CJP Leaders Custody | సీజేపీ నేతలకు ఐదు రోజుల కస్టడీ

Published: 14 Oct 2026 • 11:10 AM

* జంతర్ మంతర్‌లోకి దూసుకెళ్లిన సీజేపీ నాయకులు
* CECకి వ్యతిరేకంగా నిరసనలు

ఆకేరు న్యూస్, డెస్క్: దేశ రాజధాని ఢిల్లీలో ప్రధాన ఎన్నికల కమిషనర్ (సీఈసీ) జ్ఞానేష్ కుమార్‌కు వ్యతిరేకంగా సాగుతున్న నిరసనలు తీవ్రరూపం దాల్చాయి. ఓటర్ల నమోదు మరియు ఈసీఐ వ్యవహార శైలికి వ్యతిరేకంగా సీఈసీ రాజీనామా చేయాలని డిమాండ్ చేస్తూ కాక్‌రోచ్ జనతా పార్టీ (CJP)కి చెందిన ముఖ్య నాయకులు ఢిల్లీలోని జంతర్ మంతర్ వద్ద నిర్వహించిన మెరుపు నిరసన తీవ్ర కలకలం రేపింది.

* జంతర్ మంతర్‌లోకి దూసుకెళ్లిన నాయకులు

ఢిల్లీలో కట్టుదిట్టమైన భద్రతా ఆంక్షలు అమల్లో ఉన్నప్పటికీ, సీజేపీ నాయకులు సౌరవ్ దాస్, అశుతోష్ రాంకా, అజింక్యా షిండేలతో కూడిన బృందం ఆకస్మికంగా జంతర్ మంతర్ వైపు దూసుకెళ్లింది. అక్కడ ఉన్న ఐరన్ గేట్లను దాటుకుని లోపలికి ప్రవేశించి, సీఈసీ జ్ఞానేష్ కుమార్ రాజీనామా చేయాలంటూ పెద్దెత్తున నినాదాలు చేశారు. దీంతో అప్రమత్తమైన ఢిల్లీ పోలీసులు వారిని వెంటనే అదుపులోకి తీసుకున్నారు.

* కోర్టు సంచలన తీర్పు

ఇదివరకు విధించిన బెయిల్/ముందస్తు నిరోధక నిబంధనలను, బాండ్ షరతులను సదరు నేతలు తీవ్రంగా ఉల్లంఘించారని పోలీసులు న్యాయస్థానం దృష్టికి తీసుకెళ్లారు. ప్రభుత్వ ఆంక్షలను ధిక్కరించి నిరసన ప్రాంతంలోకి ప్రవేశించిన ఆరోపణలపై విచారణ జరిపిన ఢిల్లీలోని ఎగ్జిక్యూటివ్ మేజిస్ట్రేట్ కోర్టు, ఆ ముగ్గురు సీజేపీ నేతలకు 5 రోజుల జుడీషియల్ కస్టడీ విధిస్తూ ఉత్తర్వులు జారీ చేసింది.

* కొనసాగుతున్న నిరసనలు

సీఈసీ జ్ఞానేష్ కుమార్ రాజీనామా చేసే వరకు తమ పోరాటం ఆగదని, ప్రజాస్వామ్య బద్ధంగా నిరసనలు తెలిపే హక్కును కాలరాస్తున్నారని సీజేపీ ప్రతినిధులు ఆరోపిస్తున్నారు. పోలీసులు మరియు భద్రతా దళాలు జంతర్ మంతర్ పరిసర ప్రాంతాల్లో గట్టి నిఘా ఏర్పాటు చేశాయి.