MLA Danam Nagender | అధికారుల తీరుపై దానం నాగేందర్ ఫైర్

Published: 18 Sep 2026 • 12:10 PM

* ఇళ్ల కేటాయింపులపై అసెంబ్లీలో నిలదీత

ఆకేరు న్యూస్, హైదరాబాద్ : శాసనసభ సమావేశాల్లో ఇందిరమ్మ ఇళ్ల కేటాయింపుల ప్రక్రియపై ఖైరతాబాద్ ఎమ్మెల్యే దానం నాగేందర్ తీవ్రస్థాయిలో ఆగ్రహం వ్యక్తం చేశారు. జీరో అవర్ సందర్భంగా అధికారుల పనితీరుపై, నియోజకవర్గాల్లో జరుగుతున్న తీవ్ర అవకతవకలపై ఆయన సభలో గళమెత్తారు. ప్రభుత్వ లక్ష్యానికి అనుగుణంగా క్షేత్రస్థాయిలో అధికారులు పనిచేయడం లేదని, దీనివల్ల అర్హులైన పేద ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు.

* దానం నాగేందర్ లేవనెత్తిన ప్రధానాంశాలు

అధికారుల గైర్హాజరు – సమాధానాల లేమి: జీరో అవర్ సమయంలో సంబంధిత శాఖల కార్యదర్శులు (సెక్టరీలు) సభకు అందుబాటులో లేకపోవడంపై ఆయన తీవ్ర అసంతృప్తి వెళ్లగక్కారు. శాసనసభ్యులు లేవనెత్తే ప్రజా సమస్యలపై అధికారుల నుంచి సరైన స్పందన మరియు రిప్లై రావడం లేదని మండిపడ్డారు.

ఇళ్ల కేటాయింపుల్లో తీవ్ర అక్రమాలు: హైదరాబాద్ నగర పరిధిలోని 16 నియోజకవర్గాల్లో చేపట్టిన ఇందిరమ్మ ఇళ్ల (480 ఇళ్లు) కేటాయింపు ప్రక్రియ అంతా అస్తవ్యస్తంగా మారిందని ఆరోపించారు. ఖైరతాబాద్, కూకట్‌పల్లి, మలక్‌పేట వంటి ప్రాంతాలలో డ్రా ప్రక్రియలో పెద్దఎత్తున లోపాలు జరిగాయని, అర్హులకు కాకుండా ఇష్టానుసారంగా కేటాయింపులు జరుగుతున్నాయని విమర్శించారు.

ఎమ్మెల్యేల హక్కులకు భంగం: నియోజకవర్గాల అభివృద్ధికి, సంక్షేమ పథకాల అమలుకు సంబంధించి ప్రజాప్రతినిధులకు ఉండాల్సిన ప్రివిలేజ్ (ప్రత్యేకాధికారాలు) హక్కులు నీరుగారిపోతున్నాయని వాపోయారు. అధికారుల నిర్లక్ష్య వైఖరిపై తాము ఇచ్చిన ప్రివిలేజ్ నోటీసులు సైతం కమిటీకి రిఫర్ కాకపోవడాన్ని తప్పుబట్టారు.

360 డిగ్రీల సమగ్ర విచారణ (స్క్రూటిని) జరగాలి : నగరంలోని అన్ని నియోజకవర్గాల్లో జరిగిన ఇళ్ల కేటాయింపులపై ‘360 డిగ్రీల కోణంలో’ సమగ్ర స్క్రూటిని జరపాలని ఆయన ప్రభుత్వాన్ని డిమాండ్ చేశారు. ఎక్కడెక్కడ పొరపాట్లు జరిగాయో క్షుణ్ణంగా పరిశీలించి, బాధ్యులైన అధికారులపై కఠిన చర్యలు తీసుకోవాలని కోరారు.

ప్రభుత్వ ఆదేశాల అమలులో వైఫల్యం: ప్రతి నియోజకవర్గంలో ఇళ్లు లేని పేదవాడు ఉండకూడదనే ఉద్దేశంతో ముఖ్యమంత్రి స్పష్టమైన ఆదేశాలు జారీ చేశారని, అయితే క్షేత్రస్థాయిలో అధికారులు మాత్రం వాటిని అమలు చేయడంలో విఫలమవుతున్నారని విమర్శించారు. “డ్రా ప్రక్రియ ముగిసింది, ఇక మీ డబ్బులు వాపసు తీసుకోండి” అంటూ లబ్ధిదారులను అధికారులు వెనక్కి పంపుతున్నారని, దీంతో ఆవేదన చెందిన ప్రజలు నేరుగా తమ ఇళ్ల వద్దకు వచ్చి ఆందోళన చెందుతున్నారని తెలిపారు.

కఠిన మార్గదర్శకాలు ఇవ్వాలి : హైదరాబాద్ సిటీలో అందుబాటులో ఉన్న కొద్దిపాటి స్థలాలు లేదా కారువాన్లలో అర్హులైన పేద ప్రజలకు పారదర్శకంగా న్యాయం జరిగేలా ప్రభుత్వం తరఫున అధికారులకు కఠినమైన, స్పష్టమైన ఆదేశాలు జారీ చేయాలని దానం నాగేందర్ విజ్ఞప్తి చేశారు.