Ganesh Immersion Tragedy| నిమజ్జనంలో విషాదం

Published: 16 Sep 2026 • 09:06 PM

* కుంటలో పడి ఆరుగురు విద్యార్థులు మృతి

Ganesh Immersion Tragedy ఆకేరు న్యూస్, సంగారెడ్డి: వినాయక నిమజ్జన వేడుకల్లో తీవ్ర విషాదం చోటుచేసుకుంది. గణనాథుడిని నిమజ్జనం చేసేందుకు వెళ్లిన ఆరుగురు విద్యార్థులు నీటి కుంటలో పడి మృతి చెందారు. ఈ విషాద ఘటన సంగారెడ్డి జిల్లా పటాన్‌చెరు మండలం ఇంద్రేశం మున్సిపాలిటీ పరిధిలోని పెద్దకంజర్ల గ్రామ శివారులో జరిగింది. మృతులంతా పటాన్‌చెరు పరిధిలోని శిరీష అనాథాశ్రమానికి చెందిన విద్యార్థులుగా తెలుస్తోంది. దీంతో స్థానికంగా తీవ్ర విషాదం నెలకొంది.

ఒకరి తర్వాత ఒకరు కుంటలోకి..

వినాయక చవితి వేడుకల్లో భాగంగా పూజా కార్యక్రమాలు పూర్తి చేసుకున్న విద్యార్థులు నిమజ్జనం కోసం పెద్దకంజర్ల గ్రామ శివారులోని నీటి కుంట వద్దకు వెళ్లారు. విగ్రహాన్ని నిమజ్జనం చేస్తున్న సమయంలో ప్రమాదవశాత్తు ఒకరి తర్వాత ఒకరు లోతైన నీటిలోకి జారిపడినట్లు సమాచారం. ఈత రాకపోవడంతో ఆరుగురు విద్యార్థులు నీటిలో మునిగి మృతి చెందినట్లు తెలుస్తోంది. ప్రమాదాన్ని గమనించిన స్థానికులు వెంటనే వారిని రక్షించేందుకు ప్రయత్నించినప్పటికీ అప్పటికే విషాదం చోటుచేసుకుంది.

ఘటనాస్థలికి పోలీసులు

సమాచారం అందుకున్న పటాన్‌చెరు పోలీసులు ఘటనాస్థలికి చేరుకున్నారు. స్థానికుల సహాయంతో మృతదేహాలను కుంట నుంచి బయటకు తీసి పోస్టుమార్టం నిమిత్తం ప్రభుత్వ ఆసుపత్రికి తరలించారు. విద్యార్థులు కుంటలోకి ఎలా జారిపడ్డారు? నిమజ్జనం సమయంలో భద్రతా చర్యలు తీసుకున్నారా? నిర్వాహకుల పర్యవేక్షణ ఎలా ఉంది? అనే అంశాలపై పోలీసులు దర్యాప్తు చేస్తున్నారు.

ఆశ్రమంలో విషాదం

ఒకేసారి ఆరుగురు విద్యార్థులు మృతి చెందడంతో శిరీష అనాథాశ్రమంలో విషాదఛాయలు అలముకున్నాయి. తోటి విద్యార్థులు, ఆశ్రమ నిర్వాహకులు కన్నీరుమున్నీరుగా విలపిస్తున్నారు. పండుగ వేళ జరిగిన ఈ ఘటనతో పెద్దకంజర్ల గ్రామంలోనూ విషాదం నెలకొంది. నిమజ్జన కార్యక్రమాల సమయంలో చెరువులు, కుంటలు, నదుల వద్ద చిన్నారులు, విద్యార్థుల భద్రతపై ప్రత్యేక దృష్టి పెట్టాల్సిన అవసరం ఉందని స్థానికులు కోరుతున్నారు.