MINISTER PONGULETI | హరీష్ రావుకు మంత్రి స్ట్రాంగ్ కౌంటర్

* ఫ్యూచర్ సిటీకి తిరుగులేదు

ఆకేరు న్యూస్, హైదరాబాద్: తెలంగాణలో అధికార కాంగ్రెస్, ప్రతిపక్ష బీఆర్ఎస్ పార్టీల మధ్య రాజకీయ యుద్ధం పీక్స్‌కు చేరింది. బీఆర్ఎస్ కీలక నాయకుడు, మాజీ మంత్రి తన్నీరు హరీష్ రావు లక్ష్యంగా రాష్ట్ర రెవెన్యూ, సమాచార పౌరసంబంధాల శాఖ మంత్రి పొంగులేటి శ్రీనివాస్ రెడ్డి తీవ్రస్థాయిలో ధ్వజమెత్తారు. హరీష్ రావు రాజకీయ భవిష్యత్తును ఉద్దేశించి మంత్రి పొంగులేటి చేసిన ఘాటు వ్యాఖ్యలు ఇప్పుడు రాష్ట్ర రాజకీయ వర్గాల్లో దావానలంలా మారాయి. మళ్లీ అధికారంలోకి వస్తామంటూ బీఆర్ఎస్ నేతలు పగటి కలలు కంటున్నారని పొంగులేటి ఎద్దేవా చేశారు.

* మీ పొలిటికల్ ఫ్యూచర్ ఖతం చేస్తోంది మీ మామ, బామ్మర్దులే..

హరీష్ రావును ఉద్దేశించి మంత్రి పొంగులేటి శ్రీనివాస్ రెడ్డి సంచలన వ్యాఖ్యలు చేశారు. బీఆర్ఎస్ పార్టీలో హరీష్ రావు భవిష్యత్తు ఏంటో ఆయనకే తెలియని పరిస్థితి నెలకొందని విమర్శించారు. “మీ పొలిటికల్ ఫ్యూచర్‌ను ఖతం చేయాలని మీ మామ (కేసీఆర్), మీ బామ్మర్ది (కేటీఆర్) గట్టిగా చూస్తున్నారు. వేరే వాళ్ళ గురించి లేదా రాష్ట్ర అభివృద్ధి గురించి మాట్లాడే ముందు, ముందుగా మీ పార్టీలో మీ భవిష్యత్తును కాపాడుకుంటే మంచిది” అని హితవు పలికారు. బీఆర్ఎస్ కుటుంబ రాజకీయాల వల్లే ఆ పార్టీ నేతలకు భవిష్యత్తు లేకుండా పోతోందని మండిపడ్డారు.

* అమెరికాలో ఉండి ఫ్యూచర్ సిటీ భూములపై ఎవరితో ఒప్పందాలు…

రాష్ట్ర ప్రభుత్వం ఎంతో ప్రతిష్టాత్మకంగా చేపడుతున్న ‘ఫ్యూచర్ సిటీ’ ప్రాజెక్టును అడ్డుకుంటామనడంపై పొంగులేటి తీవ్రంగా విరుచుకుపడ్డారు. ప్రస్తుతం విదేశీ పర్యటనలో ఉన్న హరీష్ రావును నిలదీస్తూ.. “అమెరికాలో కూర్చొని ఫ్యూచర్ సిటీని అడ్డుకుంటామని మాట్లాడటం హాస్యాస్పదం. అక్కడ ఉండి ఫ్యూచర్ సిటీ భూములను తాకట్టు పెట్టడానికి ఎవరితోనైనా ఒప్పందాలు చేసుకున్నారా?” అని మంత్రి ప్రశ్నించారు. విదేశాల్లో ఉంటూ రాష్ట్ర అభివృద్ధిని అడ్డుకోవాలని చూడటం సరికాదన్నారు.

* లగచర్ల, మూసీ ప్రాజెక్టులపై కుట్రలు ఆపండి…

రాష్ట్రంలో యువతకు వేలాది ఉద్యోగ, ఉపాధి అవకాశాలు కల్పించేందుకు ప్రభుత్వం ఎంతో ప్రతిష్టాత్మకంగా ఫోర్త్ సిటీ (ఫ్యూచర్ సిటీ)ని నిర్మిస్తుంటే, బీఆర్ఎస్ నేతలు కుట్రపూరితంగా అడ్డుకుంటున్నారని మంత్రి ఆరోపించారు. కేవలం ఫ్యూచర్ సిటీనే కాకుండా.. మూసీ ప్రక్షాళన ప్రాజెక్టును, లగచర్ల ఇండస్ట్రీస్ ఏర్పాటును కూడా అడ్డుకుంటూ రాష్ట్ర ప్రగతికి స్పీడ్ బ్రేకర్లుగా మారారని విమర్శించారు. వికారాబాద్ జిల్లా లగచర్లలో ఫార్మా విలేజ్ కోసం భూసేకరణకు వెళ్లిన కలెక్టర్, అధికారులపై జరిగిన దాడి వెనుక బీఆర్ఎస్ నాయకుల కుట్రలు స్పష్టంగా కనిపిస్తున్నాయని, ఇలాంటి ఉదంతాలతో యువత ఉద్యోగ అవకాశాలను దెబ్బతీస్తున్నారని ఆగ్రహం వ్యక్తం చేశారు.

* బీఆర్ఎస్‌కు ఫ్యూచర్ లేదు ఫ్యూచర్ సిటీకి తిరుగులేదు…

ముఖ్యమంత్రి రేవంత్ రెడ్డి నేతృత్వంలో ముచ్చర్ల పరిధిలో ఐటీ, ఏఐ (Artificial Intelligence), ఫార్మా, స్పోర్ట్స్ యూనివర్సిటీలతో కూడిన ‘ఫోర్త్ సిటీ’ని అంతర్జాతీయ స్థాయిలో నిర్మించేందుకు ప్రణాళికలు సిద్ధం చేశామని మంత్రి స్పష్టం చేశారు. విపక్షాలు ఎన్ని కుట్రలు చేసినా, భూసేకరణ సమస్యలను లేవనెత్తినా అభివృద్ధి ఆగే ప్రసక్తే లేదన్నారు. రాబోయే రోజుల్లో బీఆర్ఎస్ పార్టీకి ఎలాంటి ఫ్యూచర్ ఉండదని, కానీ తెలంగాణలో కాంగ్రెస్ ప్రభుత్వం నిర్మిస్తున్న ‘ఫ్యూచర్ సిటీ’ అభివృద్ధికి మాత్రం ఎలాంటి తిరుగుండదని పొంగులేటి తేల్చి చెప్పారు.