Kalvakuntla Kavitha | డీజీపీని నిలదీసిన కవిత

Published: 06 Sep 2026 • 02:52 PM

*కానిస్టేబుల్‌పై కవిత ఆగ్రహం

*రేవంత్‌కు కవిత హెచ్చరిక

*కేసీఆర్‌పై డైవర్షన్ రాజకీయం

ఆకేరు న్యూస్, హైదరాబాద్: సోషల్ మీడియాలో తనపై అత్యంత అసభ్యకరమైన, అనుచిత వ్యాఖ్యలు చేసిన పోలీస్ కానిస్టేబుల్‌పై కఠిన చర్యలు తీసుకోవడంలో కాంగ్రెస్ ప్రభుత్వం తీవ్ర నిర్లక్ష్యం వహిస్తోందని తెలంగాణ రక్షణ సేన (TRS) అధ్యక్షురాలు కల్వకుంట్ల కవిత తీవ్రస్థాయిలో ధ్వజమెత్తారు. బాధ్యతాయుతమైన పోలీస్ యూనిఫాంలో ఉండి మహిళల ప్రతిష్టను భంగపరిచేలా ప్రవర్తించిన వ్యక్తిపై కేవలం సస్పెన్షన్ వేటు వేసి చేతులు దులుపుకోవడంపై ఆమె ఆగ్రహం వ్యక్తం చేశారు.

* కానిస్టేబుల్‌ను ఎందుకు అరెస్ట్ చేయడం లేదు

పోలీస్ శాఖలోనే ఉంటూ మహిళలను కించపరిచిన కానిస్టేబుల్‌ను వెంటనే అరెస్ట్ చేయాలని కవిత డిమాండ్ చేశారు. “మహిళలను దూషిస్తే చట్టప్రకారం మూడేళ్ల వరకు జైలు శిక్ష పడుతుంది. కానీ, ఈ కానిస్టేబుల్‌పై చర్యలు తీసుకోకుండా కేవలం సస్పెన్షన్‌తో సరిపెట్టడం ఏంటి? అతను ఏమైనా డీజీపీ రికమండేషన్‌తో ఉద్యోగంలో చేరాడా?” అని ఘాటుగా ప్రశ్నించారు. “మీ కుటుంబ సభ్యులు లేదా కోడళ్లపై ఇలాంటి వ్యాఖ్యలు చేస్తే ఊరుకునేవారా?” అని డీజీపీ సీవీ ఆనంద్‌ను నిలదీశారు. తెలంగాణలో రోజురోజుకూ నేరాల రేటు (క్రైమ్ రేట్) పెరిగిపోతోందని, లా అండ్ ఆర్డర్ వైఫల్యానికి ఇదే నిదర్శనమని ఆమె మండిపడ్డారు. ఈ వ్యవహారంలో సదరు కానిస్టేబుల్‌పై తక్షణమే క్రిమినల్ కేసులు నమోదు చేసి అరెస్ట్ చేయకపోతే రాష్ట్రవ్యాప్తంగా ప్రభుత్వాన్ని బద్నాం చేస్తామని హెచ్చరించారు.

* ఉద్యమకారులకు గుర్తింపు కార్డులు ఇవ్వాలి

తెలంగాణ రాష్ట్ర సాధన కోసం పోరాడిన ఉద్యమకారులకు న్యాయం చేయడంలో ప్రభుత్వం పూర్తిగా విఫలమైందని కవిత విమర్శించారు. ఉద్యమకారుల సంక్షేమం, వర్గీకరణ కోసం ఏర్పాటు చేసిన కేకే (కె. కేశవరావు) కమిటీ నివేదికలు, సిఫార్సులు ఏమయ్యాయని ఆమె ప్రశ్నించారు. తెలంగాణ ఉద్యమకారులకు తక్షణమే ప్రభుత్వ గుర్తింపు కార్డులు (Identity Cards) మంజూరు చేయాలని, వారికి 250 గజాల నివాస స్థలాలతో పాటు సంక్షేమ పథకాలు అమలు చేయాలని డిమాండ్ చేశారు. రాబోయే అసెంబ్లీ సమావేశాల లోపే ముఖ్యమంత్రి రేవంత్ రెడ్డి ఉద్యమకారుల సమస్యలపై స్పష్టమైన నిర్ణయం తీసుకోవాలని అల్టిమేటం జారీ చేశారు.

* కేసీఆర్ అసెంబ్లీ రాకపై డైవర్షన్

కాంగ్రెస్ ప్రభుత్వం తమ పాలనా వైఫల్యాలను కప్పిపుచ్చుకోవడానికే డైవర్షన్ రాజకీయాలకు పాల్పడుతోందని కవిత ఆరోపించారు. కేసీఆర్ అసెంబ్లీకి రావాలంటూ అధికార పక్షం రచ్చ చేయడం కేవలం ప్రజల దృష్టిని మళ్లించే ప్రయత్నంలో భాగమేనని కొట్టిపారేశారు. రాజకీయాల్లో పెరుగుతున్న దాడులు, అసభ్యకర వ్యాఖ్యలను నియంత్రించడానికి త్వరలో జరగబోయే అసెంబ్లీ సమావేశాల్లో ‘హేట్‌స్పీచ్’ (Hate Speech) నిరోధక చట్టాన్ని తీసుకురావాలని కవిత డిమాండ్ చేశారు.