Hyderabad | రూ. 2 లక్షల కోసం దారుణం

Published: 24 Aug 2026 • 12:56 PM

* ఇద్దరు సోదరుల కిడ్నాప్.. 5 గురు ముఠా అరెస్ట్

ఆకేరు న్యూస్, హైదరాబాద్: రాజధాని నగరంలోని గోషామహల్ పరిధిలో సంచలనం సృష్టించిన కిడ్నాప్ కేసును పోలీసులు వేగంగా ఛేదించారు. కేవలం డబ్బు, వాహనాల కోసం ఇద్దరు తోబుట్టువులను అపహరించి దారుణంగా చిత్రహింసలకు గురిచేసిన ఐదుగురు సభ్యుల ముఠాను పోలీసులు అరెస్ట్ చేసి రిమాండ్‌కు తరలించారు.

* గోదాంలో నిర్బంధించి స్టీల్ పైపులతో దాడి…

పోలీసుల కథనం ప్రకారం, అక్బర్, అలీమ్ అనే ఇద్దరు సోదరులను నిందితులు కిడ్నాప్ చేసి ఒక గోదాంలో బంధించారు. అనంతరం బాధితులను భయభ్రాంతులకు గురిచేస్తూ చేతులతో, స్టీల్ పైపులతో విచక్షణారహితంగా దాడి చేశారు.

ఈ దారుణమైన దాడిలో బాధితులకు తీవ్ర గాయాలయ్యాయి. అంతటితో ఆగకుండా, బాధితులను బెదిరించి రూ. 2 లక్షల నగదుతో పాటు ఒక కారు, ఆటో ఇవ్వాలని డిమాండ్ చేశారు. కొడుకుల పరిస్థితి చూసి కంగారుపడి గోదాం వద్దకు వచ్చిన బాధితుల తల్లిదండ్రులను సైతం నిందితులు అక్కడ నిర్బంధించి బెదిరింపులకు పాల్పడ్డారు.

* రూ. 2 లక్షల నగదు, వాహనాల డిమాండ్.. చివరికి జైలుకు..

సమాచారం అందుకున్న గోషామహల్ పోలీసులు తక్షణమే రంగంలోకి దిగి నిందితుల ముఠాను అదుపులోకి తీసుకున్నారు. వారి వద్ద నుంచి 2 కార్లు, ఒక ఆటో మరియు 2 మొబైల్ ఫోన్లను స్వాధీనం చేసుకున్నారు. అరెస్ట్ చేసిన ఐదుగురు నిందితులను న్యాయస్థానంలో హాజరుపరిచి రిమాండ్‌కు తరలించారు.