KU VC Pratap Reddy | రోహిణి ఆస్పత్రిలో చేరిక

Published: 28 Jul 2026 • 03:02 PM Updated: 28 Jul 2026 • 03:16 PM

ఆకేరు న్యూస్, హన్మకొండ: కాకతీయ విశ్వవిద్యాలయం (KU) ఉపకులపతి (వైస్ ఛాన్సలర్) ఆచార్య కర్నాటి ప్రతాప్ రెడ్డి హఠాత్తుగా తీవ్ర అస్వస్థతకు గురయ్యారు. మంగళవారం ఆయన తీవ్రమైన మయోకార్డియల్ ఇన్‌ఫార్క్షన్ (గుండెపోటు) రావడంతో కుటుంబ సభ్యులు, సిబ్బంది తక్షణమే స్పందించి హనుమకొండ సుబేదారిలోని ప్రముఖ రోహిణి సూపర్‌స్పెషాలిటీ ఆసుపత్రికి తరలించారు.

* వైద్యుల అత్యవసర స్పందన – యాంజియోగ్రామ్, స్టెంట్ అమరిక..

ఆస్పత్రికి తీసుకువచ్చిన వెంటనే సీనియర్ కార్డియాలజిస్టుల బృందం అత్యవసర వైద్య సేవలు అందించింది. ప్రాథమిక తపసణల అనంతరం వైద్యులు వెంటనే యాంజియోగ్రామ్ (Angiogram) పరీక్ష నిర్వహించారు. గుండెకు రక్తాన్ని సరఫరా చేసే నాళాల్లో తీవ్ర అవరోధం (Blockage) ఉన్నట్లు గుర్తించిన వైద్య బృందం, ఆలస్యం చేయకుండా ఆంజియోప్లాస్టీ (Angioplasty) నిర్వహించి ప్రాణాపాయం తప్పించేందుకు స్టెంట్ (Stent) అమర్చారు. ప్రస్తుతం ఆయన ఆసుపత్రిలోని క్రిటికల్ కేర్ యూనిట్ (ICU)లో వైద్యుల నిరంతర పర్యవేక్షణలో చికిత్స పొందుతున్నారు. వీసీ ప్రతాప్ రెడ్డి ఆరోగ్య పరిస్థితి ప్రస్తుతం నిలకడగానే ఉందని, అభిమానులు, విద్యార్థులు, యూనివర్సిటీ సిబ్బంది ఆందోళన చెందాల్సిన అవసరం లేదని ఆసుపత్రి యాజమాన్యం అధికారికంగా ప్రకటించింది.

* నిన్నటి నుంచే ఆస్వస్థత.. నేడు తీవ్ర రూపం..

విశ్వసనీయ సమాచారం ప్రకారం.. ఆచార్య ప్రతాప్ రెడ్డి గడిచిన రెండు రోజులుగా (నిన్నటి నుంచి) అసౌకర్యంగా, అస్వస్థతతో బాధపడుతున్నారు. సాధారణ అలసటగా భావించినప్పటికీ, నేడు హఠాత్తుగా చాతిలో తీవ్రమైన నెప్పి రావడంతో గుండెపోటుగా గుర్తించారు. ఆయన గుండెపోటుకు గురయ్యారనే వార్త తెలిసిన వెంటనే కాకతీయ విశ్వవిద్యాలయ ఆచార్యులు, అధ్యాపకేతర సిబ్బంది, విద్యార్థి నాయకులు మరియు ఉమ్మడి వరంగల్ జిల్లాలోని ప్రముఖులు ఆందోళనకు గురయ్యారు. పెద్ద సంఖ్యలో వీసీ అభిమానులు, కేయూ వర్గాలు ఆస్పత్రి వద్దకు చేరుకుని ఆయన ఆరోగ్య పరిస్థితిని అడిగి తెలుసుకుంటున్నారు.

* రోహిణి ఆసుపత్రిలో వరుస ఘటనలు – కలకలం..

హనుమకొండలోని రోహిణి ఆసుపత్రి ప్రస్తుతం తీవ్ర ప్రాధాన్యత సంతరించుకుంది. గత రెండు రోజులలోనే ఇద్దరు ప్రముఖ వ్యక్తులు తీవ్ర గుండెపోటుతో ఇక్కడే చేరి చికిత్స పొందడం గమనార్హం. మొన్నటి రోజున మాజీ ఎమ్మెల్యే, బీఆర్ఎస్ జెడ్పీటీసీ సమన్వయకర్త పెద్ది సుదర్శన్ రెడ్డి తీవ్ర గుండెపోటుకు గురై ఇదే రోహిణి ఆసుపత్రిలో అత్యవసర చికిత్స పొందారు. ఆయనకు కూడా వైద్యులు అత్యవసరంగా యాంజియోప్లాస్టీ నిర్వహించి స్టెంట్ అమర్చారు. పెద్ది సుదర్శన్ రెడ్డి ఆస్పత్రిలో కోలుకుంటున్న సమయంలోనే, మరుసటి రోజే కాకతీయ వర్సిటీ వీసీ ప్రతాప్ రెడ్డి కూడా అదే ఆస్పత్రిలో హార్ట్ ఎటాక్‌తో చేరడం స్థానికంగా మరియు రాజకీయ, విద్యా వర్గాల్లో తీవ్ర కలకలాన్ని రేపింది.