IPL Ticket Black Market
ఆకేరు న్యూస్, హైదరాబాద్: నగరంలో ఐపీఎల్ (IPL) సందడి పీక్స్కు చేరింది. ఉప్పల్ రాజీవ్ గాంధీ అంతర్జాతీయ క్రికెట్ స్టేడియంలో రేపు (శుక్రవారం) ఉత్కంఠభరితంగా జరగనున్న సన్రైజర్స్ హైదరాబాద్ (SRH), రాయల్ ఛాలెంజర్స్ బెంగళూరు (RCB) మ్యాచ్పై క్రికెట్ అభిమానుల్లో భారీ అంచనాలు నెలకొన్నాయి. విరాట్ కోహ్లీ, క్లాసెన్ వంటి దిగ్గజ ఆటగాళ్ల పోరును ప్రత్యక్షంగా వీక్షించేందుకు అభిమానులు ఎగబడుతున్నారు. ఈ క్రేజ్ను క్యాష్ చేసుకునేందుకు బ్లాక్ మార్కెట్ ముఠాలు రంగంలోకి దిగడంతో, మల్కాజ్గిరి పోలీసులు వారిపై ఉక్కుపాదం మోపుతున్నారు.
* నిమిషాల్లో అమ్ముడైన 39 వేల టికెట్లు…
ఈ మ్యాచ్కు ఉన్న విపరీతమైన డిమాండ్ కారణంగా, అధికారికంగా కేటాయించిన దాదాపు 39 వేల టికెట్లు ఆన్లైన్ పోర్టల్స్లో అమ్మకానికి పెట్టిన నిమిషాల వ్యవధిలోనే హాట్ కేకుల్లా అమ్ముడుపోయాయి. టికెట్లు దొరకని వేలాది మంది అభిమానులు తీవ్ర నిరాశకు గురయ్యారు. ఇదే తరుణాన్ని ఆసరాగా చేసుకుని కొందరు కేటుగాళ్లు టికెట్లను భారీ ధరలకు బ్లాక్ మార్కెట్లో విక్రయించేందుకు తెరలేపారు. రూ. 1000, రూ. 2000 విలువైన టికెట్లను ఐదు నుంచి పది రెట్లు అధిక ధరలకు, అంటే రూ. 10,000 నుంచి రూ. 15,000 వరకు విక్రయిస్తున్నట్లు సమాచారం అందింది.
* రంగంలోకి మల్కాజ్గిరి పోలీసులు స్పెషల్ నజర్…
బ్లాక్ టికెట్ల విక్రయాలపై వస్తున్న ఫిర్యాదులతో మల్కాజ్గిరి డీసీపీ ఆదేశాల మేరకు పోలీసులు, టాస్క్ఫోర్స్ బృందాలు ఉప్పల్ స్టేడియం పరిసర ప్రాంతాల్లో, సోషల్ మీడియా వేదికలపై ప్రత్యేక నిఘా పెట్టారు. స్టేడియం చుట్టుపక్కల సివిల్ డ్రెస్లో తిరుగుతూ నిందితులను పట్టుకునేందుకు వ్యూహం రచించారు. ఇందులో భాగంగా గుట్టుచప్పుడు కాకుండా సాగుతున్న బ్లాక్ మార్కెట్ దందాను ఛేదించి, టికెట్లు విక్రయిస్తున్న పలువురు నిందితులను పోలీసులు అదుపులోకి తీసుకున్నారు. వారి వద్ద నుంచి భారీగా మ్యాచ్ టికెట్లతో పాటు నగదు, మొబైల్ ఫోన్లను స్వాధీనం చేసుకున్నారు.
* ఇప్పటివరకు 10 కేసులు నమోదు…
ఈ దందాకు సంబంధించి ఉప్పల్ పరిధిలో ఇప్పటివరకు పోలీసులు 10కి పైగా క్రిమినల్ కేసులు నమోదు చేసినట్లు అధికారికంగా వెల్లడించారు. ఈ ముఠా వెనుక ఎవరెవరు ఉన్నారు? వీరికి ఇన్ని టికెట్లు ఒకేసారి ఎలా లభించాయి? అనే కోణంలో పోలీసులు లోతుగా విచారణ జరుపుతున్నారు. కేవలం క్షేత్రస్థాయిలోనే కాకుండా, సామాజిక మాధ్యమాలు (WhatsApp, Telegram, Instagram) వేదికగా జరుగుతున్న డిజిటల్ బ్లాక్ మార్కెట్ లావాదేవీలపై కూడా సైబర్ క్రైమ్ విభాగం నిఘా పెట్టింది.
* అభిమానులకు పోలీసుల హెచ్చరిక…
“క్రికెట్ అభిమానులు ఎవరూ కూడా ఇటువంటి బ్లాక్ మార్కెట్ ముఠాల ట్రాప్లో పడకూడదు. సోషల్ మీడియాలో లేదా వ్యక్తిగతంగా ఎవరైనా అధిక ధరలకు టికెట్లు ఆఫర్ చేస్తే నమ్మవద్దు. కేవలం అధికారిక వేదికల (Official Platforms) ద్వారా మాత్రమే టికెట్లు కొనుగోలు చేయాలి. నకిలీ టికెట్లు కొని మోసపోవద్దని, బ్లాక్ టికెట్ల సమాచారం తెలిస్తే వెంటనే పోలీసులకు ఫిర్యాదు చేయాలని” మల్కాజ్గిరి పోలీసులు కోరారు.
మ్యాచ్ ప్రారంభానికి సమయం దగ్గర పడుతుండటంతో ఉప్పల్ స్టేడియం పరిసరాల్లో భద్రతను మరింత కట్టుదిట్టం చేశారు. ప్రతి ఒక్కరినీ తనిఖీ చేసిన తర్వాతే లోపలికి అనుమతిస్తామని స్పష్టం చేశారు.
About the Author
