Chhattisgarh Cancer Cases
* ఆస్పత్రులకు 30 రోజుల గడువు..
* 17,611 కేసుల నమోదు
ఆకేరు న్యూస్, రాయ్పూర్: ఛత్తీస్గఢ్లో క్యాన్సర్ను నోటిఫయబుల్ వ్యాధిగా రాష్ట్ర ప్రభుత్వం ప్రకటించింది. దీంతో ప్రభుత్వ, ప్రైవేట్ ఆస్పత్రులు, వైద్య కళాశాలలు, డయాగ్నస్టిక్ కేంద్రాలు, ల్యాబొరేటరీలు క్యాన్సర్ నిర్ధారణ అయిన కేసులను 30 రోజుల్లోగా ఆరోగ్య శాఖకు నివేదించాల్సి ఉంటుంది. క్యాన్సర్ కేసులకు సంబంధించిన సమగ్ర డేటాబేస్ ఏర్పాటు, వ్యాధి వ్యాప్తిపై మెరుగైన నిఘా కోసం ఈ నిర్ణయం తీసుకున్నట్లు ప్రభుత్వం తెలిపింది. క్యాన్సర్ నిర్ధారణ అనంతరం పాథాలజిస్టులు నిర్దేశిత ఫారమ్లో వివరాలను నమోదు చేయాల్సి ఉంటుంది. అనుమానిత కేసులకు అవసరమైన పరీక్షలు నిర్వహించేలా వైద్యులు సూచనలు ఇవ్వాల్సి ఉంటుంది.
కేంద్రీకృత పోర్టల్లో వివరాలు
కొత్త విధానంలో క్యాన్సర్ కేసుల వివరాలను కేంద్రీకృత పోర్టల్లో నమోదు చేయనున్నారు. దీనివల్ల క్యాన్సర్ రకాలు, కేసుల సంఖ్య, ప్రాంతాల వారీగా నమోదవుతున్న ధోరణులను ప్రభుత్వం పర్యవేక్షించనుంది. స్క్రీనింగ్, చికిత్స, డయాగ్నస్టిక్ సదుపాయాల విస్తరణకు ఈ డేటాను ఉపయోగించనున్నారు. ఈ నోటిఫికేషన్తో రాష్ట్రంలో క్యాన్సర్ అకస్మాత్తుగా పెరిగిందని అర్థం కాదని అధికారులు స్పష్టం చేశారు. ఇప్పటివరకు స్వచ్ఛందంగా సాగిన కేసుల నివేదిక వ్యవస్థను ఇకపై తప్పనిసరి చేయడమే ప్రధాన మార్పు.
రెండేళ్లలో 17,611 కేసులు
ప్రభుత్వ గణాంకాల ప్రకారం 2024 ఏప్రిల్ 1 నుంచి 2026 జూన్ వరకు ఛత్తీస్గఢ్లో 17,611 క్యాన్సర్ కేసులు నమోదయ్యాయి. వీటిలో 4,465 నోటి క్యాన్సర్, 2,633 రొమ్ము క్యాన్సర్, 2,560 కడుపు క్యాన్సర్, 2,200 గర్భాశయ క్యాన్సర్, 1,038 ఊపిరితిత్తుల క్యాన్సర్ కేసులు ఉన్నాయి. మరో 252 నాలుక, 210 గొంతు క్యాన్సర్ కేసులు నమోదయ్యాయి. రాష్ట్రంలో ప్రస్తుతం మూడు ప్రభుత్వ క్యాన్సర్ ఆస్పత్రులు, రెండు ప్రభుత్వ రేడియోథెరపీ యూనిట్లు ఉన్నాయి. 26 జిల్లాల్లో డే-కేర్ కీమోథెరపీ కేంద్రాలు పనిచేస్తుండగా, మరో ఐదు కేంద్రాలను ఏర్పాటు చేయాలని ప్రభుత్వం ప్రతిపాదించింది. తప్పనిసరి నివేదికల ద్వారా ప్రభుత్వ, ప్రైవేట్ ఆరోగ్య సంస్థల నుంచి మరింత విస్తృతమైన సమాచారం అందుబాటులోకి రానుంది. దీంతో క్యాన్సర్ నిర్ధారణ, చికిత్స, ఆరోగ్య మౌలిక వసతుల అవసరాలపై ప్రణాళికలు రూపొందించేందుకు ప్రభుత్వానికి మెరుగైన డేటా లభించనుంది.
About the Author
Please tell us what is wrong. Your report will be sent to the website team.
