Jeevan Reddy | హామీల అమ‌లులో కాంగ్రెస్ విఫ‌లం

Published: 30 Aug 2026 • 12:32 PM Updated: 30 Aug 2026 • 05:10 PM

* ప్రజలను నిరాశపరుస్తున్న రాష్ట్ర ప్ర‌భుత్వం

* కేసీఆర్ పాలనలో సంక్షేమానికి పెద్దపీట

* బీఆర్‌ఎస్ రాష్ట్ర ప్రధాన కార్యదర్శి టి. జీవన్ రెడ్డి

ఆకేరు న్యూస్, జ‌గిత్యాల : కాంగ్రెస్ ప్రభుత్వం ఎన్నికల సమయంలో ఇచ్చిన హామీల అమలులో విఫలమవుతోందని మాజీ మంత్రి, బీఆర్‌ఎస్ రాష్ట్ర ప్రధాన కార్యదర్శి టి. జీవన్ రెడ్డి విమర్శించారు. ఉద్యోగుల సంక్షేమం, పెన్షన్లు, వివిధ సంక్షేమ పథకాల అమలు తీరుపై ఆయన ప్రశ్నలు సంధించారు. ఉద్యోగులకు ప్రతి ఐదేళ్లకు ఒకసారి అమలు చేయాల్సిన పీఆర్సీ అంశంపై ప్రభుత్వం స్పష్టమైన నిర్ణయం తీసుకోవాలని జీవన్ రెడ్డి డిమాండ్ చేశారు. ఉద్యోగులు, పెన్షనర్లు ఎదుర్కొంటున్న సమస్యలను పరిష్కరించడంలో కాంగ్రెస్ ప్రభుత్వం తగిన ప్రాధాన్యం ఇవ్వడం లేదని విమర్శించారు. ఆసరా పెన్షన్ల పెంపుతో పాటు బీడీ కార్మికులు, వృద్ధులు తదితర వర్గాలకు సంబంధించిన సంక్షేమ పథకాల అమలుపై కూడా ప్రభుత్వం దృష్టి సారించాలని కోరారు. కాంగ్రెస్ ప్రభుత్వం ఇచ్చిన హామీలను అమలు చేయకుండా ప్రజలను నిరాశపరుస్తోందని ఆరోపించారు. తెలంగాణ తొలి సీఎం కేసీఆర్ హయాంలో సంక్షేమానికి అధిక ప్రాధాన్యం ఇచ్చామని జీవన్ రెడ్డి గుర్తు చేశారు. మహిళల సంక్షేమం, బీడీ కార్మికులకు పెన్షన్లు, నిరుద్యోగ యువతకు ఉపాధి అవకాశాలు కల్పించే అంశాలపై అప్పటి ప్రభుత్వం ప్రత్యేక దృష్టి పెట్టిందని పేర్కొన్నారు. రాష్ట్ర ప్రజలకు మెరుగైన వైద్య సేవలు అందించాలనే లక్ష్యంతో ప్రతి జిల్లాకు ఒక వైద్య కళాశాల ఏర్పాటు చేయాలనే ఆలోచనకు కేసీఆర్ ప్రభుత్వం శ్రీకారం చుట్టిందన్నారు. పాలనా సౌలభ్యం, ప్రజలకు ప్రభుత్వ సేవలు మరింత చేరువ కావాలనే ఉద్దేశంతో కొత్త జిల్లాల ఏర్పాటుకూ కేసీఆర్ ప్రభుత్వం చర్యలు తీసుకుందని పేర్కొన్నారు. కాంగ్రెస్ ప్రభుత్వం అధికారంలోకి వచ్చిన తర్వాత ఎన్నికల హామీల అమలు, సంక్షేమ పథకాల కొనసాగింపు, ఉద్యోగుల సమస్యల పరిష్కారంపై స్పష్టమైన వైఖరి ప్రకటించాలని జీవన్ రెడ్డి డిమాండ్ చేశారు.