71 అసిస్టెంట్ సెక్షన్ ఆఫీసర్ (ASO) పోస్టులు, ఆర్థిక శాఖలో 5, న్యాయశాఖలో 4 ASO పోస్టులు ఉన్నాయి. మొత్తం 80 అసిస్టెంట్ సెక్షన్ ఆఫీసర్ పోస్టులు ఉన్నాయి. ట్రెజరీస్ అండ్ అకౌంట్స్ విభాగంలో 90 సీనియర్ అకౌంటెంట్ పోస్టులు, జిల్లా స్థాయిలో మరో సీనియర్ అకౌంటెంట్ పోస్టు ఉన్నాయి. వివిధ ప్రభుత్వ శాఖల్లో 47 జూనియర్ అకౌంటెంట్ పోస్టులతోపాటు జూనియర్ ఆఫీస్ అసిస్టెంట్ పోస్టులు కూడా ఉన్నాయి. మొత్తం నాన్ ఎగ్జిక్యూటివ్ ఖాళీలు 249.

డిసెంబర్ 11 వరకు దరఖాస్తులు

ఈ ఉద్యోగాలకు దరఖాస్తు ప్రక్రియ నవంబర్ 10, 2026 నుంచి ప్రారంభమైంది. అభ్యర్థులు డిసెంబర్ 11, 2026 రాత్రి 11.59 గంటల వరకు ఆన్‌లైన్‌లో అప్లై చేసుకోవచ్చు. దరఖాస్తు చేసుకునే అభ్యర్థులు ముందుగా APPSC వెబ్‌సైట్‌లో వన్ టైమ్ ప్రొఫైల్ రిజిస్ట్రేషన్ (OTPR) పూర్తి చేయాలి. అనంతరం సంబంధిత గ్రూప్-2 నోటిఫికేషన్‌ను ఎంచుకుని ప్రత్యేకంగా ఆన్‌లైన్ అప్లికేషన్ సమర్పించాలి.

అధికారిక వెబ్‌సైట్: https://psc.ap.gov.in

విద్యార్హతలు, వయోపరిమితి

చాలా పోస్టులకు గుర్తింపు పొందిన విశ్వవిద్యాలయం నుంచి బ్యాచిలర్ డిగ్రీ పూర్తి చేసి ఉండాలి. అయితే కొన్ని పోస్టులకు సంబంధిత విభాగాలను బట్టి ప్రత్యేక విద్యార్హతలు అవసరం. అభ్యర్థులు తాము దరఖాస్తు చేయాలనుకుంటున్న పోస్టుకు సంబంధించిన విద్యార్హతలను పూర్తి నోటిఫికేషన్‌లో పరిశీలించాలి. చాలా పోస్టులకు 2026 జూలై 1 నాటికి కనీస వయస్సు 18 సంవత్సరాలు, గరిష్ఠ వయస్సు 44 సంవత్సరాలుగా నిర్ణయించారు. సబ్ రిజిస్ట్రార్, మున్సిపల్ కమిషనర్, ఎక్సైజ్ సబ్ ఇన్‌స్పెక్టర్ వంటి కొన్ని పోస్టులకు వయోపరిమితిలో మార్పులు ఉన్నాయి. ముఖ్యంగా ప్రొహిబిషన్ అండ్ ఎక్సైజ్ సబ్ ఇన్‌స్పెక్టర్ పోస్టులకు గరిష్ఠ వయోపరిమితి 30 సంవత్సరాలు. రిజర్వేషన్ కేటగిరీలకు ప్రభుత్వ నిబంధనల ప్రకారం వయో సడలింపులు వర్తిస్తాయి.

దరఖాస్తు ఫీజు ఎంతంటే

అభ్యర్థులు దరఖాస్తు సమయంలో రూ.250 ప్రాసెసింగ్ ఫీజు చెల్లించాలి. అదనంగా సాధారణ అభ్యర్థులకు రూ.80 పరీక్ష ఫీజు ఉంటుంది. ఎస్సీ, ఎస్టీ, బీసీ, దివ్యాంగులు, మాజీ సైనికులు, ఏపీ వైట్ రేషన్ కార్డు కలిగిన కుటుంబాలు, నిరుద్యోగ యువతకు నోటిఫికేషన్‌లో పేర్కొన్న నిబంధనల ప్రకారం పరీక్ష ఫీజు మినహాయింపు ఉంటుంది. వీరు రూ.250 ప్రాసెసింగ్ ఫీజు మాత్రమే చెల్లించాల్సి ఉంటుంది.

ఫిబ్రవరి 21న ప్రిలిమినరీ పరీక్ష

గ్రూప్-2 నియామక ప్రక్రియలో భాగంగా 2027 ఫిబ్రవరి 21న ప్రిలిమినరీ స్క్రీనింగ్ టెస్ట్ నిర్వహించనున్నట్లు APPSC ప్రకటించింది. ఈ పరీక్షను ఆఫ్‌లైన్ OMR విధానంలో నిర్వహిస్తారు. అనంతరం మెయిన్స్ పరీక్ష నిర్వహించనున్నారు. మెయిన్స్ పరీక్ష కంప్యూటర్ ఆధారిత (CBRT) విధానంలో ఉంటుంది. మెయిన్స్ పరీక్ష తేదీని కమిషన్ తర్వాత ప్రకటించనుంది. రెండు పరీక్షలను ఆంధ్రప్రదేశ్‌లోని జిల్లా కేంద్రాల్లో నిర్వహించనున్నారు.

అభ్యర్థులకు కీలక సూచన

గ్రూప్-2 ఉద్యోగాలకు దరఖాస్తు చేసుకునే అభ్యర్థులు చివరి తేదీ వరకు వేచి ఉండకుండా ముందుగానే అప్లికేషన్ ప్రక్రియ పూర్తి చేసుకోవడం మంచిది. దరఖాస్తు చేయడానికి ముందు పోస్టుల వారీగా విద్యార్హతలు, వయోపరిమితి, రిజర్వేషన్లు, జోన్ల వారీగా ఖాళీలు, పరీక్ష విధానం వంటి వివరాలను అధికారిక నోటిఫికేషన్‌లో పూర్తిగా పరిశీలించాలి. దరఖాస్తులో తప్పులు లేకుండా చూసుకోవాలి. మొత్తంగా 720 గ్రూప్-2 ఉద్యోగాల భర్తీకి APPSC నోటిఫికేషన్ విడుదల చేయడంతో ప్రభుత్వ ఉద్యోగాల కోసం సిద్ధమవుతున్న అభ్యర్థులకు మరో మంచి అవకాశం లభించింది. ఫిబ్రవరి 21న ప్రిలిమ్స్ జరగనున్న నేపథ్యంలో అభ్యర్థులు ఇప్పటి నుంచే పరీక్షకు ప్రణాళికాబద్ధంగా సిద్ధం కావాల్సి ఉంటుంది.