Rayaparthy| ఎల్నినోపై అలర్ట్‌

Published: 24 Oct 2026 • 05:37 PM

* ముందస్తు ప్రణాళికలతో సిద్ధంగా ఉండాలి

* మండల ప్రత్యేక అధికారి శ్రీకాంత్ రెడ్డి

ఆకేరు న్యూస్, రాయపర్తి: రాబోయే కాలంలో ఎల్నినో ప్రభావంతో కరువు పరిస్థితులు, నీటి ఎద్దడి తలెత్తే అవకాశాలను దృష్టిలో ఉంచుకుని ముందస్తు చర్యలు చేపట్టాలని మండల ప్రత్యేక అధికారి శ్రీకాంత్ రెడ్డి అధికారులను ఆదేశించారు. ప్రజలకు తాగునీరు, సాగునీరు, విద్యుత్ సరఫరాలో ఎలాంటి అంతరాయం కలగకుండా అన్ని శాఖల అధికారులు సమన్వయంతో పనిచేయాలని సూచించారు. శనివారం రాయపర్తి మండల కేంద్రంలో వివిధ శాఖల అధికారులతో ఆయన సమీక్షా సమావేశం నిర్వహించారు.

పశుసంపదపై ప్రత్యేక దృష్టి

ఈ సందర్భంగా శ్రీకాంత్ రెడ్డి మాట్లాడుతూ.. కరువు పరిస్థితులు ఏర్పడితే ప్రజలు, రైతులు ఇబ్బందులు పడకుండా ముందస్తు ప్రణాళికలు సిద్ధం చేసుకోవాలని సూచించారు. పశువులకు తాగునీరు, పశుగ్రాసం కొరత రాకుండా పశుసంవర్ధక శాఖ అధికారులు అవసరమైన ఏర్పాట్లు చేయాలని ఆదేశించారు.

ఆరుతడి పంటల సాగుకు ప్రోత్సాహం

ఎల్నినో ప్రభావం వ్యవసాయ రంగంపై పడే అవకాశాలను దృష్టిలో ఉంచుకుని రైతులకు ముందుగానే అవగాహన కల్పించాలని వ్యవసాయ శాఖ అధికారులకు సూచించారు. భూగర్భ జలాలపై ఒత్తిడి తగ్గించేలా అధిక నీరు అవసరమయ్యే వరి సాగును తగ్గించి, తక్కువ నీటితో పండించే ఆరుతడి పంటల వైపు రైతులను ప్రోత్సహించాలని తెలిపారు. క్షేత్రస్థాయిలో రైతులకు అవసరమైన సూచనలు అందించాలని ఆదేశించారు.

నీటి సంరక్షణకు చర్యలు

ప్రతి గ్రామంలో తాగునీటి సమస్య తలెత్తకుండా ఆర్‌డబ్ల్యూఎస్‌ (RWS), నీటిపారుదల శాఖ అధికారులు ప్రత్యామ్నాయ ఏర్పాట్లతో సిద్ధంగా ఉండాలని సూచించారు. నీటి ఎద్దడిని నివారించేందుకు ఇంకుడు గుంతలు, బోరు బావుల రీఛార్జ్‌ నిర్మాణాలు, ఫామ్‌ పాండ్స్‌ ఏర్పాటు వంటి నీటి సంరక్షణ చర్యలను ప్రోత్సహించాలని తెలిపారు. ఈ పనుల్లో ఉపాధి హామీ సిబ్బంది, పంచాయతీ కార్యదర్శులు ప్రత్యేక చొరవ తీసుకోవాలని పిలుపునిచ్చారు. ఇందుకోసం సంబంధిత పథకాల కింద చేపట్టగల పనులపై సమన్వయంతో ముందుకు సాగాలని సూచించారు.

సమావేశంలో పలువురు అధికారులు

ఈ సమావేశంలో తహసీల్దార్‌ ఎం. శ్రీనివాస్‌, ఎంపీడీవో పి. శ్రీనివాసులు, పంచాయతీ కార్యదర్శులు, ఫీల్డ్‌ అసిస్టెంట్లు, ఉపాధి హామీ సిబ్బంది, వ్యవసాయ అధికారి, పశువైద్యులు, వైద్య ఆరోగ్య శాఖ అధికారులు, నీటిపారుదల శాఖ ఏఈ, ఆర్‌డబ్ల్యూఎస్‌ ఏఈ, విద్యుత్‌ శాఖ ఏఈ, ఏపీవోతో పాటు వివిధ శాఖల అధికారులు పాల్గొన్నారు.