Mahabubabad| భూవివాదంలో ఎస్ఐ జోక్యం?

Published: 15 Sep 2026 • 04:40 PM

* ఎస్ఐపై కుటుంబం ఆరోపణలు

ఆకేరు న్యూస్, మహబూబాబాద్: భూవివాదంలో దంతాలపల్లి ఎస్ఐ జోక్యం చేసుకుని తమ కుటుంబాన్ని భయభ్రాంతులకు గురిచేస్తున్నారని ఆరోపిస్తూ ఓ కుటుంబం పోలీస్ స్టేషన్ ముందు ఆందోళనకు దిగింది. మహబూబాబాద్ జిల్లా దంతాలపల్లి మండల కేంద్రంలో ఈ ఘటన చోటుచేసుకుంది. తూర్పు తండాకు చెందిన బాధిత కుటుంబ సభ్యులు పోలీస్ స్టేషన్ ఎదుట నిరసన చేపట్టడంతో కొద్దిసేపు ఉద్రిక్త వాతావరణం నెలకొంది.

తమ కుటుంబానికి చెందిన భూ వివాదంలో ఎస్ఐ జోక్యం చేసుకుంటున్నారని బాధితులు ఆరోపించారు. ఇది సివిల్ వ్యవహారమైనప్పటికీ పోలీసుల జోక్యం తమను తీవ్ర ఇబ్బందులకు గురిచేస్తోందని ఆవేదన వ్యక్తం చేశారు.

సీసీ కెమెరాల తొలగింపుపై ఆరోపణలు

తమ కుటుంబ భద్రత కోసం ఇంటి వద్ద ఏర్పాటు చేసుకున్న సీసీ కెమెరాలను తొలగించాలని ఎస్ఐ సర్పంచ్‌ను ఆదేశించినట్లు బాధిత కుటుంబం ఆరోపించింది. పోలీసుల చర్యలతో తమకు రక్షణ లేకుండా పోయిందని వారు వాపోయారు.

తమ సమస్యకు న్యాయం చేయకపోతే పురుగుల మందు తాగి ఆత్మహత్య చేసుకుంటామని కుటుంబ సభ్యులు ఆవేదన వ్యక్తం చేశారు. దీంతో పోలీసులు వారితో మాట్లాడి పరిస్థితిని అదుపులోకి తీసుకువచ్చినట్లు సమాచారం.

ఈ ఘటనపై ఉన్నతాధికారులు స్పందించి పూర్తి స్థాయిలో విచారణ జరిపి తమకు న్యాయం చేయాలని బాధిత కుటుంబ సభ్యులు కోరుతున్నారు. అయితే, ఈ ఆరోపణలపై పోలీసుల అధికారిక వివరణ వెలువడాల్సి ఉంది.